То не первый раз напали дикуны на русску землю, пустошили єй, грабили и убивали население — стариков, жен и дітей, як робят тепер фашистскы дикуны. Не первый раз нашолся такий чоловік, котрый задумал опановати цілый світ и поневолити всі народы. Такы зарозумілы, горды люде уж были на світі в стародавны часы пред Христом и в християнскы часы, такы люде появляются и в часі русской истории. И вот што для нас дуже поучаюче в сегодняшний час, коли гитлеровскы орды наіхали на русску землю: што то не первый раз з запада и востока напали такы орды, под руководством войовников, котры мали за ціль, подобно Гитлеру, завоювати цілый світ и поневолити всі народы.

И так тым великым завоювателям из Востока, як и тым из Запада стояла на пути до завоювания світа Русска земля зо своим великым народом, где тоты великы завоювателі зо своими, здавалося непобідимыми ордами, находили свою могилу. Там, на той русской землі кончилися они и их планы завоювания світа. Там, на той великой русской землі приготовлена могила и Гитлеру и його фашистскым ордам из запада.

Вот нам пару приміров из русской истории:

Великий монгольский организатор и войовник Чингис-хан спочатку ХІІІ віка объєдинил монголо-татарскы племена в велику державу, организувал непобідиму на тоты часы армию, завоювал с том армиом майже цілу Азию и єден из його наслідников кинулся на Запад, на Европу. На пути в Европу стояла русска земля. Была она тогды поділена на удільны княжества, розорвана. Русски князі меж собом сварилися и билися на своих уділах, продавали єден другого и русску землю, свою вспольну отчизну и свой народ чужинцами на Западі и на Востокі. Дакотры продавалися и тым монголо-татарскым ханам. Зато нич дивного, што татарскым ханам удалося завоювати русску землю. Но не удалося им поневолити русский народ. Русский народ не переставал ни на хвильку боротися против наіздников на його землю, и потому татаре не сміли уж итти дальше на запад и завойовувати западну Европу, оставляючи за собом неподдавшийся, непоневоленый русский народ. Они розуміли, што тот народ не даст себе поневолити николи, и потому оставили му його князей, абы русскы князі зберали з народа дань, так штобы не выглядало тото монголо-татарске ярмо на чуже ярмо. Но русский народ не дал себе ошукати, а громил монголов, где лем появилися, хоц и против волі своих князей, и ослабил их так, што наконец и сами князі пошли з народом против поневолителей. В 1380 року на Куликовом полю над ріком Дон русский народ под руководством князя Дмитрия, прозванного с того часу Донскым, розгромил два раз численнійшу татарску армию. Татарска держава ище не розвалилася послі той битвы, ище собрали силу многолы, ище напали на Москву, но уж с того часу занехали мечту не лем о завоюванню світа, але и поневоленню русского народа. С того часу их держава почала слабнути и роскладатися, аж была знищена совсім русскым народом под руководством царя Ивана Грозного.

Сегодня из той грозной для цілого світа татарской державы осталася єдна невеличка Автономна Татарска совітска республика в Советском Союзі. Всі другы народы, поневоленні даколи татарскыми ханами, получили тепер свои державы, союзны и автономны республикы в великом Совітском Союзі свободных народов.

Такий был конец татарскым ханам на русской землі, котры поставили собі за ціль завоювание цілого світа и поневоление всіх народов.

Гитлер повідат німцам, што он начинат німецку роботу там, где покончили єй великы німецкы завоювателі 600 літ тому назад. Кого он має на мысли? Гитлер має на мысли німеицкых крестоносцев, католицкых монахов-рыцарей, котры вынищували прибалтийских славян и другы прибалтийскы народы. Огнем и мечом они завоювали сегодняшну Пруссию, вынищили народ Пруссии и насадили там німцов, завоювави Латвию, Естонию, часть тых народов вынищили, а на остальных наложили тяжке німецко ярмо. Сами поробилися князьями и баронами, городы заселили німецкыми "бюргерами", а сельский народ змушеный был працувати на німцов, як панщизняны хлопы.

Тоты німецкы псы-рыцари выбралися и на русску землю, на русскы свободны городы Псков и Новгород. Новгородцы запросили, яко свого воєнного руководителя, князя Александра Невского. Русский народ под його воєнным руководством розгромил німецкых псов-рыцарей на Чудском озері (Пейпус), на так званом Ледовом побоищу 1242 року. Огромна сила німецкых рыцарей, котры тогды считалися непобідимым войском в цілом світі, была знищена русскым оружием, храбростью русского воинства. С того часу німецкы псы-рыцари не выбералися воювати русскы землі и поневолювати русский народ.

Но они ище много десятков літ воювали и пустошили польску и литовску землю, аж спочатком ХѴ віка объєдиненны славяне — полякы, русскы, чехы — и литовцы розгромили их силу под Грюнвальдом, в Восточной Пруссии. Там была покончена дика робота німецкых псов-рыцарей около 600 літ тому назад объєдиненными силами славянскых и прибалтийскых народов. О той то дикой роботі думал Гитлер, коли заявил, што його ціль — продолжати тоту дику роботу — грабежа, убийства, опустошения, вынищувания славянскых и другых народов восточной Европы. Но конец тым німецкым псам фашистам не може быти инший, лем такий, який мали німецкы псы-рыцари на Ледовом побоищу и под Грюнвальдом.

По смерти Ивана Грозного настало т. з. “смутне время” на Руси. Правда, Иван Грозных оставил по собі двох сынов, но старший Федор был слабоумный, а молодший Дмитрий был убитый, так што покончилася династия Рюриковичей. Власть захватил боярин Борис Годунов. В часі його царствования погоршилося положение селян, почалися народны бунты, в краині три рокы єден за другым был неурожай. Наступил страшный голод.

В тот час в Польщі появился якобы сын Грозного, Димитрий, а може тоты, котры хотіли выкорыстати “смутне время” для завоювания России и поневоления русского народа, сами такого самозванца нашли. К тым людям належал найперше римский папа, котрый хотіл присоєдинити Россию ку свойой великой западно-европейской религийной католицкой империи. Польша в тот час была цілковито под вплывом папы, польска шляхта слухала римского папу, потому што папа через своих католицкых ксьондзов помагал польской шляхті держати панщизняных хлопов в страху и послушенстві. А тым самым Польша, єй король, єй правительство были на услугах римского папы.

И так, папа благословил выправу польской шляхты на схизматицку Россию коло авантурника самозванца Димитрия, котрый принял католицку віру.

Напад католицкой западной Европы на Россию спочатком ХѴІІ столітня был подобный до сегодняшного нападу фашистской западной Европы на социалистичный Совітский Союз. Коло организованой польской шляхетской армии собралися всякы авантурникы для грабежа и наживы. Ненаситны, пажерны сусіды рвали русску землю кусками, грабили, пустошили, вынищували население.

В 1610 року польске войско заняло Москву. Тогды аж русский народ забыл на свои домашны незгоды и объєдинившися под руководством великых патриотов, Кузьмы Минина, торговца мясом из Нижного Новгорода и князя Пожарского, прогнал шаранчу из Москвы и русской землі в 1612 року.

В тоты часы Польша была дуже сильна и велика держава, одна з найбольшых в Европі. Но с того часу, отколи польский король с польскыми панами по совіту и благословению римского папы порвалися на завоювание России и поневоление русского народа, Польша почала упадати. Вскорі послі польского наізда на Россию почали восставати украинцы, украинскы козакы против Польшы и вовязали Польшу в долголітню войну на Востокі, котра ослабила так польску державу в ХѴІІ віку, што в ХѴІІІ віку она перестала истнувати, яко независима держава. 

А тым часом русска держава взросла в великанску силу, розгромила Швецию, Турцию, найсильнійшы в тоты часы державы.

В ХѴІІ віку Швеция взросла в таку могучу державу, што пановала на цілом Балтийском морі, роспоряжалася в Германии, Польщі. Но Швеция хотіла роспоряжатися и в России, завоювати русску землю и поневолити русский народ.

Великий войовник Карл ХІІ, поровнуючий себе з Александром Македонскым, (котрый завоювал около 300 літ пред Христом цілый знаный тогды світ) — задумал завоювати Россию. Шведска армия уходила в тоты часы за непобідиму. Война стала ремеслом шведов. Карл зашол зо свойом непобідимом армиом с Польшы на Украину, где украинский гетман Мазепа обіцал му, што он разом с козаками и цілым украинскым народом перейде на сторону наіздника. Но ни козакы, ни украинский народ не перешли на сторону шведов, а объєдинилися всі их бити. Непобідима шведска армия была розгромлена Петром І под Полтавом и цілковито знищена. Шведский король Карл ХІІ, тот ославленый войовник, думаючий о завоюванню світа, біжал з Мазепом в Турцию, бо дорога в його Швецию была му отрізана.

Сегодня Швеция мала держава с 6 миллионами населения, а Россия, котру думала Швеция завоювати, выросла за два столітня в великий Совітский Союз с 200 миллионами населения.

Наполеон Бонапарт, французский император, признаный историом яко найбольший воєнный гений світа. Наполеон завоювал всю западну Европу, кромі Бритийскых островов. Но Англию спасло лем море. Але єсли Наполеону удалося бы отрізати Англию от світа, то она мушена была бы поддатися. Он заборонил всей поневоленой ним Европі торгувати з Англиом. Он требовал того и от России, но цар Александр отказал Наполеону.

Наполеон планувал тоже завоювати цілый світ. На дорозі стояла му Англия зо своим флотом, но он розуміл, што єсли завоює Россию, то Англию не оборонит єй флот, потому што она жила с торговлі, а раз не буде мати с кым торгувати, то мушена капитулювати, тым больше, што по завоюванню России мож буде взяти у Англии найбогатшу єй колонию — Индию.

Наполеон собрал всю завоювану ним западну Европу на войну против России, собрал таку численну армию, якой не знала до того часу история и 24 юня 1812 року с том великанском на тоты часы армиом из всіх языков переступил границы России.

Наполеон взял и Москву, но был мушеный покидати єй пред гнівом объєдиненного русского народа и русском природом. Вся його армия была знищена. И разом с тым пачался розвал його империи и освобождение поневоленых ним народов. Минуло сто літ и Франция, мечтавша о панованию над цілым світом, розвалилася за штыри неділи под ударами гитлеровской воєнной машины и была поділена на дві части: на часть оккуповану німцами и часть с немочным петеновскым правительством. Управителі той Франции лижут німецкым фашистам рукы, просят ласкы у бестий в людском тілі. Так низко упали потомкы Наполеона, котрый планувал завоювати цілый світ, но розбился разом зо своими планами о оборонну силу России и объєдиненный русский народ против наіздников. На другом місци поміщена история нашествия Наполеона на Россию.

Мы пережили тот час, што всі державы світа выробили план розбити Совітску Россию и поневолити освободившийся от власти поміщиков и капиталистов русский народ.

Вспомнийме Русску революцию, гражданску войну и интервенцию держав побідительниц в минувшой империалистичной бойні. Дванаст держав воювало против русского и другых народов Совітского Союза. У молодой народной державы не было спочатку ни армии, ни ниякой индустрии, на русской землі панувал голод и розруха, а тот народ побідил своих и чужых врагов, очистил от них свою землю и отпразднувал сего року 24-ту годовщину свойой народной совітской державы.

То нам говорит история русского народа. И из той истории мы довідуємеся, што наіздникы нападали на русску землю все в такий час, коли там была незгода, внутренна борьба. Татары напали в часах княжескых межиусобиц, німецкы псы-рыцари в часах татарского поневоления, польска шляхта в часах смутного времени, шведы забеспечалися у Мазепы украинскым бунтом, Наполеон рахувал на недовольство русского народа и русской армии царем, интервенты на гражданску войну. Но мимо того они всі перерахувалися, потому што они не знали русского народа. Они не знали того, што русский роботник и селянин, коли його отчизні грозит опасность поневоления чужым наіздником — объєдинятся и встає на оборону свойой землі.

Сегодняшный фашистский наіздник нашол объєдиненный против себе не лем русский народ, но всі народы великого Совітского Союза, котрых русский народ освободил от царизма и зровнал их зо собом национально и социально.

Совітский народ, показалося, объєдиненный сегодня так против гитлеризма, як ниякий народ в світі.

Так, Гитлер збудувал страшну воєнну машину не лем на средства самой Германии, но на средства всіх сильных світа, врагов народа. Он захватил всю индустрию, машинерию, вооружение западной Европы. Он кинул всю встеклу механизовану темноту против Совітского Союза. Но мы свято перекопаны, што на совітскых землях найде тоту гитлеровску механизовану темноту тота сама судьба, яка нашла другых, мнившых себе завоювателями світа.

Высадка матросов в тылу фашистов.