Мы в войні с фашизмом

Рок тому назад, в неділю 7-го декабря, 1941 року, віроломно, несподівано, без объявления войны напала на нашу Американску землю Япония. Японскы бомбовозы збомбували базу американского флота на Гаваях — Пирл Гарбор и знищили пару воєнных кораблей. Послі того объявили нам войну гитлеровска Германия, фашистска Италия и другы, меньшы их прихвостникы.

Наше правительство и воєнне руководство не сподівалися того нападу, не сподівался го и американский народ, потому што всі мы розуміли свою державу, як найсильнійшу в світі и мы не могли припускати, што Япония осмілится напасти на так сильну индустриально и економично державу, як Америка. Мы рахували силу свойой державы лем по економичной и индустриальной силі, а на силу объєдинения, организованности народа и розуміния фашизма мы не звертали увагы. И фашистскы державы знали то. Они знали, што американский народ не объєдиненный, не организованный для войны и не розуміє угрозы фашизма, потому што фашизм веде свободно подрывну роботу в Америкі, а американске правительство не звертат на то ниякой увагы, фашистска пята колонна веде открыто свою фашистску пропаганду против американской демократии и правительства, а тота демократия и правительство не має силы, ци не хоче боротися против внутренных врагов Америкы. То виділи фашистскы агрессоры, и на тоту слабость Америкы рахувала Япония коли нападала на нашу землю. Фашистскы державы виділи, што мы не готовы до войны, што у нас ніт армии, ніт довольно оружия, народ розъєдиненный и байдужный, а богатства в Америкі огромны, и фашистскы бандиты рахували добри поживитися. Свойой побіды над нами фашистскы бандиты были певны. Они так рахували, што им треба розбити лем Совітский Союз, а тогды Британска империя и Америка мушены будут поддатися, и фашистскы бандиты запануют над цілым світом и захватят всі його богатства.

Коли Япония нападала на Америку, то гитлеровска воєнна машина стояла 20 миль от сердца России, от Москвы. Гитлер запевнил японскых самурайов, што Красна Армии знищена и Москва буде взята 7-го декабря. И потому тот день выбрали японцы для нападу на Американску землю.

Лем сліпый не видит, лем фальшивый не признат, што судьба цілого світа-рішалася в 1941, и рішатся сейчас на Русском фронті. Єсли бы Совітский Союз был побіжденный гитлеровском Германном и єй фашистскыми союзниками, то над цілым світом запановал бы фашизм. То днеска признат каждый розумный, честный, культурный чоловік. То признал найбольший американский генерал — Дуглас Мекартур.

Тоту правду понял и наш великий Президент, Франклин Д. Рузвельт, — правду, што лем завдякы силі Совітского Союза и героизму Красной Армии удалося повздержати гитлеровску воєнну машину, и зыскати нам дорогий час для организации нашой индустрии и єй выробництва для войны, для мобилизации нашых сил.

Пишеме мы то при конці октября 1942 року, коли от часу нападу гитлеровской Германии на Совітский Союз минул як раз 16-й місяц. За час тых 16 місяцов против найбольшой милитарной силы, яку знає история світа, против гитлеровской Германии и єй фашистскых союзников — Италии, Румынии, Венгрии, Финляндии, Словакии, Хорватии — веде войну сам Совітский Союз, тогды як Англия и Америка все ище “наберают сил” для войны против гитлеровской Германии. За тых 16 місяцов нашы страты в войні з німцами рахуются в сотках, переважно в моряках торгового флота, и в торговых кораблях. Английскы страты в трирочной войні з німцами рахуются в тысячах людскых жить, тогды коли совітскы страты в людях рахуются в миллионах. За рок нашой войны з гитлеровском Германном нашы американскы войска не убили даже столько німецкых фашистов, як тоты два совітскы снайперы, котры гостили у нас в Америкі, тогды коли совітскы солдаты и партизаны убили або унешкодливили до десят миллионов німецкых фашистов.

Тот примір мы приводиме для того, абы нам было яснійше, што який огромный тягар войны несе за нас Совітский Союз, його народы, и сколько мы им завдячаме в той нашой вспольной войні против фашизма, против нашого вспольного врага.

Приятелі фашизма в Америкі шепчут нам, што Совітский Союз веде войну лем за себе, а не за нас, што наша задача в той войні обороняти Америку, а не Совітский Союз. Так само в Англии говорит лейди Астор и єй партия. Но то само говорит нам Гитлер и Геббельс. Американскому народу Гитлер каже, што Рузвельт кинул Америку в войну для спасения английской империи и большевизма, Англии каже, што она воює зато, штобы Америка запановала над світом, а Совітскому Союзу каже, што Англия и Америка будут вести войну до послідного русского солдата, што ниякого другого фронта против гитлеровской Германии они не открыют, потому што они хотят выграти войну кровью русского народа.

Из того ясно, што єсли у нас, ци в Англии находятся люде, котры повторяют гитлеровску пропаганду, то они приятелі фашизма и хотят побіды фашизма над свободолюбивыми народами и поневоления світа фашизмом.

Наша побіда над фашистскыми державами запевнена, но лем так, коли всі свободолюбивы народы будут объєдиненны в той войні и их руководства поведут нашы объєдиненны силы до борьбы для вспольной побіды. Но єсли союзникы будут класти головный тягар борьбы с фашизмом на одного свого союзника, мы програме або вспольну войну, або вспольный мир.

Раз Англия и Соєдиненны Штаты подписали взаимны договоры с Совітскым Союзом для вспольного ведения войны и для вспольного установления мира послі войны, то они обязаны выполняти тоты договоры в ведению войны против вспольного врага, бо раз дакотрый из союзников не выполнит своих зобовязань, то он не може требувати, штобы тот союзник выполнял договоры взглядом него.

Нашым руководителям в той войні треба все мати на памяти, што мы в войні с фашизмом, котрый собрал для войны всю подлость, нечистоту, темноту, коварство, віроломство, дикость, варварство, тьму — для побіды над людством, культуром, прогрессом, честьом, правдом. Як оружием фашизма єст подлость, так нашым оружием мусит быти честь. Як його оружием варварство, дикость, неправда, так нашым оружием должна быти культура, прогресс, правда, справедливость.

Руководителі Объєдиненных Народов должны найперше спроситися сами себе: “Ци мы хочеме правды и справедливости для всіх, ци нам росходится лем о свои кляссовы, империалистичны и расовы интересы?”

Єсли в той войні с фашизмом головны министры, генералы и взагалі руководителі Объєдиненных Народов думают больше о спасению своих классовых интересов, расовой высшости и панования над другыми, мы можеме програти нашу войну с фашизмом, а хотя бы и выграли войну жертвами другых, то програме мир. Штобы мы выграли войну с фашизмом, и мир послі войны, мы должны вести тоту войну с чистыми руками и с чистом совістьом, як ровны союзникы, не лем на папері, но в нашых сердцах и в нашых жертвах.



[BACK]