Было то в глубині далекой южной Африкы.

Над прекарсном долином Маботси быстро насувалася темна ноч. Яскраво блищали звізды на чорном небі. В селі негритянского племени бечуанов погасили огні. Жителі, утомлены денными роботами, заснули моцным сном. Близко хат в загородках з высокым плотом из колючой акации были коровы и овцы.

Затихло всьо в природі. Затихло житя в селах.

Раптом ночну тишину роздер рев льва, котрый приближался к одному из сел. Спочатку його рев короткий, урывистый, он поступово переходил в грозный рык, який потряс околицу, як гуркот грома. В отвіт розлягалися з разных сторон иншы голосы. То страшны звіры збералися на ночне полюваня.

Заметалися в загородах коровы и овцы, выдаючи жалостны звукы, побудилися в хатинах діти и почали плакати, дорослы тремтіли от страху, боялися высунути за двери.

Кровожадны розбойникы газдували на волі без ниякых перешкод. Могучыми скоками львы перескакували колючы плоты в 2—3 метры высокы и нападали на безборонных коров и овец. И такой в загороді пажерны звіры справляли свой ночный банкет, не боячися людей.

Нарано, нажерты звіры тихо зникли в лісных зарослях.

Так штоночы нападала на тото або друге село зграя львов, яка появилася в той або другой місцевости. Не встрічаючи отпору, львы сміло нападали ночами, мордуючи скот, а часами осмілювалися нападати и на людей, што выходили с хижин на помоч скотині.

Єдного разу лютый звір вдерся в хижину за негром, што утікал, и зажер го на очах збожеволілой жены, яка встигла сховатися з дітми под шкуру убитого звіра. Другым разом на очах матери лев схопил с хижины хлопця літ 12 и зажер го в корчах. Мати даремно голосила и кликала помочи, никто єй не допомог и не погнался за пажерным звіром. Беззащитны жителі часами днем устроювали вспольны облавы в зарослях. Але што они могли зробити без стрільб, лем зо старыми списами? Коли появилися львы, люде розбігалися на всі стороны и звіры зникали. Оставал им лем єден выход освободитися от страшных звіров — переселитися в иншу отдалену околицу.

Поблизко одного из сел жил молодый англичанин доктор Давид Ливингстон. Он купил кусок землі у начальника племени, побудувал будинок и почал жити в ньом с помочником Мебельве з бечуанов. Они засадили сад, завели школу, доктор лічил хворых, а Мебельве учил дітей.

Добрый доктор дуже жаліл бідных безпомочных жителей и задумал им помочи. Дознавшися, што львы покидали околицу, єсли там был убитый єден лев, он постановил з Мебельве идти на полюваня зо стрільбами и убити хотя бы одного звіра. 3 ними вибралися и негры.

Незадолго нашли сліды львов в гущавині среди горбов и оточили ліс, поступово съужаючи коло.

Раптом доктор замітил на скалі льва, але вистрілити не встиг. Мебельве выстрілил перше и не трафил, а звір зробил скок и зник в корчах. Бечуаны (негритянске племя) не отважилися напасти на него. Потом увиділи ище двох львов, але и они встигли скрытися, прорвавши ланцух полювачов, што розбігалися при появі грозных звіров. Послі той неудачы постановили вернути дому. Ливингстон, оминаючи вершины горба, увиділ великого льва кроков на тридцет на уламках скалы. Доктор старанно прицілил через корч и отразу выстрілил з обох люф.

Але звір не эвалился зо скалы, як убитый, и не присіл, як смертельно пораненый, а люто махал хвостом и готовился напасти на доктора, котрый заряжал стрільбу. В єден момент лев скочил на него и вчепился зубами в плечо. Страшно рычучи над самым ухом, он тряс свою жертву, потом кинул на землю и наступил лапом на голову.

Лежачи под львом, Ливингстон замітил, што на 15 кроков Мебельве цілит в звіра зо стрільбы. Але стрільба у него была стара, ище с кремньом, заміст-пистона. Рукы учителя тряслися зо страху. Он спустил курок — осічка, спустил другий — нова осічка.

Лев кинулся на Мебельве и впялся зубами в стегно. Тогды один храбрый бечуан напал на льва зо списом. Лев кинулся на него и схопил зубами за плечо. Але в тот сам момент он упал на землю без руху, от утраты крови. Обідві кулі доктора зробили своє.

Всьо сталося надзвычайно быстро. Величезный звір был пораненый майже смертельно, але боролся за своє житя и пред смертьом встиг покусати трьох людей.

У Ливингстона оказалося 11 ран, котры оставили рубцы на ціле його житя. Рука была поламана и зрослася не совсім правильно.

На слідуючий день бечуаны устроили бенкет коло трупа льва. Каждый старался добыти хоц малый кусок сердца, думаючи, што буде храбрійший, єсли зіст кусочок сердца льва.

Пострадавшы на полюваню поправилися от ран, а звіры перестали нападати и зникли з місцевости.

В тоты часы львы водилися во всей южной и центральной Африкі, але тепер в многых околицах они совсім вынищены колонистами. Прото єст місца, где они держатся до сего часу в зарослях на окраинах лісов и роблят ночны напады на травоідных животных, збераючися на таке ночне полюваня по 6 и больше штук.

Вожакы отшукуют в травах на ночовлі стада зебр, антилоп, жираф, буйволов и грозным ревом женут их на другых львов, што засіли в засаду. На буйвола нападают два и три львы, бо єден не порадит з буйволом.

На людей львы нападают рідко — лем як дуже голодны, стары, або в самообороні. Але раз засмаковавши людского мяса, левлюдоід стає смілым и нападат на людей даже дньом, вдератся в село.

Приміров такых нападов єст много.

В одной колонии лев загрыз пару негров. Одного разу из громады людей в 40 чоловік в день лев схопил носильника, а вечером листоноша. Через пару дней нахальный лев вдерся в хижину и схопил солдата. Товариш оборонил го горящом головньом. Через два лни лев догнал под самым селом старшину и загрыз го, потом напал на роботника, што сиділ коло ідла с товаришами. 

При будові Угандской желізкой дорогы в 1899 року, два львы людоіды навели панику на роботников индусов, знищивши за єден місяц двадцет осем землекопов. Индусы покидали роботу и повтікали в місто Момбас. Лем через три неділи они повернули, коли инженеры убили львов.