В Другом Року Империалистной Войны

Світ находится в другом року империалистичной войны. Всі предсказы и обрахункы, што война покончится в коротком часі, зышли нанич. Война поширюєся дальше по світу и стає затяжном. Конец войны, вмісто приближатися, — отдалюєся. Так нам здаєся. Минувшого року послі розгрома Польшы предказували скорый конец войны, а послі розгрома Франции конец войны уж виділи. Тепер, коли мы то пишеме, його совсім не видно.

Но зато мінятся скоро, несподівано, межнародне положение, бо оно зависит от зміны политичного положения в поодинокых воюючых державах. До половины сего року т. з. демократична Франция, одна из найбольшых держав світа, воювала в тісном союзі в Великом Британиом против Германии. Оказалося, што французской пануючой кляссі была выгоднійша поражка Франции, бо така поражка давала єй в рукы диктаторску власть над французскым народом и помоч гитлеровской воєнной машины против него. Потому французска пануюча клясса помогла Гитлеру в розгромі свойой отчизны. Того никто предвидіти не мог, што передовы державны люде можут пасти морально аж так низко, абы лем спасти свои привилегии и маєткы.

То єст доказ, што в каждой из воюючых держав ведеся внутренна, домова борьба меж пануючом кляссом и роботным народом, меж панучом нациом и поневоленными народами. И тота борьба внутри каждой воюючой державы заострюєся.

poliCart022

Гитлеровска Германия за минувший рок отнесла “великы побіды”, захватила много крайов и народов в Европі, уничтожила цілый ряд независимых держав. Но тым гитлеровска Германия не стала сильнійшом, а слабшом. Коли Германия вступала в войну, она была объєдинена внутренно при помочы гитлеровской пропаганды против Версальского мира, за справедливость для германского народа. Но коли германскы войска розлялися по западной и центральной Европі, по другых краях, поневолили другых народы, они взяли в свою державу десяткы миллионов ненавидящых неволю людей, европейскых, не колонияльных народов. Тоты народы борются за свою свободу всякыми средствами, якы лем мают в свойой роспорядимости, и ослабляют германску внутренну силу, єдность, розъідают єй. Своими захватами другых народов и их земель гитлеровска Германия не вскріпла, а ослабла внутренно и на фронті. Єй милитарна сила розлялася среди враждебных єй народов, котры єй розъідают.

И як легко было. Гитлеру относити побіды при помочы зрады пануючых клясс тых народов, так му тепер трудно приходит контролювати самы народы.

Ведеся внутренна борьба в огромной Бритийской империи. Ведеся внутренна борьба не лем меж пануючом и трудящомся кляссом, але и внутри самой пануючой кляссы, меж капитулянтами и сторонниками ведения войны до побіды над противником. Иде борьба в Бритийской империи и меж пануючом нациом и колонияльными народами. Трудно требувати англичанам лояльности от 350 миллионов индусов, народа, позбавленного всякых людскых прав на свойой родной землі английскым империализмом. В Индии иде завзята борьба за освобождение индусского народа от англо-саксонского владычества.

PoliCart023a

И чым дальше затягатся война, тым больше розгорятся тота внутренна борьба в воюючых державах. Покаль она ведеся тихо, подпольно, но кажду хвилю, с дальшым ослаблением воюючых держав, подпольна борьба може розгоритися в открыту гражданску войну.


За што ведеся война?

За што ведут войну Германия, Италия и Япония против Британской империи? Тоты державы ведут войну меж собом за новый переділ світа, за світовы богатства и рынкы для своих промышленных товаров. Така война называтся — империалистична война.

За што веде войну Китай против Японии? Китай, китайский народ ничого от Японии не хоче. Китай хотіл и хоче жити в мирі з Япониом. Но японскы империалисты хотят контролювати Китай и земны богатства китайского народа и потому напали на Китай. На том примірі японо-китайской войны найліпше мож розуміти, што то єст империалистична, несправедлива война, а што єст война народна, оборонительна, справедлива. Япония веде в Китаю агрессивну, империалистичну захватничу войну, за контролю земель и земных богатств Китая, коли Китай веде справедливу, оборонительну войну, войну за свою независимость, в обороні свойой державы.

Война меж великыми світовыми державами — меж Германиом, Италиом и Япониом з єдной стороны, а меж Великом Британиом и Франциом з другой — империалистична война, потому што она ведеся за новый переділ світа, земны богатства, копальні, колонии и рынкы збыта промышленных выробов тых держав. Англия и Франция, т. є. англо-французский капитал посідал и контролювал огромны світовы богатства и рынкы, тогды як германо-итало-японский капитал оставался при дуже скудных материалах для свойой промышленности и при скудных рынках для єй выробов. Дост вспомнути, што тоты три державы, заключившы меж собом агрессивный воєнный союз, осталися без свойой нафты, найвіжнійшого сегодня промышленного и воєнного материала. Отже, они связалися воєнным союзом для империалистичной войны, абы вспольными силами вырвати земны богатства и рынкы маючым державам, Англии и Франции.

PoliCart023b

Як знаме, Франция была розгромлена в первом року империалистичной войны, а з ньом разом малы европейскы державы, хотя великы колониально, Голландия и Бельгия. Но доступ во французскы, голландскы и бельгийскы колониальны богатства германо-итало-японскым империалистам закрытый сильным бритийскым морскым флотом и поставом сильного американского флота.

И як долго не буде розбитый або английский флот, або не будут захвачены Бритийскы островы, то єст сама Англия, мозг Британской империи, так долго германо-итало-японский блок не може говорити о побіді.


Затяжна война

Послі капитуляции Франции, завдякы зрады французской пануючой кляссы, здавалося, што скоро наступит така сама капитуляция Англии. И Гитлер был в том свято переконаный. Тото своє переконание он основувал на такой самой зраді части английской пануючой кляссы и на силі свого воздушного флота. Завело єдно и друге. Английскы лорды оказалися выше морально стоячы от французской буржуазии. Зрадников, капитулянтов усунули. Завели Гитлера и його воздушны атакы на Англию. Воздушны атакы не стерроризували английского народа. С часом английский воздушный флот, при помочы американской авиацийной промышленности так вскріп, што он почал наносити сильны удары по промышленных центрах самой Германии. Руководство воєнными дійствиями Англии нашлося в руках найзавзятійшого и самого гордого представителя английской пануючой кляссы, Черчилла, и як долго тото руководство буде находитися в його руках, о капитуляции Англии не може быти бесіды.

PoliCart024a
Німецкий рисунок

Треба предвидіти, што затяжна империалистична война втягне в воєнны дійствия и Америку. Уж сегодня ресурсы Америкы и єй индустрия на стороні Великой Британии. Так што мы уж сегодня можеме сказати, што против себе стоят два блокы — германо-итало-японский блок против англо-американского блока.


Сила противников

Спочатком войны Германия показала велику милитарну силу, найлучше организовану и механизовану воєнну машину. Но тота воєнна машина была будувана для короткой блискавичной войны, а не для затяжной войны. Руководителі гитлеровской Германии были увірены, што до єдного року война буде покончена. Старанно была подготовлена зрада, пята колонна во всіх противогерманскых европейскых державах. Германска воєнна машина занимала край за крайом, обошла французску оборонну линию Мажино и розгромила Францию. Но Англия, под руководством Черчилла, оперлася германской воєнной машині, передержала кризис, так што война вступила в другий рок, то єст в период затяжной войны, дуже невыгодной для германо-итало-японского блока. В затяжной войні, в войні на вычерпание, головну ролю грают ресурсы, воєнны материалы и индустриальна сила. Англо-саксонский блок далеко богатший в воєнны ресурсы и во всякы промышленны и земледільскы материалы от германо-итало-японского блока, и сильнійший индустриально.

PoliCart024b
Английский рисунок

Германска воєнна машина была будувана из английскых и американскых воєнных материалов, бо была обрахована на войну против Совітского Союза. Тоже Муссолини будувал свою воєнну машину из заграничных материалов. Што тычится японской воєнной машины, то мы всі знаме, што она не истнувала бы без американскых желіза и нафты. Без американскых воєнных материалов Япония не была бы способна вести трирочну войну в Китаю.

И єсли бы тота война опералася лем на воєнной силі, то єст, єсли бы она не крыла в собі революцийных елементов, о котрых мы вспоминали на початку, то по материальной силі затяжну империалистичну войну должен “выграти” англо-саксонский блок.

Но діло в том, што “побіда” над германо-итало-японскым блоком не єст побіда в старом смыслі побіды над противником. Побіда в старом смыслі означала для побідителя новы богатства от побіжденного, яко отшкодование, покрытие коштов войны. Такого отшкодования для покрытия коштов войны немож взяти от германо-итало-японского блока, бо ніт што з них взяти, они ничого не мают, кромі того, што захватили в той войні. А они и притом, што захватили уже, при старой капиталистичной економии истнувати не можут. Они не можут истнувати економично в империалистично-капиталистичном світі без новых земных богатств для свойой промышленности и новых світовых рынков для товаров.

PoliCart025a
Спасают свою найдорожшу отчизну

Та бо не лем Германии, Италии и Японии бракує земных богатств и світовых рынков для економичного истнувания при старой економичной системі, тых земных богатств и світовых рынков замало уж для посідаючых тоты богатства и рынкы, для Великой Британии и Соєдиненных Штатов. Ни Англия ни США не можут уж при старой економичной системі дати всім своим гражданам в часі мира роботу и житя. А то значит, што для них самых мало світовых рынков, бо єсли было бы где продати с профитом выробы промышленности, то безроботя не было бы.

Война обідніє ище больше народны массы світа, так што продати буде мож ище меньше. И єсли тепер за час войны роботникы працуют на войну, то єст на уничтожение богатства, доробку, то послі империалистичной войны грозит робочой кляссі страшне безроботя и нужда, не лем в “побіжденных” державах, але и “побідоносных”. Мы не забыли, што минувша война принесла безроботя и нужду не лем в Германии, но и в державах побідительницах, в США и Англии. Теперішня война доведе ище до страшнійшого економичного положения народны массы воюючых держав.


Голод

Уж спочатком другого року войны в блокованой западной и центральной Европі панує голод. Западна Европа не може выживитися своим хлібом, и в часі мирном она получала хліб из-за моря за свои промышленны выробы. В часі войны западно-европейскы краи не всилі продукувати и столько хліба, што в часі мирном, а война пожерат хліба о много больше, як мирный час. Найліпшы людскы продуктивны силы єдны запряжены в воєнну машину на фронті або мобилизованы в поготові, другы працуют на войну, в воєнной промышленности, котра не продукує для людского ужитку. Ужиточно трудятся лем найслабшы, найменьше продуктивны людскы силы и стара машинерия. А из тых ужиточных продуктов для житя лем найгорша часть остаєся для ужитку народа, для його житя, всьо што ліпше пожерат воєнна машина.

PoliCart025b
Косари

Коли в минувшу империалистичну войну, до котрой приступали европейскы державы лучше заосмотрены в поживу, голод в Европі отчувался аж в третьом и четвертом року войны, то в часі теперішной войны в другом року голодує уж вся западна и центральна Европа. Уж сама война почалася разом с картками на поживу.

Голод, недоідание несе зо собом и разны хвороты, котры уж поширюются в западной и центральной Европі. Спочатком другого року войны почала ширитися епидемия тифа в Польші, в Словакии, перекинулася в Чехию и Германию.

Наближаючася зима буде страшна для европейскых народов.



[BACK]