Война народна против бандитской

22-го юня, 1941 року, в ночи зо субботы на неділю, Гитлер напал на мирный Совітский Союз, совсім несподівано, по-бандитскы, ночном годином, без ниякого объявления войны. Напал на тоту державу, с котром подписал 23 августа 1939 року договор о взаимном ненападении и приязни, на десять літ. И сам Гитлер предложил такий договор, сам просил о него, выслал свого министра заграничных діл в Москву за тым договором.

Правительство Совітского Союза подписало такий договор, потому што Совітский Союз держава народна, социалистична и она не хотіла войны, совітский народ хотіл мирно трудитися, розбудовувати дальше своє народне господарство, устроювати богаче своє мирне житя.

Совітскы руководителі учили народ, што война, то велике несчастье для народа, и учили ненавидіти войну, но разом с тым учили народ, што оборонна, народна война против империалистичной, бандитской войны, то священне діло. На таку войну каждый совітский гражданин должен быти готовый, каждый должен быти готовый жертвовати всім, и своим житьом за своє народне отечество, за свою свободу. Тогды як Гитлер и його нацистска партия учили німецкий народ о войні захватничой, бандитской, яко священной. Як совітска наука о войні выходила от той головной совітской наукы о ровности людей и народов, о мирном труді всіх людей для счастливого устройства и житя для всіх людей и народов — так нацистска наука о войні выходила из той головной гитлеровской наукы о завоюванию світа, о ограблению всіх другых народов світа и поневолению их німецком “высшом расом”.

И так, Гитлер напал на Совітский Союз с том бандитском моральом — поневоления и ограбления совітскых народов, захвата их земель и запанования над огромным Совітскым Союзом и 200 миллионами совітского населения. А Совітский Союз оборонятся з моральом свободы и ровности всіх рас, народов, трудящыхся людей для мирного, счастливого, братского сожитья на землі.

Як то пришло, што такы два правительства подписали договор о взаимном ненападении? Ци они вірили в свою приязнь, коли подписували тот договор о взаимной приязни?

Но, они в свою приязнь не вірили, и ниякой приязни меж ними не могло быти. Але Гитлеру потребный был такий договор найбольше для несподіваного нападу на Совітский Союз. А совітскому правительству был потребный такий договор для зыскания часу для ліпшого приготовления обороны. Но обі стороны знали уж в тот час, коли подписували договор “приязни”, што ниякой приязни меж ними не може быти и што война меж ними неуникнена. Совітскы руководителі знали людоідску науку и бандитску мораль гитлеризма, и в ниякы договоры з людоідами не вірили. Но они знали тоже, што западны демократии не способны на войну против гитлеризма, потому што они учили свои народы ненавидіти больше Совітский Союз, як гитлеровску Германию, што они продали свою демократию Гитлеру в Мюниху, и ниякой надежды на щирый союз с ними против гитлеризма не было. Совітский Союз много раз предлагал западным демократиям объєдинение против агрессоров — всьо надармо. Так што он мушеный был подготовляти оборону для отпору гитлеровской воєнной машині своими силами. Для того найбольше потребный был час. Совітско-німецкий договор дал Совітскому Союзу немного дорогого часу.

Заграничну политику Совітского Союза, його договор з Германиом, зрадливый напад Гитлера и початкы совітско-німецкой войны, як тоже перспективы той народной войны зо стороны Совітского Союза против бандитской войны зо стороны гитлеровской Германии характеризує нам найліпше исторична бесіда Сталина, Предсідателя Державного Комитета Обороны и Предсідателя Совіта Народных Комиссаров Совітского Союза, выголошена по-радио 3-го юля, 1941 р.


Исторична Бесіда Сталина

StalinConversations

“Товаришы! Граждане! Братья и сестры! Бойцы нашой армии и флота!

До вас звертаюся я, друзья мои!

Віроломне воєнне нападение гитлеровской Германии на нашу отчизну, начате 22 юня, — продолжатся. Несмотрячи на героичный опор Красной Армии, несмотрячи на то, што лучшы дивизии врага и лучшы части його авиации уже розбиты, враг продолжат лізти вперед, кидаючи на фронт новы силы.

Гитлеровскым войскам удалося захватити Литву, значну часть Латвии, западну часть Білоруссии, часть Западной Украины. Фашистска авиация росширят район дійствия своих бомберов, бомбардуючи Мурманск, Оршу, Могилев, Смоленск, Києв, Одессу, Севастополь.

Над нашом отчизном нависла серьозна опасность.

Як могло случитися, што наша славна Красна Армия отдала фашистскым войскам ряд нашых городов и районов? Ци направду німецкы фашистскы войска являются непобідимыми войсками, як о том трубят неустанно фашистскы хвастливы пропагандисты?

Розумієся, што ніт!

История показує, што непобідимой армии ніт и не бывало. Армию Наполеона считали непобідимом, но она была розбита поперемінно русскыми, английскыми и німецкыми войсками. Німецку армию Вильгельма в период первой империалистичной войны тоже считали непобідимом армиом, но она пару раз терпіла поражения от русскых и англо-французскых войск, и наконец была розбита англо-французскыми войсками.

То само треба сказати о нынішной німецко-фашистской армии Гитлера. Тота армия не встрічала ище серьозного опору на континенті Европы. Только на нашой территории встрітила она серьозный опор. И єсли в результаті того опору лучшы дивизии німецко-фашистской армии оказалися розгромлены нашом Красном Армиом, то тото значит, што гитлеровска фашистска армия также може быти розбита и буде розбита, як были розбиты армии Наполеона и Вильгельма.

Што тычится того, што часть нашой территории оказалася все же захваченом німецко-фашистскыми войсками, то то объяснятся головном тым, што война фашистской Германии против СССР началася при выгодных условиях для німецкых войск и невыгодных для совітскых войск. Діло в том, што войска Германии як державы, ведущой войну, были уже цілком мобилизованы и 170 дивизий, киненых Германиом против СССР и посуненых к границам СССР, находилися в полной готовности, ожидаючи лем сигнала для выступления, тогды як совітскым войскам треба было ище мобилизуватися и посунутися ку границам.

Немале значение мала ту и тота обставина, што фашистска Германия несподівано и віроломно нарушила пакт о ненападении, заключеный в 1939 року меж ней и СССР, не считаючись с тым, што она буде признана цілым світом державом нападаючом.

Понятно, што наша миролюбива держава, не желаючи брати на себе инициативу нарушения пакта, не могла стати на путь віроломства.

Можут спросити: як могло случитися, што совітске правительство пошло на заключение пакта о ненападении с такыми віроломными людьми и выродками, як Гитлер и Риббентроп? Ци не была ту зроблена зо стороны совітского правительства помылка? Розумієся, што ніт! Пакт о ненападении єст пакт о мирі меж двома державами. Именно такий пакт предложила нам Германия в 1939 року.

Ци могло совітске правительство отказатися от такого предложения? Я думаю, што ни одна миролюбива держава не може отказатися от мирного соглашения с сусідном державом, єсли на челі той державы стоят даже такы выродкы и людоіды, як Гитлер и Риббентроп. И то, розумієся, при одном непремінном условии — єсли мирне соглашение не нарушат ни прямо, ни посередно территориальной цілосности, независимости и чести миролюбивой державы. Як відомо, пакт о ненападении меж Германиом и СССР являтся именно такым пактом.

Што выграли мы, заключивши пакт о ненападении з Германиом? Мы обеспечили нашой краині мир на час полтора рока, возможность подготовкы своих сил для отпора, єсли фашистска Германия рискунула бы напасти на нашу державу мимо пакта. Тот опреділенный выигрыш для нас и проигрыш для фашистской Германии.

Што выграла и што програла фашистска Германия, віроломно розорвавши пакт и учинивши нападение на СССР?

Она добилася тым ліпшого положения для своих войск для даякого короткого часу, но она програла политично, роскрывши себе в очах цілого світа як кровавого агрессора.

Не може быти сомніния, што тот непродолжительный выигрыш для Германии являтся лем епизодом, а великий политичный выигрыш для СССР являтся серьозным фактором долгого часу, на основі котрого должны розвернутися рішительны воєнны успіхы Красной Армии в войні с фашистском Германиом.

Вот чом вся наша доблестна армия, весь наш доблестный воєнно-морский флот, всі нашы летчикы-соколы, всі народы нашой краины, всі лучшы люде Европы, Америкы и Азии, наконец, всі лучшы люде Германии — пятнуют віроломны дійствия германскых фашистов и сочувственно относятся к совітскому правительству, одобряют поведение совітского правительства и видят, што наше діло справедливе, што враг буде розбитый, што мы должны побідити.

В силу навязанной нам войны наша краина вступила в смертельну схватку зо своим найгоршым и коварным врагом — германскым фашизмом.

Нашы войска героично сражаются с врагом, вооруженным до зубов танками и авиациом.

Красна Армия и Красный Флот, перемагаючи многочисленны трудности, с самопосвятом бьются за кажду пядь совітской землі. В бой вступают головны силы Красной Армии, вооружены тысячами танков и самолетов. Храбрость воинов Красной Армии беспримірна. Наш отпор врагу кріпне и росте.

Разом с Красном Армиом на защиту отчизны встає весь совітский народ.

Што потребно для того, штобы ликвидувати опасность, нависшу над нашом отчизном, и якы міры треба предприняти для того, штобы розгромити врага?

Найперше конче потребно, штобы нашы люде, совітскы люде, поняли всю глубину опасности, котра грозит нашой краині и позбылися благодушия, беспечности, и настроєния мирного строительства, вполні понятных в довоєнны часы, но погубных в теперішний час, коли война цілковито змінила положение.

Враг безмилосердный и неублаганый. Он ставит за свою ціль захват нашых земель, полятых нашым потом, захват нашого хліба и нашой нафты, добытых нашым трудом. Он ставит за свою ціль привернение власти поміщиков (дідичов), привернение царизма, знищение национальной культуры и национальной державности русскых, украинцев, білоруссов, литовцев, латышей, естонцев, узбеков, татар, молдаван, грузин, армян, азербайджанцев и другых свободных народов Совітского Союза, их онімечувание, превернение в рабов німецкых князей и баронов.

Діло иде, такым способом, о жизни и смерти совітской державы, о жизни и смерти народов Совітского Союза, о том — быти народам Совітского Союза свободными або впасти в рабство.

Потребно, штобы совітскы люде поняли то и перестали быти бесстаростливыми, штобы они мобилизували себе и перестроили всю свою роботу на новый воєнный лад, не знаючий пощады врагу. Конче потребно, дальше, штобы в нашых рядах не было місца плаксам и боягузам, паникерам и дезертирам, штобы нашы люде не знали страху в борьбі и в самопосвяті шли на нашу отечественну освободительну войну против фашистскых поневолителей.

Великий Ленин, створивший нашу державу, говорил, што основном якостьом совітскых людей должны быти храбрость, отвага, незнание страха в борьбі, готовность битися разом з народом против врагов нашой отчизны.

Конче потребно, штобы тоты прикметы большевика стали достоянием миллионов, миллионов Красной Армии и нашого Красного Флота, и всіх народов Совітского Союза.

Мы должны дораз перестроити всю нашу роботу на воєнный лад, всьо подчинивши интересам фронта и задачам организации розгрома врага.

Народы Совітского Союза видят тепер, што германский фашизм неукротимый в свойой встеклой злобі и ненависти до нашой отчизны, обеспечившой всім трудящымся свободный труд и благобыт.

Народы Совітского Союза должны встати на защиту своих прав, свойой землі против врага. Красна Армия, Красный Флот и всі граждане Совітского Союза должны отстоювати кажду пядь совітской землі, битися до послідной каплі крови за нашы городы и села, проявляти смілость, инициативу и сметку, свойственны нашому народу.

Мы должны организувати всесторонну помоч Красной Армии, обеспечити усилене пополнение єй рядов, обеспечити єй заосмотрение всім потребным, организувати быстре передвижение транспортов с войсками и воєнными ладунками, обеспечити широку помоч раненым.

Мы должны укріпити тыл Красной Армии, подчинивши интересам того діла всю свою роботу, обеспечити усилену роботу всіх предприятий, вырабляти больше винтовок, кулеметов, орудий, патронов, гранатов, самолетов, организувати охрану заводов, електростанций, телефонной и телеграфной связи, наладити містну противвоздушну оборону.

Мы должны организувати беснощадну борьбу зо всякыми дезорганизаторами тыла, дезертирами, паникерами, поширителями слухов, уничтожати шпионов, диверсантов, вражых парашютистов, оказуючи во всьом том быстре содійствие нашым истребительным батальонам.

Треба знати, што враг коварный, хитрый, практичный в обмані и ширению ложных слухов. Треба розуміти всьо то и не поддаватися на провокации.

Треба дораз передавати суду воєнного трибунала всіх тых, кто своим паникерством и боягузством перешкаджат ділу обороны, без огляду на особы. При вынужденном отході частей Красной Армии треба угоняти весь рухомый желізнодорожный состав, не оставляти врагу ни одного паровоза, ни одного вагона, не оставляти противнику ни килограмма хліба, ни литра олію.

Колхозникы должны угоняти весь скот, хліб отдавали под опіку державным органам для вывозкы його в тыловы районы. Весь цінный маєток, в том числі барвны металлы, хліб и олій, котре не може быти вывезено, должно быти безусловно знищено.

В занятых врагом районах треба творити партизанскы отряды, конны и пішы, творити диверсийны группы для борьбы с частями вражой армии, для роспалювания партизанской войны всяди, для взрывов мостов, дорог, псутя телефонной и телеграфной связи, подпалювания лісов, складов, обозов.

В захваченых районах творити невыносимы условия для врага и всіх його помочников, преслідувати и нищити их на каждом кроку.

Войну с фашистском Германиом немож считати войном звычайном. Она являтся не лем войном меж двома армиями, она являтся разом с тым великом войном всего совітского народа против фашистско-німецкых войск.

Цільом той всенародной отечественной войны против фашистскых угнетателей являтся не лем ликвидация опасности, нависшой над нашом краином, но и помоч всім народам Европы, стонущым под игом германского фашизма.

В той освободительной войні мы не будеме одинокыми. В той великой войні мы будеме мати вірных союзников в особі народов Европы и Америкы, в том числі и в особі германского народа, поневоленого гитлеровскыми заправилами.

Наша война за свободу нашого отечества злієся з борьбом народов Европы и Америкы за их независимость, за демократичны свободы.

То буде єдиный фронт народов, стоячых за свободу, против поневоления и угрозы поневоления зо стороны фашистскых армий Гитлера.

В той связи историчне выступление премьера Великобритании Черчилля и помочы Совітскому Союзу и декларация правительства США о готовности оказати помоч нашой краині, котры можут вызвати лем чувство благодарности в сердцах народов Совітского Союза, являются вполні понятными и показательными.

Товаришы! Нашы силы неисчислимы. Зарозумівшийся враг должен буде скоро переконатися в том. Разом с Красном Армиом поднимаются многы тысячы робочых, колхозников и интеллигенции на войну з напавшым врагом, поднимутся многомиллионны массы нашого народа.

Трудящыся Москвы и Ленинграда уж приступили к створению многотысячного народного ополчения на поддержку Красной Армии. В каждом городі, котрому угрожат опасность нашествия врага, мы должны створити таке народне ополчение, подняти на борьбу всіх трудящыхся, штобы свойом грудьом защищати свою свободу, свою честь, свою отчизну в нашой отечественной войні з германскым фашизмом.

В цілях быстрой мобилизации всіх сил народов Совітского Союза для проведения отпора врагу, віроломно напавшому на нашу отчизну, утвореный Державный Комитет Обороны, в руках котрого тепер сосредочена вся полнота власти в державі.

Державный Комитет Обороны приступил к свойой роботі и призыват весь народ сплотитися вколо партии Ленина—Сталина, вколо совітского правительства для самопосвятной поддержкы Красной Армии, Красного Флота, для розгрома врага, для побіды.

Всі нашы силы — на поддержку нашой героичной Красной Армии, нашого славного Красного Флота! Всі силы народа — на розгром врага!

Вперед за нашу побіду!


ЧОМ ГИТЛЕР НЕ МОЖЕ ПОНЕВОЛИТИ
И НИКОЛИ НЕ ПОНЕВОЛИТ
СОВІТСКИЙ СОЮЗ

Американскы политикы, економисты и воєнны знатокы предсказували быстре завоювание Гитлером Совітского Союза. Тоту роботу Гитлер мал выполнити в шестьох неділях. Воєнны знатокы предсказували, што гитлеровска воєнна машина отнесе совершенну побіду над Красном Армиом в трьох первых неділях и в трьох первых неділях захватит индустриальны державны центры Совітского Союза — Москву, Ленинград, Донбасс. Києв мал быти захваченый первого тыждня германско-совітской войны. И то не были лем предсказания меньше больше нейтральных воєнных знатоков, то был и план гитлеровского генерального штаба.

На чом тоты предсказания воєнных знатоков и план гитлеровского генерального штаба были основаны? На страшной, небывалой в истории силі гитлеровской воєнной машины, котра змела сильными ударами всі другы армии с континента Европы в короткых терминах. Перва Чехословакия зо страху пред том машином поддала свою миллионну армию, вооружену тысячами такых самых машин, друга польска армия была розгромлена єдным сильным ударом лем малой части гитлеровской воєнной машины. Многомиллионна армия западных союзников, оперта на ославлену оборонну Линию Мажино, была розгромлена в штырьох неділях, даже не цілом половином германской воєнной машины, майже без страт з єй стороны.

Так што против Совітского Союза Гитлер мог кинути не лем всю свою німецку армию и воєнну машинерию, но всю воєнну машинерию и всю воєнну индустрию всей завоюваной ним Европы. Гитлер подвоил свою индустриальну и воєнну силу для завоювания Совітского Союза, собрал коло себе для такой войны своих вассалов — фашистску Италию, Румынию, Мадьярию, Финляндию. Для первого удара на Красну Армию Гитлер собрал понад 200 дивизий, то єст понад три миллионы найліпшого войска, з многыми тысячами машин. Для віроломного, несподіваного, бандитского удара, што давало му огромну перевагу. Бо хоц бы вы який моцный были, но єсли вы будете нападены своим сусідом, присягавшым вам фальшиво приязнь, зо-за угла, несподівано, то ваш фальшивый сусід уж тым самым має велику перевагу над вами в цілой дальшой биткі.

Як сказал Сталин, силы Совітского Союза не были мобилизованы для обороны, бо Совітский Союз не стоял в войні, и йому треба было мобилизувати свою армию тогды, коли неприятель віроломно вдерся в краину, розрушал з воздуха аеродромы и дорогы.

На нияку другу европейску державу Гитлер не напал так віроломно, несподівано и с цілом свойом силом, не напал так по-бандитскы, як на Совітский Союз. При такой выгоді для німецкой воєнной машины нич дивного, што так німецке командование, як и нейтральны знатокы могли предсказувати быстру побіду над Красном Армиом и завоювание Совітского Союза в шести неділях.

Но раз тота быстра німецка побіда над Совітскым Союзом не пришла, и непобідима до сего часу гитлеровска воєнна машина застряла на землях Совітского Союза, то то єст найліпший знак, што она там, в Совітском Союзі буде и знищена, бо из той гитлеровской машины выгоріло то, чым она побіждала, т. є. “блиц”. Красна Армия позбавила своим геройством німецку воєнну машину “блискавичности”, и змусила гитлеровску Германию до затяжной войны на восточном фронті. А притом задала єй такы страшны страты, што німецка воєнна машина стратила свою славу непобідимости.

Первы неділи бандитской войны гитлеровской Германии против Совітского Союза доказали, што совітска держава непобідима, єсли она была в силі знищити тот первый, найстрашнійший удар всей силы гитлеровской воєнной машины и задати єй такы страшны страты. В войні против Совітского Союза германска воєнна машина стратила уж коло половины свойой людской силы, той ліпшой, молодшой силы. Німецкы страты два раз большы от совітскых страт, тогды, як у Совітского Союза людской силы три раз больше. В пятом місяці войны Гитлер мушеный высылати на фронт стариков и инвалидов. Завдякы тым огромным стратам німецкы воякы тратят духа.

В чом сила гитлеровской Германии, а в чом сила Совітского Союза?

Сила гитлеровской Германии в воєнной машині, в захваченой индустрии всей западной Европы и невольничом труді всіх роботников западной Европы в той захваченой индустрии на гитлеровску воєнну машину, на невиданый воєнный механизм. Фашизм, як мы уж вспоминали, не цінит в войні, ани по-за войну чоловіка, а машину, головно воєнну машину. Фашисты упланували собі при помочы машины поневолити чоловіка. И як видиме, при помочы машины они поневолили всю Европу, всі европейскы народы и заставили их працувати на себе и на их воєнну машину для завоювания цілого світа и поневоления всего людства.

На пути стояла им лем нова, народна социалистична держава — Совітский Союз. Днес каждый зрящий чоловік повіст вам, што єсли бы Гитлеру удалося завоювати и поневолити Совітский Союз, он поневолил бы легко цілый світ. Так в Англии, як в Америкі пришли бы до власти фашисты, агенты Гитлера. Гитлер то розуміл, и потому ударил на Совітский Союз, яко найбольшу кріпость против фашизма.

В чом-же сила Совітского Союза? Найперше в том, што там в той державі найвысше цінят — не капитал, не машину — а чоловіка. У них єст и капитал, т. є. огромны богатства, и машины, но по их наукі, и их программі, так богатства як машины должны служити людям, всім людям, чоловічеству, а не чоловічество капиталу, машинам. Капитал и машина не можут служити єдиницам, а державі, всему єй населению для поправы його житя, для усчастливления людей, а не против них, для их поневоления.

В той самой наукі, в соцалистичном народном господарстві уж велика сила Совітского Союза, бо с того пришло до народного объєдинения на полю социальном.

Дальша сила Совітского Союза в национальной наукі о ровности рас, народов, людей всякых рас и народов, чым устранена была национальна незгода, расова нетерпимость. Так што сила Совітского Союза

1. в социалистичном народном господарстві.

2. в объєдинении совітского народа.

3. в правдиво народной, организованой не для агрессии, а для обороны свойой народной державы, Красной Армии.

4. в огромной территории Совітского Союза.

5. в народной або партизанской войні против наіздника.

Социалистичне народне господарство дало возможность Совітскому Союзу збудувати индустрию, без котрой оборона державы сегодня немыслима.

Объєдинение совітского народа не дало можности зрады даякой группы, пятой колонны, а дало огромну народну силу для земледілия, индустрии и всеобщой борьбы против наіздника. Не невольничу силу робочу, як в гитлеровской Германии, а свободну, воодушевлену. При невольничой робочой силі в Германии и поневоленых краях продуктивность робочых падат с каждым днем, тогды коли продуктивность свободных совітскых робочых росне с каждым днем.

Красна Армия, то не гитлеровска воєнна машина, не люде автоматы, а сознательны, зрящы народны бойцы, котры розуміют, за што они бьются. У Красной Армии ніт столько воєнных машин, што у гитлеровской армии, но красноармейцы не боятся машин, они уміют нищити гитлеровскы машины, их научили нищити. Красна Армия сознає, што она народна армия, што она має за своими плечами и за плечами дикого наіздника своих друзей, котры помагают єй всіми силами. Красна Армия розуміє, што всьо население великого Совітского Союза, так в свойом тылу, як и неприятельском тылу — за то само стоит, и в то само вірит, што и Красна Армия, чого не мож сказати о гитлеровской армии, котру ненавидит население всей Европы, где она мушена ходити.

Дальша сила Совітского Союза в огромной территории. Гитлер хвалится, што он захватил два раз такий обшар совітской территории, як была до войны ціла Германиня. Но он тоже признал, што тота территория го дусит, што на той территории он не нашол приятеля, лем “самы бестии”. То слова Гитлера. Што они значат? Што Гитлер не поневолил тых людей, што тоты люде на той захваченой территории нищат фашистов, нищат им их коммуникацию, што их не настрашиш так, як другых.

И то именно и сут тоты партизаны, о котрых мы так много читаме. Тысячы партизанскых отрядов, соткы тысяч вооруженых народных геройов находится в тылу гитлеровской армии и тоты люде ведут завзяту борьбу з німцами. Представити собі лем, сколько Гитлеру потребно войска для обсаджения той территории. И чым єй больше, тым больше войска потребно для обсаджения стратегичных пунктов, дорог, міст, а гдеж взяти войска, абы обсадити всі села, поля, лісы? Для того у Гитлера ніт войска, так што цілы околицы зо селами, всі лісы заняты партизанами.

lookouts

Так, Гитлер рахувал, што он знищит найперше Красну Армию, а потом зробит порядок с партизанами. Но вышло му так, што за Красном Армиом он загнался в глуб огромной державы — под Ленинград, Москву, над Дон — пятсот и больше миль за границы Совітского Союза, и Красну Армию не лем што не знищил, но знищил свою наполовину, а укріплена Красна Армия переходит в атаку. Тогды, як в тылу німецкого фронта в глубині Совітского Союза оперує совітска народна армия найбольшых геройов-партизан. Тогды, як поневолены гитлеровском Германиом народы подносят голову.

Так гитлеровска воєнна машина буде розгромлена и знищена.



[BACK]