Земля и Хліб

Долго-долго — соткы літ наш народ в Карпатах бідувал без земли и хліба, переживал тяжкы голодны рокы, котры были причином разных епидемий. Уж за нашых отцов памяти нужда, по причині перенаселения, запричинила епидемию холеры. Тиф (глушка) звычайне явление в Карпатах, он николи не отходил из нашых сел.

И нич дивного, што коли открыли емипрацию в Америку, половина карпаторусского народа выселилася за море, в Америку, за короткий час, покаль иммиграция в Америку не была закрыта.

Послі закрытия иммиграции в Америку наш народ в Карпатах знов был выставленый на голодову смерть. Панске польске, або т. з. аграрне чехословацке правительства ани не думали о даякой помочы карпаторусскому народу, ани не подумали о том, штобы открыти в Карпатском краю даякы промышленны предприятия, абы дати нашому народу даякий заробок, абы он мог жити. Им совсім не росходилося о тото, абы дати народу житя, а лем о то, абы выссати з него послідны житьовы сокы непосильныма податками.

В послідных роках дошло уж до такой нужды на карпаторусскых селах, што молоды хлопцы и дівчата пускалися по жебраню в промышленны центры тых панскых держав. То свідчит найліпше о той страшной нужді, яка запанувала в Карпатах.

Но она, тота нужда нашых братов в Карпатах уж кончилася, кончилася раз навсе, с том хвильом, коли нашы восточны братя стали в Карпатах.

Коли мы то пишеме, Карпатска Русь з Лемковином находится ище поза демаркацийну линию, поза границы Совітского Союза. Розумієся, што мы переконаны, што всі русскы землі будут присоєдинены до Совітского Союза, меж ними вся русска территория за Сяном и Ужом, по Дунаец и Попрад. Но справа земли и хліба для всего нашого народа уж рішена с тым моментом, коли Совітска армия стала в Карпатах, над Сяном. Бо то уж значит, што о дальшой судьбі нашого народа в Карпатах никто инший рішати не буде, лем он сам зо своими восточными братами. До сего часу о судьбі нашого народа рішали великы центральны европейскы державы, Австро-Венгрия и Германия, або западны великы державы — Англия и Франция. До минувшой світовой империалистичной войны рішали о нашом народі Австро-Венгрия и Германия, послі той войны Англия и Франция. Они роспоряжали дольом нашого родного краю и народа, они розділили наш край меж панску Польшу и буржуазну Чехосл., котрым наказали, абы не допустили до ниякой связи меж нашым народом и його братами на Востоку, и єсли не дается из карпаторусского народа зробити врага Совітского Союза, то истребити го, вынародовити, выморити голодом.

Перестала сущестоати Польша и Чехословакия, яко агенты западных держав против СССР. По них осталися народы — польский, чешский и словацкий, котры тепер уж видят, што они были ганебно ошуканы западными державами и своими пануючыми классами, што они не были самостоятельны, не вели свойой народной политикы, што они были лем орудием в руках западных империалистов против Совітского Союза и його освободившихся раз навсе от западных империалистов — народов.

Осталися и мы, карпаторуссы, вірны свойой истории и свойой народности и дочекалися тых часов, што уж никто другий не буде рішати о дальшой будучности нашого краю и народа, лем сам наш народ в краю с нашыми восточными братами, котры уж стоят в Карпатах.

А земля и хліб для нас уж обеспечены. За цілый час нашого житя в Карпатах на Западі была така сила, котра могла не пустити наш народ на Восток, на богаты землі Туркестана, Сибири, Дального Востока. На нашых очах, за нашого житя, тота сила пропала. Пропала панска Польша. Нашы братя из Востока пришли к нам в Карпаты и подали нам братску руку, а притом открыли нам дорогу на свои богаты землі на Востоку. И никто уж не може задержати от переселения безземельных и малоземельных нашых братов в Карпатах на богаты землі Востока. Наш народ в Карпатах спасеный от голодовой смерти. Открыта пред ним дорога до радостной, счастливой будучности, бо открыта пред ним богата земля, котра дає за людский труд богаты урожаи хліба.

Земледілие на тых богатых восточных землях индустриализоване, механизоване, до роботы на землі запряжена модерна техника, нова земледільска машина, яку лем мог придумати людский мозг в найновшы часы. На службу земледільскому труду поставлена найновша земледільска наука. Розумієся, што при такой помочы, земледільский труд приятный и радостный, бо он обеспечує богату заплату, богаты урожаи. А нич земледільца так не радує, як богатый урожай, богата заплата за його труд.

Всьо то стало возможным досягнути лем через коллективне земледілие, коллективне сельске господарство-хозяйство — колхозы, в котрых земля належит до села, до єдного сельского кооператива и управлятся вспольными силами всіх членов колхоза. Земля села стала великым земельным заводом хліба и другых земледільскых продуктов, а властителями того земельного хлібного завода, хлібной фабрикы — селяне колхозникы, на вічны часы.

На другом місті приводиме интересну корреспонденцию из Алтайского краю, юго-западной Сибири, где описаны огромны земельны богатства того краю, откаль пишут колхозникы и просят из запада робочых рук, для умножения урожайов.

Так, мы слышали о Сибири, яко о забытом диком, зимном краю. А тепер мы читаме о великых богатствах той недавно забытой Сибири, о индустрии, о индустриальном земледілии, о механизации и електрификации земледелия, о нечувано богатых урожаях хліба, цукровых бураков, льну, конопли, овочей. Всьо, чого тому богатому краю бракує, то — населения, колонистов, робочых рук. Колхозникы просят своих братов из европейской России приходити к ним, обіцуючи им новы домы для каждой фамилии зо всім домовым устройством и личным домовым господарством. Но и в европейской России замало свободных робочых рук, абы хотя частично дати робочу помоч сибирскым колхозникам. Сибир, то так великий и богатый край, где може жити соткы миллионов населения, то край больше, як два разы больший от США., а и своими земными богатствами не уступує США., лем што до населения, то тот край дуже слабо заселеный.

Тот край буде открытый нашому народу из Карпат, голодному земли и хліба. Там нашы братя найдут довольно земли и хліба, там их честный труд буде оплачатися сторицом.

Діло емиграции нашого народа из Карпат на Восток, на його богаты землі, рішено уж тым, што Красна армия стала в Карпатах. Она открыла нашому народу дорогу на Восток, котра была віками закрыта западными империалистами. Они диктували нашому народу свою политику, котра была лем єдна: Абы отрізати наш народ от Востока, абы му закрыт двери на Восток, абы го обернути во врага своих восточных братов, а коли то не удастся, то совсім знищити национально и економично, выморит голодом.

Тота империалистична политика западных империалистов на нашой Родной Землі скраховала в том моменті, коли нашы восточны родны братья стали в Карпатах, штобы подати братску руку своим віками поневоленым родным братьям и открыти им путь до землі и хліба.



[BACK]