Талергофы — “Лемканя с Тылича”
Як ся война в нас почала
З Изб нам пришло писмо:
Плаче сестра, што єй мужа
Вывели за місто. . .

И другых невинных селян
З ним арештували —
Покули их, били тяжко,
В Талергоф погнали.

И оттамаль швагер Василь
Николи не вышол —
Яка його смерть там была
Никто не написал. . .

И найліпшы нашы люде
Так попропадали —
За свой бідный русский народ
Жертвою упали. . .

И знов в краю Талергофы,
Який был тот старый,
Ставят для нас польскы паны,
А другы мадьяре. . .

Як же мы ту в Америкі
Не можеме чути?
С краю братя помоч просят,
Даме им гинути. . .

Поставме мы сами себе
На их місце в краю —
Страшны мукы там страдают,
Боже нас заваруй!

Мучат тяжко, убивают,
Братя слезы ліют —
Бют воякы нашых родных,
Што аж з болю мліют!

Братя Лемкы, добры люде,
Грішно так чекати
И свой народ дати панам
Весь вымордувати!

Протестуйме! Жертву зложме
Для борьбы за волю
Отрийме слезы сиротам,
Поправме их долю.

Два доляры посылаю
Для тых, што страдают.
Най пошлют всі, сестры-братя,
Што можут и мают.

Лемканя с Тылича.


[BACK]