Давный Свидник и Жителі Його — Александр Павлович
АЛЕКСАНДР ПАВЛОВИЧ

В Шаришиской столиці мы
Два Свидникы маме,
Єден вышним, а другий
Нижним называме.

Нижний Свидник и старым
Звыкли називати,
Бо там в нижнем Свиднику
Была церков мати.

Где панска загорода
Там стояла фара,
Недалеко от фары
Была церков стара.

Забаглося Сирмаим
Каштель мурувати,
Розказали оттале
Фару гет прятати.

И газдом розказали
Хижы розваляти,
А зачали графове
Каштель мурувати

Зачалися графове
В Свиднику ширити,
А розказали стару
Церков розбурити.

Деревину церковцу
Спрятати казали,
На страні мурувати
Нову помагали.

Свидницке ціле панство
Графове продали,
Пречь одышли, а люде
В Свиднику остали.

При Свидниках сходятся
Яркы и потокы,
По дождях тоты рікы
Широкы, глубокы.

Высше Свидников тече
Вода с Капишовы,
А с том сходится друга
Из Ладомировы.

Тепер уж разом плынут
По межи Свидникы,
Ту робят многоразы
Шкоды превеликы.

Тепер ріка, свидницкий
Хотар розлучує,
Старый як-так, молодый
Бодай як газдує.

Понижей двох Свидников
Там Ондава плыне,
А в той свидницкой воді
Назвиско уж гине.

Уж єй Ондавов вшиткы
Люде называют,
Рыбаре в ней многораз.
Рыбы наимают.

Русскы люде в обидвох
Свидниках бывают,
Природным русскым словом
Бога прославяют.

На свидницкых хотарях
Мало росне травы,
Не мают Свидничане
Сіна ни отавы.

В літі не єсть што пасти,
В зимі чым кормити,
Со слабым статком тяжко
Хотар обробити.

Ах не мож у Свидниках
Теля приховати,
Не єсть, не єсть откале
Крайцар на соль взяти.

Ах ніт молока, масла,
Сыра ни жентицы,
Псота нам бідным жити
Ту на Маковици.

*     *     *
Вышний Свидник варошом
Люде называют,
В Свиднику пять ярмакы
До рока бывают.

Ярмакы Свидничанам
Псоты задавают,
През ярмак нич не робят.
Ходят, попивают.

Кебы свидницкы жены
Хліб печи хотіли,
На ярмаку они бы
Дашто заробили.

Кебы мяса напекли,
Кашы наварили,
Вдячно бы им фурмане
Зато заплатили.

За роботу они бы
Страву осолили,
И галушкы може бы
Собі помастили.

Стропковяне в Свиднику
Грошы заробляют.
А Свидничане собі
Нич не выгадают.

Лиха на них одежда,
О діти не дбают,
Бо во Свиднику люде,
Лем козы тримают.

Кебы овцы тримали,
Ліпше бы робили,
Бо бы ся с овечов
Вовнов приоділи.

А мали бы от овец
Бриндзы и жентицы,
А с вовны теплы чугы,
Гуні, рукавицы.

Овчий гной барз поправят
По горах хотары,
Прото панове всяды
Ставляют кошары.

Прото всяды уроды
Они красны мают,
И за дорогы грошы
Волну продавают.

Бідны люде тримают,
Лем тоты козиска,
Бо не мают про овцы,
Свойого паствиска.

Вышньосвидницкых газдов
Буду рахувати,
От першого нумера
Я мушу зачати.

Там под першым нумером
Єст мурованица,
Мурувати єй дала
Шаришска столица.

В муруваной хижи
Честный газда сидит,
А во вшитком порядок,
Чистоту рад видит.

Ціле обыстя красне,
Таке як курия,
Мы за то похвалити
Мусиме Андрия.

С першов женов тот газда
Не мал жадны діти,
А як жена померла,
Мусілся женити.

Умерла стара жена,
Взял собі молодшу;
Андрей вздыхат, споминат
Женичку усопшу.

Шкода небоженькы,
Превелика шкода,
Якоси ся не подабат
Старому молода.

Перед тым жил терезбо,
Тепер зачал пити,
А зато Андрея мы
Мусіли ганити.

Он честным чловеком был
И честным остане,
Кедь збиточно паленку
Пити перестане.

Ноле, ноле Андрею
Собі роздумайте!
Вам барз шкодит паленка,
Та єй покой дайте.

А под другым нумером
Жиют небожатка,
Ваньо с Марьом тулятся,
Бідны сиротятка.

*     *     *
Там под третім нумером
Газда з Капишовы,
Най Господь Бог поможе
Мамі и няньови.

Барз тяжко им приходит
Діточкы ховати,
О Господи Боже рачь
Йому помагати.

В його обыстю отчим
Добри знат ковати,
Але мабыти не знат
Грошы откладати.

Под четвертым нумером
Двоє небожатка,
Працуют так як можут,
Ховают телятка.

Нестарайся Яцуро
Же маш дробны діти,
Господь Бог допоможе
Діти приодіти.

Пятый нумер той хижи,
Што стоит на рогу,
Я жалую газдову
Женичку небогу.

Она бідна, хорлява,
Тяжко єй робити.
Но уж ся дочекали
Працовитых діти.

Осиф до газдовства мат
Дост свого розума,
Он не просит порады
От свойого кума.

Же он дост розума мат
И люде признали,
Бо за рыхтаря його
В Свиднику выбрали.

Осифови рыхтарство
Небарз поплужило,
Он як рыхтарь напился,
Газдовство халіло.

А пак Осиф неборак
Мусіл бирошити,
Несчастливо бирошил,
Мусіл охабити.

Уж нияк Осиф собі
Не мог рады дати,
Та пошол на долній край
Грошы зарабляти.

*     *     *
А хоц заробил долов
Може и сто златы,
Як их вынюс, та мусіл
Дораз их выдати.

Тяжко претяжко было
Осифови жити,
Голодували його
Небожатка діти.

Осиф в зуфаливости
Уж барз начал пити,
А во свойом пьянстві
Вшелияк робити.

Сестра и швогор йому
Помочи хотіли,
Про Осифа бычата
С выховку купили.

Про Осифа заробку
Того было мало,
Бо гарлиско барз дуже
Напою жадало.

Осиф опамятался,
И перестал пити
А с волми барз счастливо
Он зачал купчити.

Людям грошы повертал
Тепер честно жиє,
Цалком перемінился
Отколи не пиє.



[BACK]