НАШЫ ДІВЧАТА

Завдякы своим матерям, нашы американскы дівчата карпаторусского, специально лемковского роду, интересуются больше своим народом и крайом их родителей, як хлопцы. Хлопцы скоро забывают даже бесіду своих родичов в товаристві другых американцов. Зато дівчата, особливо в Пеннсилвании, держатся больше дому и матерей. Нашы американскы дівчата в Пеннсильвании майже всі говорят так чисто по-лемковскы, што немож роспознати их от старокрайовых. А до того, котры из матерей належат ище до свойой народной организации, тоты виховали свои дочкы в народном духу, в любви до свого народа, научили их цінити нашу народну культуру.

При нашых православных церквах учат звычайно великорусской “русскости”, так што хоц церков карпаторусска, священник и учитель, хоц они и сами из Карпатской Руси, одівают свои церковны хоры в великорусскы або украинскы народны костюмы, дуже часто неправильны. Нам нераз приходилося видіти нашы церковны хоры, в якых-си долгых кошулях одіты дівчата с “корунами” на головах. Мы не знаме, што то за русскы костюмы мают быти, ци даякых русскых цариц, ци боярынь. А всі тоты дівчата нашого карпаторусского происхождения и сам священник также. То выглядат так, як бы наш народ не мал свойой народной одежы. Он має, и прекрасну оригинальну свою народну одежу, лем тот священник планно выученый и так само планно учит свою церковну молодеж, што, каже, штобы быти русскыми, то треба парадувати в подобных костюмах, як великорусскы боярыни, и взагалі тоты русскы там в старой России. А наше, што нашы предкы створили в Карпатах, то уж барз “просте”.

Но культурны русскы з России, и культурны украинцы з Украины не хотят нашы хоры видіти в великорусских або украинскых, а нашых власных лемковскых, бойковскых, гуцульскых народных костюмах, потому што их тоты нашы власны народны костюмы интересуют, а разом с тым мы показуєме, што и мы сами ціниме свой народ и його творчость, што мы люде культурны. И наш народ любит видіти на сцені свои діти в своих народных старокрайовых костюмах, як любит слухати свой народный язык, свою народну пісню, родне слово в представлениях, любит народный танец. То всьо наше народне ввела у нас на сцену наша народна организация Лемко-Союз. И котры матери стоят в нашой организации, то звичайно они научили любити своих дітей свой народ и всьо народне.

New Jersey, Garfield, Anna Halopy
Анна Халопий, Гарфильд, Н. Дж.

Вот, приміром, Анна Халопий из Гарфильд, Н. Дж., єдина дочка Викентия (емигранта из Білоруссии) и Юстины (емигранткы из Сяноцкого округа) — от маленькой дитины любит свой народ и всьо народне. Мы виділи єй виступати на нашой сцені з декламациями на родной бесіді ище дитином. Днеска она уж покончила гайскул, 18 рочна американска красавица, но она все зо своим народом и все на помочи в народной организации. Єй научили любити свой народ єй сознательны родиче, особливо мати, послали єй в лемковску школу в Пассайку. А до хору, до драматичного кружка она уж сама вступила. И мы переконаны, што из своих костюмов она найліпше любит тот, в котром єй видиме на фотографии — народный костюм, який ушила єй мати.

Правда, што меж нашом молодежом мало нашлося такых, штобы занялися сбором на помоч нашым братьям в краю в их борьбі против фашизма? Анна Халопий собрала на медицинску помоч Красной Армии понад 200 долларов, а на Американский Красный Крест понад 100 долларов. Не многы з нас можут похвалитися такыми дочками. А мы думаме, што нашы діти всі єднакы, лем єдны получили ліпшу науку от родичов, а другых родиче занедбали, бо и сами были занедбаны.

New Yorkm Yonkers, Maria Honcharik, Maria Gluz, Anna Chacho
Стоят с ліва на право: МАРИЯ ГОНЧАРИК и МАРИЯ ГЛЮЗ,
сидит: АННА ЧАЧО.

До нашых сознательных, ту рожденных дівчат, належат и тоты три нашы танцоркы — Мария Гончарик, Анна Чачо и Мария Глюз, всі три из Юнкере, Н. Й. — в народных костюмах Горлицкого повіта. Нашы люде в околиці Нью Йорка виділи их на сцені, так в К. Р. А. Центрі, як в Нью Йорку, Пассайку и др. Так сами дівчата в народных костюмах, як и их народны русскы танцы, подабаются всім нам. Чом мы не можеме заохотити до того всі своих власных дітей? Чом не створити нашым дітям по всіх нашых плейзах драматичны и танечны кружкы, народны хоры?

Як раз тепер нашы діти довідуются о великых побідах славян над “непобідимыми” німцами в краю. То пробуждат их и взбуждат интерес до свого родного народа и краю своих родичов. Они не чувствуются больше понижеными пропагандом американских фашистов против славян и русского народа. Поможме им познати народ, с котрого они походят.



[BACK]