25-а Годовщина Русской Революции

25 октября (7-го ноября по новому стилю календаря), 1942-го року Советский Союз празднувал 25-у Годовщину Октябрьской социалистичной революции. 25 літ тому назад восставшы робочы, солдаты и матросы под руководством партии Ленина — Сталина скинули власть Керенского, т з. временного правительства, и проголосили власть Совітов.

Декретом совітскгоо правительства вся земля перешла на власность селянства, цілый маєток державы — земны и индустриальны богатства на власность народа, чым были зровнаны всі граждане державы. Коли до социалистичной революции в России панувала клясса людей богатых — поміщикы и капиталисты, то послі социалистичной революции так всі богатства державы, як и власть перешли в рукы народа, котрый управлят свойом державом и єй богатствами через выбраны совіты, народны рады. С того часу в той державі вышол на місце богача — чоловік трудящийся, роботник, як первый чоловік в державі.

Совітске народне правительство розвязало раз навсе и вопрос национальностей по революцийному так, што зровнало всі народы старой России. В царской Росии пануючым, т. з. держанвым народом был народ русский. Актом “Декларации прав народов России” — совітске правительство проголосило ровноправность всіх народов и их братство.

С того часу было написано за границами Совітского Союза тысячи томов книг о Русской социалистичной революции приятелями и врагами Совітского Союза. Приятелі виділи в Совітском Союзі успіхы, врагы лем зло. Народы по-за границы совітской державы читали єдны и другы книжки, єдну и другу прессу. Но враждебных книжок, враждебной прессы Совітскому Союзу было о много больше, враждебна литература росходилася в десятках миллионов, коли прихильна Русской революции и совітской державі лем в десятках тысяч. И нич дивного, што тоты десяткы миллионов мали больший вплыв на народны массы, як десяткы тысяч. Народны массы заграницом в огромном большинстві не розуміли Русской революции и новой народной державы.

Народным массам открыла очы на тоту державу, на єй успіхы послі социалистичной революции — аж теперішня война против фашизма. Война доказала о Совітском Союзі тоту правду, яку говорили и писали до войны о той державі немногы приятелі, именно, што завдякы революции и совітской власти тота держава стала сильном, народы Совітского Союза ровными, объєдиненными и патриотичными. Што под руководством революцийного совітского правительства народ той державы выбудувал велику индустрию, розробил земны богатства, взбогатіл свою державу, а через ню сам себе, бо то народна держава. Што в той державі розвиватся надзвычай наука, як в ниякой иншой державі світа, подносится культурный уровень народных масс, як в ниякой иншой державі.

Завдяки социалистичной революции и социалистичному господарству тота держава за 25 літ послі Октябрьской революции стала, так сильном, што она ставит опор найбольшой воєнной силі, яку знає история людства — гитлеровской воєнной машині, в котру вложены силы цілой Европы.

Народны массы світа смотрят на тоту великанску борьбу прогресса с фашистском тьмом и днеска аж видят правду на власны очы, правду о великой Русской революции и єй плодах для народов Совітского Союза.

Коли вы звідалися ненавистника и клеветника на Совітский Союз, што чом он интересуєся том державом, што она му робит злого, чом он єй ненавидит и клевече на ню? То он отповіл вам, што совітске правительство працує над тым, абы викликати коммунистичну революцию в цілом світі, и такым способом запанувати над цілым світом. Для той ціли они употребляли троцкистской теории, што в одной державі немож построити социализм, што для того треба світовой революции. А раз в одной державі немож построити социализм, то он не може быти построєнный в Совітском Союзі, и всьо то, што пишут о успіхах социалистичного господарства в Совітском Союзі — єст выдумком, неправдом. А правдом єст то, што в совітской державі панує господарський хаос, недовольство народа, розрух в индустрии и земледілии.

То было дуже легко говорити и найти такых, што вірили — до той войны. Операючись на той неправді воєнны експерты предповідали скорый розгром совітской армии гитлеровском воєнном машином, економичны експерты цілковитый розвал совітского господарства — промышленности, коммуникации, — и упадок совітского правительства.

Полтора рока войны той новой державы всьому тому заперечило.

Найперше упала раз навсе тота пропаганда против Совітского Союза, што он працує над світовом революциом, потому што совітскы руководителі лем так можут удержати социализм в России, коли он буде заведеный в цілом світі. Прогресс и сила той державы в войні против гитлеровской Германии и єй союзников доказали, што Совітскому Союзу непотребна світова социалистична революция, абы быти самому сильным, бо он сильный и без того, то значит, што и без світовой революции он построил у себе социализм, котрый оказался высшом системом господаства от капиталистичной системы. И што правдом єст то, што говорили руководителі Совітского Союза, што в их программі не стоит світова революция, а будова социалистичного господарства в свойой державі, розвитие социалистичной промышленности и социалистичного земледілия в свойой державі.

Но для того Совітскому Союзу потребный был мир. Єсли бы Совітский Союз мал обеспеченый мир ище на десят літ, то мы виділи бы го, як найбогатшу, найкультурнійшу и найсильнійшу державу світа, и тогды народы другых держав почали бы смотріти на СССР, як на примірну державу для себе, о Совітском Союзі говорили бы просты люде в каждой закутині світа и стремили бы до такого социалистичного господарства и у себе.

Того именно боялися управителі старого світа, и потому то они готовили войну против той державы, зачым она покончит свою будову.

Днеска, в 25-у годовщину Русской революции и рождения новой народной державы, всьо то нам выяснятся. В свою 25-у годовщину тота нова народна держава веде тяжку войну против фашизма, и наша держава, США, Великобритания и Китай, як и десяткы меньшых наций в союзі с том молодом социалистичном державом во вспольной нашой войні против фашизма. Но 25 рочна враждебна пропаганда против совітской державы оставила на нас страшны сліды недовірия, котре родило нещирость в нашой политикі по отношению к той державі. В союзных воєнных и политичных руководствах находится ище много противников Совітского Союза и много фальшивых його приятелей. Тоты люде меньше стараются тым, як нам побідити фашистску ось, а больше стараются, як ослабити як найбольше Совітский Союз.

Но и то стає ясным народным массам в 25-у годовщину Русской социалистичной революции, и тоты фальшивы люде упадут зо свойом фальшивом политиком, а Совітский Союз останеся послі той войны сильном и примірном народном державом на фундаменті, котрый поставила Октябрьска социалистична революция 25 літ тому назад.



[BACK]