Славянскы народы в борьбі против німецкых наіздников — (член-корреспондент академии наук ссср в. пичета)

Стародавными жителями на огромной территории от рікы Лабы (Ельбы) до Волгы и Дона с запада на восток, от Балтийского моря до Азовского, Чорного и Егейского морей были многочисленны славянскы племена, котрых в историчной наукі розділяют на три вітвы: западну, южну и восточну.

История западных и восточных славян наполнена борьбом за свою независимость, против німецкых панов феодалов, здавна хотячых проникнути на славянску территорию, росположену над ріком Лабом и дальше на восток от ней и рікы Одры. Натиск германскых племен начался ище с 7-го віка. Нашы историчны часы — то послідний етап в смертельной борьбі за свою будучность и свободу.

До 7-го віка границом меж славянами и німцами была ріка Лаба. Основна политична слабость славянскых племен была в их роздробленности, в браку єдиного державного объєдинения. В початку 7-го віка славянскы племена, якы жили на территории днешных Чехии и Моравии, подлегли нападениям и грабежам зо стороны тюрского племени аваров, котрому удалося на час подчинити их собі и примусити платити дань. Но славяне рішительно выступили против своих поневолителей.

В борьбі против аваров первый раз створился племенный союз славян на челі с чехомораванскыми племенами. Однако и послі розгрома аваров он не лем не роспался, но значно окріп в борьбі з новым врагом — франками (одно из германскых племен), не раз безуспішно пробувавшыми подчинити собі чехо-моравскы племена.

Первый славянский племенный союз удачно выдержал агрессию франков. Но франкы не отказалися от свого плана проникнути за Лабу. Нове наступление на славян было начато Карлом Великым (768—814) послі того, як ним были покорены саксы, котрых полабскы славяне поддержували в борьбі за независимость. Борьба полабскых славян с германскыми панами феодалами ростягнулася на долгий период — с 8-го по 13-й вік — и протекала дуже напружено с перемінным для обох сторон успіхом.

Опасность побудила полабскых славян утворити два великы племенны союзы — бодрицкий и лютицкий. Их опор германской агрессии значно окріп.

В 30 роках 9-го віка положение полабскых славян змінилося. Они знов перестали платити дань франкам. Створился противофранковский союз славянскых племен, знаный в истории под именем “Великоморавской державы”, ядром котрой была Моравия. Союз славянскых племен возник под вплывом усилившойся с 780 по 830 агрессии франков. Франкы пробували розбити Великоморавску державу як посредством открытой борьбы и при помочи німецкого католицкого духовенства, так и с помочом славянскых панов феодалов, котрых франкы старалися притягнути на свою сторону. Тота политика не дала германскым королям и панам желательных результатов. Великоморавска держава майже полстолітия (830—870) вела с франками борьбу за свою независимость. Всі пробы німцов покорити союз славянскых племен, в котрый входила и часть полабскых славян, были безуспішны.

В початку 10-го віка Великоморавска держава пала под ударами пришельцов з востока — венгров, — нашествие котрых грозило и самому германскому королевству. Западны славяне оказалися политично розбитыми.

Выкорыставши гибель Великоморавской державы, німецкы паны и королі почали наново свой наступ на полабскых славян и в половині 10-го віка змогли выполнити свои захватничы планы. Но с конца 10-го віка борьба полабскых славян обновилася знов. Они выступали тепер объєдинены в кріпкы федерации бодричей и лютичей. И они скинули німецке ярмо.

Велику помоч полабскым славянам в их борьбі з німцами оказала польска держава Болеслава І (992—1025). Полякы не лем оборонили свою политичну независимость от германскых агрессоров, но остановили агрессию німцов, направлену против полабскых и прибалтийскых славян. Им удалося укріпитися на берегах Лабы и в Поморью над Балтиком.

В тот сам час возникла и политично окріпла чешска держава. Німецкы королі в єдны часы старалися поддержувати с чешскыми королями приятельскы отношения, коли им грозила опасность зо стороны венгров. Вспольными силами німцов и чехов венгры в 955 року были розбиты над ріком Лех, коло Аугсбурга.

Як лем опасность зо стороны Венгрии пропала, німецкы паны різко змінили своє отношение до чехов. Они не раз пробували розвалити чешску державу зо середины, поддержуючи чешскых панов против княжой власти. Но пробы тоты были парализуваны. Чешска держава сохранила свою самостоятельность и подобно Польші была вірным сторожом славянства на западі против німецкой агрессии.

Но німцы не покинули намірения укріпитися на Лабі и на восток от ней. Для німецкых агрессоров в 12—13 віках зложилися благоприятны политичны обставины. Польша и Чехия политично ослабли в период феодальной роздробленности, а также вслідствие татаро-монгольского нашествия.

Хотя полабскы и прибалтийскы славяне были в державном отношению больше организованы в 12—13 віках, як в 10—11 віках, и храбро боролися против німецкых наіздников, однако и их опор был зломленый. Для ослабления формувавшыхся славянскых княжеств німцы старалися выкорыстати также межусобну борьбу славянскых князей.

Множество німецкых колонистов осідало в долині рікы Лабы, забераючи славянскы землі. Часть славян стала рабами. То были хлопы и роботникы.

Чым больше приходило німецкых колонистов, тым меньше оставалося земли в руках славян, и они мушены были працувати у німцов, як земледільскы выробникы. В містах славян выселяли из центральной части на окраины, в особны улицы — китцы, и преслідували их и здівалися над ними. Таке саме было положение славян и на правом берегу Лабы до Одры.

Без огляду на тяжкы житьовы условия полабскы и балтийскы славяне долго и вперто опералися германизации. Сліды славянскых говоров сохранилися на лівом берегу Лабы даже в 18-ом віку. В другых районах они счезли в 15—16 віку.

В початку 13-го віка на восточном побережі Балтийского моря осадился німецкий орден меченосцов. Под видом християнизации туземного населения и поширения “християнско-скотской культуры”, по выражению Маркса, рыцари без огляду на жестокий опор місцевого населения — покорили го и наложили дань. Орден меченосцов стремился поширити свой вплыв и дальше, на сусідню русску землю — Полоцке княжество, — но тота проба кончилася неудачом. Объєединены полоцкы и смоленскы князі были достаточно сильны и не пустили рыцарей на территорию Руси. Агрессия была отбита, и орден поспішил заключити мир с Полоцком и Смоленском.

Но, заключивши мир, орден не отказался от свого намірения захватити русскы земли. Послі покорения естов німцы знов пробували посунутися дальше на восток, в Псковскы и Новогородскы земли. Выполняючи свой план, рыцари спочатку напали на Псковску землю и захватили Изборск, котрый был для Пскова дуже важным стратегичным пунктом. Псковичам удалося в коротком часі отобрати Изборск и взяти в плін німецкий гарнизон. В 1234-м року русский князь Ярослав Всеволодович с новгородцами рушил с походом в землю естов против рыцарей. Жестоко побиты, рыцари мушены были знов заключити мир.

Политика ордена мечоносцов не раз вызывала против него повстания місцевых жителей. В 1236 року они розгромили рыцарей-мечоносцов. Тогды побиты рыцари поспішили объєдинитися з другом рыцарском бандитском организациом, Тевтонскым орденом, укріпившымся в землі пруссов на южном побережу Балтийского моря, меж устьями рік Вислы и Німана. Орден меченосцов перестал истнувати, як отдільна политична организация и стал отділением єдиной бандитской шайкы, знаной под именем Ливонского ордена.

Послі того як Сіверовосточна Русь была завоювана в 1238 року татаро-монголами, ливонскы рыцари рішили, што настал подходячий час для подчинения Пскова и Новгорода. Они надіялися тоже на бунт в середині русской земли, так як в Пскові и Новгороді паны и богаты купцы не хотіли войны с псами-рыцарями.

Наступление на Русь было начато в 1240 року. Найперше был захваченый Изборск, котрого население было цілковито вынищено. Псковцы пошли помагати Изборску, но хотя як храбро билися, были розбиты.

Рыцари подошли под сам Псков. По словам літописца, на встрічу врагам вышол весь город, “и бысть січа межи ими велика и их гонячи били”. Рыцари стояли “под городом неділю, но города не взяли” и, захвативши много плінных, отошли. Лем через зраду группы бояр Псков был даный рыцарям и там был поставленый німецкий гарнизон. Послі того началося наступление на Новгородску землю.

Борьбу с врагами возглавил новгородский князь Александр Невский, недавно перед тым розбивший Шведов на Неві. Александр Ярославич звернулся за помочом до Сіверовосточной Руси. В марті 1242 року из Переяславля пришол ку нему брат Андрей з великым ополчением (народном армиом). Так створилося народне ополчение, горівше желанием розгромити псов рыцарей и освободити русску землю от наіздников.

Освободивши Псков, Невский почал тиснути владіния ордена. Рыцари выслали му на встрічу велике войско, в котре вошли свіжы подкріпления, присланы из Германии. 5-го апріля 1242 року на льду Чудского озера розогралася знаменита битва. Горды німецкы рыцари были розбиты наголову.

Агрессия Ливонского ордена потерпіла крах. “Непобідимы” рыцари были знищены “словеньским языком”.

*      *      *

Покаль ливонскы рыцари были заняты борьбом с Русью, Тевтонский орден провалил жестокы бои с пруссами — литовскым племенем. Послі розгрома пруссов тевтонскы рыцари приступили до завоювания Польшы и молодой, ище не окріпшой литовской державы. Для польского народа наступили тяжкы часы. Рыцари грозили му цілковитым вынищением.

Тевтонскы рыцари найперше накинулися на храброго князя Восточного Поморья — Святополка. В 1242 року он вступил с рыцарями в роспачливу борьбу, но в 1253р. он был здушеный великыми силами рыцарей и войска, прибывшого з Германии. В 1309 року рыцарям удалося подчинити Поморье с устьем рікы Вислы. Тевтонский орден навис над Польшом, як передовый пост Германии.

Владислав Локоток, король польский, котрый объєдинил под свою власть майже всю Польшу, поднял против рыцарей народну войну, вступивши в союз с князями Западного Поморья и примирившись с литовскым князем Гедимином. Народна война, розгорівшася в 1328 року, спочатку протекала успішно для Локотка. Но так як силы обох сторон были неровны (ордену помогли німецкы феодалы и чешский король Ян Люксембург), война было програна.

Наслідник Локотка Казимир 3-ий (1333— 1370) спочатку продолжал войну зо заклятым врагом польского народа, но наконец мушеный был в 1343 року заключити с тевтонами мир. Восточне Поморье было отдане ордену, но он был обовязаный вернути Польші Куявску и Добржинску земли, захвачены орденом предтым.

Для польского народа мир с орденом был передышком. До того и сам орден мало звертал увагы на заключеный договор и продолжал свои грабительскы напады. Одночасно німцы нападали и на Литву. Борьба с Тевтонскым орденом требувала объєдинения всіх противонімецкых сил.

Фронт борьбы с рыцарями объєдинил Польшу, Русь и Литву, и 15 юля 1410 року польско-литовске и білорусско-украинске войска встрітилися з рыцарями в долині меж Танненбергом и Грюнвальдом. Рыцари, врізавшись клином в ряды литовцов, спочатку обернули их в бігство. Устояли лем три смоленскы полкы, зыскавши тогды бессмертну славу. Принявши на себе найтяжший удар рыцарей, смоляне дали возможность привести в порядок ряды литовского войска. Подоспівша помоч под командом литовского вел. князя Витовта поддержала смоленскы полкы. Рыцари были розбиты наголову и укрылися за кріпкы муры своих замков.

День 15 юля — великий день в истории борьбы славян з німцами. Німецкой агрессии был нанесеный непоправимый удар, от котрого орден уж не мог поправитися. Гохмейстер Тевтонского ордена мушеный был стати вассалом польского короля.

Зо знищением Тевтонского ордена была рішена и судьба Ливонского ордена. В другой половині 16-го віка, в часі Ливонской войны и тото гніздо грабежников было знищено.

*      *      *

Розгромивши німецкых агрессоров, Польша, Литва и Русь усунули висівшу над ними грозьбу німецкого поневоления зо стороны рыцарей. Но Польші и Чехии грозила друга опасность, — подчинитися німецкому вплыву зо середины. Послі татаро-монгольского погрому польскы и чешскы паны и князі старалися привлекати на свои опустошены земли німецкых колонистов. На призыв феодалов рушили в Польшу и Чехию великы массы німцов, котры поселилися в селах и містах на специальных, привилейованых условиях (так зване німецке право). В результаті німецкой колонизации вся торговля и ремесленна промышленность славян перешла в рукы німцов. В містах и селах правом самоуправления и монопольного занятия торговлей и ремеслом корыстувалися лем сами німцы.

Славянске население было бесправным. Принадлежачи по містах до бідных, славяне зависіли от богатого купецтва и цеховых майстров. Німецкы колонии были роскиданы по цілой территории Польшы. В Чехии німцами были заняты отдільны районы.

Чешский народ переносил и социальный и национальный гнет. Його культурне розвитие могло бы остановитися, єсли бы німцы сохранили своє пануюче положение. Но чешский народ встал на борьбу за свой язык, свою народность, культуру, за независимость и свободу, Освободительна борьба вылялася спочатку в рух национально-религийный, связаный с именем Яна Гуса. То была проба створити национальну славянско-чешску церков и избавитися от засилия німецкого католицкого духовенства.

Німецкы паны и католицка церков постаралися освободитися от Гуса. Обвинивши го в “герезии” и обманом призвавши на собор в Констанці, они спалили го на кострі (1415). Гибель Гуса выкликала загальне взбурение в Чехии, и борьба против німецкого гнета усилилася.

Селяне и городскы бідны массы выдвигли противопанскы кличы и под руководством свого вождя Яна Жижкы громили німецкых панов. Насколько селянство и городскы бідны массы, званы “таборитами”, вели борьбу против німецкых панов-дідичов и духовного землевладіния, их противникы были сторонникы уміренных реформ, знаны под именем “чашников”, котры часами поддержували связи с таборитами и громили німецкых панов, як долго католицка церков и німецкий император не спішили выполнити жаданых ними национально-религийных требований.

Однако німецкий император и католицка церков змогли розорвати єдиный гуситский фронт. То было досягнено задоволением требований “чашников”. “Чашникы” выступали против “таборитов”, и соєдиненными силами феодального (панского) фронта таборитский селянский рух бідных был здушеный. В 1620 року в битві при Білой горі чешский народ потерпіл поражку. Чехия утратила свою политичну самостоятельность и попала в зависимость от Габсбургов. Но и то не зломило чешский народ.

Лем послі первой империалистичной войны чехам удалося восстановити свою политичну независимость, за котру они стойко и завзято боролися майже два столітия.

Под власть Габсбургов попал и хорватский народ с того часу, як Фердинанд Габсбургский был избранный венгерскым королем. Хорватам также грозила германизация. Они были позбавлены місцевой национальной автономии и подчинены німецкым урядникам, безмилосердно обдеравшым народ.

В 1757 року в Хорватии выбухло противо-німецке повстание, котре было жестоко здушене. Находячись под властьом мадьярскых дідичов и німецкых урядников хорватский народ был страшно угнетаный. Така сама доля постигла и маленький словенский народ.

Послі розділа Польшы (1772—1795) властивы польскы землі попали под власть Пруссии. В протягу 19-го и спочатком 20-го віка прусскы власти старалися онімечити поляков. Часово тота германизация была остановлена революциом 1848 року. Но передышка тота была дуже коротка. Особливо ненавиділ поляков німецкий канцлер Бисмарк. Однако, мимо преслідовань польского языка и культуры, мимо старань правительства скуповати польскы земли для передачи их прусскым баронам, вся тота политика, преводима методично и жестоко, не кончилася успіхом. Польский народ организовано спротивлялся німецкой агрессии. Бисмарку и його наслідникам пришлося признати полный крах свойой германизаторской политикы.

Найблизшым сусідом империи Габсбургов на югі был сербский народ, найбольша часть котрого находилася на Балканах, а меньша часть в империи Габсбургов. Габсбургы зорко слідили за национально-освободительном борьбом сербов и всяко старалися здусити єй.

Австрийске правительство пустило в ход всі свои коварны штукы, лем бы не дати можности укріпитися сербской державности. Австрийске золото наполняло кишені сербского короля Милана. Краина роспродавалася гуртом и на дробно. Сербия, не маючи выхода ку морю, находилася в прямой економичной зависимости от Австрии. Австрия хотіла провести вколо Сербии желізну дорогу, штобы оточити єй зо всіх сторон и тым получити пряме сполучение с портами Егейского моря. В тисках економичной блокады маленька Сербия дусилася.

За плечами Австрии стояла Германия, котра хотіла захватити Балканский полуостров, а особливо Сербию. Программа захвата балкан была выроблена уж в 1882 року. Проба выполнити тоту захватничу программу была предпринята Германиом в часі первой світовой империалистичной войны. Планы німцов скрахували, так як Германия програла войну. Сербии пришлося вытерпіти всі німецкы жестокости. Однако, сербска армия не капитульовала. Перешовши через трудно проходимы горы, она нашла собі часовый притулок на островах Средиземного моря и послі реорганизации знов взяла участь в борьбі против німцов. Политичну и национальну независимость балканскы славяне получили послі окончания войны 1914—1918.

*      *      *

Ныні єдны славянскы народы — чехы, полякы, сербы — находятся под пятом Гитлера; чорногорцы, непризнававшы николи чужого ярма, отданы на роздертя Муссолиньому; Болгария, лялькове королевско Хорватии и Словацка держава — вассалы Гитлера и также подлягают беспощадному грабежу. Приморска Далматия, отрізана от Хорватии, присоєдинена к Италии, и майже вся Словения захвачена Итальом. Так совершился фашистский переділ Европы, грозячий славянскым народам физичным вынищением, национальном гибелью, обернением в гитлеровскых рабов, в народы без культуры и будучности, в “говоряще орудие” німецкых князей и прусскых баронов. Но славянскы народы не будут рабами Гитлера. В віковой борьбі за свою свободу, честь и достоинство они сохранили свою национальность, свой язык и культуру, и в послідной смертельной схваткі з гитлеризмом побіда буде за славянскыми народами.

Нияком гитлеровском пропагандом не знищити в славянскых народах сознание єдинства походжения и кровной связи з русскым народом. Тернистый и страшный путь славянскых народов под пятом Гитлера, но всі тоты страдания кончатся великом радостьом освобождения. Встают славянскы народы на борьбу за свою свободу и независимость. Уважно, напруженно слідят они за борьбом могучой Красной Армии з гитлеровскыми ордами, борьбом, котра знищит Гитлера и восстановит независимость славянскых народов.



[BACK]