Иван Яцош
Материнский Язык — Иван Яцош

Дорогы читателі, кто з вас уж походил по світі, то знає, што то значит материнский язык. Здаєся, што нема лучшого приятеля, як свой родный язык, котрым начала говорити до нас наша мама. Тот язык для нас найсолодший, бо тот материнский язык каждый з нас выссал з груди свойой матери разом з єй солодкым молоком.

И зато, коли чоловік в чужом краю зыйдеся зо своим краяном и тот заговорит до него материнскым языком, то му здаєся, што тот його родный язык солодший от меду. Але лем так, коли тот чоловік говорит правду, з любовью, то каждого сердце чувствує велику радость и утіху. Но коли чоловік говорит обман, хоче другого окламати и ошукати с тым його родным языком, то отразу перемінится солодкость на горькость. Який был солодкий, такий стал горький, яку мал чоловік радость, таку має злость, жаль, ненависть. Бо як чоловіка ошукає чужинец, то чоловік не має такий жаль и злость, як кед го ошукає його родный отец, мама, брат, сестра.

Здаєся, што уж было дост написано в газеті “Лемко” и календарях Лемко-Союза за наш родный Карапаторусский язык. Але не зашкодит повторити, што было написано нашыма писателями, котры клали на папер свои думкы и порады для свого ближнього, свою силу, труд, грошы, абы помочи свому брату в його тяжком положению. Хоц наразі не богато достане наукы из дописов из газеты “Лемко”, але позднійше, як приде час на него, то му приде до головы правда.

Дуже жаль, што не можу всі свои мысли положити на папер, бо ище не пришол час. Але, здаєся, што он уж недалеко. Но штобы вас повідомити, по якой причині не можу положити свои мысли на папер, то єдна з них тота, што не всі нашы читателі можут уживати твердого и сухого покарму. А друге, нашы коничата ище заслабы, не можут тягати великого тягару, бо мы ище не збудували дорогу, абы великий тягар можно было тягати. Але третя, головна причина, што газета “Лемко” и наша книжка мусит идти через чужинецкий мост. И длятого я не можу положити цілый тот тягар, котрый я маю на свойом сердці, бо приде тот тягар на чужий мост и они тот тягар не пустят, бо им поламе мост. А то дописи в “Лемку”, котры ламлют такы сильны мосты, што неможливо пустити через них такий товар. А тым тяжкым товаром, то роботнича кривда и кривда нашого карпаторусского народа, и ошуканство, кламство, зрада Юдашов.

Дорогы и любы нашы братя и сестры, гет там далеко за морем, за великым океаном, не тратте надію, што уж всьому пришол конец, бо нема такого злого, абы в нем не было дачого доброго.

Читам я канадску английску газету “Торонто Стар” с 31 октобра 1938 року. Пише єдну допис єден лорд из Лондона. Пише он, предповідат, што Англия роспадеся, а славянский народ и монгольский будут контролювати світ. И што Германия тоже роспадеся, бо фашистска программа веде Германию до пропасти. А славянский народ соєдинится и никто не буде в силі славян розбити, бо то велика сила и дуже скоро множится. Подає примір, што в капиталистичных краях рождение дітей падат. У англичан на 1000 людей родится рочно 153 дітей, у французов 150 дітей, а в России на тысяч людей родится 318 дітей рочно. Каже, што за 100 літ Англия буде мати 5 миллионов народа, як так дальше раждаємость буде упадати, а Россия за 50 літ буде мати 300 миллионов населения. Каже, што в России за рок причинилося три и пол миллиона населения. Там 30 процент меньше умерают, а 35 процент долше жиют. Пише, што задал вопрос 6-ом профессорам университета в Лондоні, што яка єст тому причина, што западны народы упадают, а в России число населения росне. Та єден профессор отповіл, што во Франции народ (буржуазия) провадит роскошне житя, другий, што хотят мати высший уровень житя, а ище инший, што ту люде хотят высоке образование, а такы люде не хотят плодити дітей.

Разно крутят о той справі, а правду не хотят сказати, што тому причина, а оно тота причина, што народ там працує и жиє, розвиватся, будує нове житя. Родичы не боятся родити дітей, бо знают, што діти их будут мати державну опіку, школу, науку и роботу от державы, што их діти уж родятся властителями той державы, в котрой родятся.

Дальше пише тот лорд, што упадок английской империи почался в тоту годину, коли Чемберлен полетіл ку Гитлеру, где запродал славянский народ германскому фашизму, а то великий народ, бо выше 200 миллионов народа говорит славянскым языком. Чемберлен сказал, што нема причины идти до войны за Чехословакию, бо судетскым німцам належится свобода, бо то єден народ и єден язык, то им належится въєдно быти, они мают право голосувати, с кым хотят быти. Но и се дуже красиве слово. До войны идти, то бы была велика дурница. Але што принесе тото слово в будучности, то каждый мусит чекати и здогадуватися сам. Ци то лем германцам належится свобода национальна, а другий народ не має уж ниякой вартости? Што на тото скажут другы народы?

Недавно я читал в газеті, што пише єден чоловік, котрый был в Индии, як там люде жиют. Их житя не вартат житя. Пише, што там єден вице-рой, великий магнат и такий богач, што посідат палату и огород, так лем сама тота палата з огородом має вартости сто миллионов долларов. А люде працуют там за 5 центов на день, по 12 годин. И яка там експлоатация, то страшно подумати.

Но а ту германцы в Чехословакии мали свободу сто раз ліпшу, як у самой Германии. Но але ту о инше росходилося. Ту росходилося не о свободу судетскых німцов, але штобы убити демократию и свободу, и программу робочого класса цілого світа. Но они страшно помылилися, бо они тпм открыли свою здрадницку юдску, подлу роботу. Они ошукали народ, но не надолго, то лем до часу, бо всьо має свой час, то и на юдов приде час.

Беру английску газету “Торонто Стар”, позерам, а там пише за Карпатску Русь. И як сына Карпатской Руси, мене то дуже заинтересувало, што пишут о мойом родном краю. И то в дуже великой капиталистичной газеті, котра выходит штоденно на 48 страницах и печатат около 250 тысяч екземплярох денно. И в той газеті печатают, што “заступникы” карпаторусского народа мали “собрание” в Гаррисбургу, в тайном місті, и послали жадость мадьярскым панам в имени 400 тысяч карпаторусской емиграции, што наш народ жадат, абы його край был присоєдинены?! до “мадьярорсага”...

Ци не здрадницка сволоч? Ци не кодло гадюче? Зышлися в темноті, далеко от людского ока, як гадюкы в свойом темном гнізді и там сычат, што они заступают 400 тысяч карпаторусской емиграции и хотят отдати нашых братов и сестер назад в неволю мадьярскых панов.

Мене то дуже занепокоило, же кто то може быти, што то не може быти правда, штобы в нашом народі нашлися все ище такы страшны здрадникы. Я не хотіл тому вірити, бо мена не были поданы. Аж як газета “Лемко” пришла, то я увиділ, што то правда, што в нашом народі ище находятся такы гадюкы здрадничы.

Як я был малый хлопец и пдс коровы з другыма такыма, то мы нераз нашли на пасовиску гадючы яйца, на котрых сиділа жаба, бо єй гадюка примусила сидіти на єй яйчатох и єй не выпустила, покаль не высиділа єй гадючата. Так и тот наш юдаш, як жаба, посаджена мадьярскыми панами на их яйчата, высиділа такы гадючата. Ты юдашу, будеш тепер югасом мадьярскых гиєн, котрым будеш помагати роздерати наш бідный невинный карпаторусский народ. Правда, у тебе родинного чувства нема, абы-с почул, яка страшна кривда робилася нашому народу мадьярскыми панами гиєнами, котры тримали наш народ за быдло. Што я сам в свойом житю перенюс от тых гиєн мадьярскых, то якбы хотіл описати, то заполнил бы много чисел газеты “Лемко”. И я бы хотіл стати лицем до лица с тобом юдашу, абы-с юдо отповіл перед карпаторусскым роботником-селянином за тоты збыткы над карпаторусскым народом.

Было то 4 рокы перед світовом воином. У нас был учитель, што не знал мадьярский язык, то го выгнали, и дали до чисто русского села мадьяра, котрый не знал слова по-русскы. То лем собі представте, што ни єден чоловік в селі не знал мадьярске, а учитель не знал речи русске слово, ни славянске. И так он научил прекрасно співати карпаторусскы діточкы мадьярскы пісни, и читати и писати, але никто з дітей не розуміл, што співат або што читат, бо языка мадьярского ни єдно не розуміло. И тото щира правда! Тота верства-генерация, што тепер понад ЗО рочна, то ниякого правопису не знає. Я маю братов, котры по войні наруковали до чехословацкой армии, то мусіли записатися до школы неграмотных, бо их так мадьяр научил, хоц до школы ходили. Але ганьба было признатися, што ходил до школы, а грамоты не знає, неєден з них адресу не знал написати.

Як пришла война, то всі русскы книжкы знищили и мадьярскы дали. Пришол я на урлап в 1917 року, бо послали телеграмму з дому, што отец хорый. Прошу, абы мене пустили до дому, хоц на короткий час. бо за молодшого брата уж не чути, попал в плін. И одного разу просится мене капитан, кого я маю дома. Я йому росповіл. То он мі повіл, што я маю телеграмму, што отец хорый, но тота телеграмма выслана ише пред 40 днями. И так достал я урлапу 14 дней з русского фронта, от Черновец. Взяло мі 4 дни, покаль пришол дому. Но отец уж не жил. А в селі полно плінных талиянов. котры зберали кости з вояков, где была велика битва. Всьо было розбурене, и наше господарство, а на збурениску 3 браты и 2 сестры, ище діти. Я иду до окружного начальника, просити го, абы он написал просьбу до команды, штобы мі продолжили хоц на пару неділь урляпу, бо 3 браты и 2 сестры не можут собі сами помочи. И пришол я до Снины, а ту головный начальник жиє собі в грофском каштелю. А то пан велькоможный барон. А на дворі чекат масса народа. А головный пан начальник, як шаркань в гусарском мундурі, мадьярский офицер, ранга оберлайтнанта. Стоят коло мене жены, што чекают на якуси справу. Они от Березного, думаю, што з Новоселиць!. И як тот пан надышол коло нас, то єдна жена зблідла и заточилася, лем єй подтримали, штобы не упала. А коли пришла до себе, то повідат тихо до другой жены: “Ой, кумцьо, най го мати божа покарат, мало ся моє сердце не одорвало от страху, як надышол тот люципер. Бо знате, кумо, отколи мя набил тот мадьярский гусар, што-м не давала телятко взяти, то не мам спокою. Так до мене копнул, што-м упала. И як мя утял шабльов через плечы, то-м думала, уж мі плечы ростял на полы. И долго такы чорны были, як челюсти"....

Но я хочу достатися ку ньому, ку тому пану, думам, я цугсфирер, то може мі лекшє буде. Но але який му титул дати? Чорт зна, яка в него думка, який он титул бажає! Бо має три. А то оберлейтнант, барон и “солгабиров” (окр. начальник). Здаєся, што я мушу му всі три дати, абы го не образити, а то: “пан велькоможный барон”, пан оберлейтнант и солгабиров. Так я му дал тоты три титулы и предкладам свою просьбу по-мадьярскы.

Але ту бідны жены трясутся от страху, бо по-мядьярскы не знают ани слова, а он не знає ани єдно слово русске, то через тлумача мусят ся мучити . . .

И лем подумайте над таков кривдов, в округі 48 сел русскых, 3 словацки, около 20 тысяч жителей, никто не знає по-мядьярскы, окрем попов, а єдна гиєна высміват и збыткуєся над народом, бо он має право, он мадьяр! Но и ту видите, дорогы читателі, до чого грошы доведут. Юда, як забажал грошей, то дораз до фарисейов, и як уж сребренникы были в кишени, то только сказал: “Радуйся учителю!" Бо уж в кишени сребренникы. Але як го почала совість мучити, што продал невинну кров, то им отнюс назад грошы и взял мотуз и повісился. И у него было килько-тилько чести, што зробил свою повинность. Але теперішны юды не мают ниякой совісти, продадут свой народ, а свою повинность не хотят виконати.

Посмотте нечестны здрадникы на свою роботу, як кров лієся ріками и житя невинных людей ся нищит миллионами, а здрадникы собі гуляют.

Зышлися представителі цивилизованых держав на митинг Лигы наций, то испанский и китайский заступники представляли свои справы, як на них напали фашисты агрессоры несправедливо, и просили о помоч против агрессоров. То всі их оставили и пошли гуляти, бо єден юда дал миллион долларов на забаву на одну ноч, то 16 докторов и 20 норскых их стерегли, абы собі дакотрый юда не поламал ногу або голову не розбил, коли буде пяный. Бо то шампан дуже дурит и долго тримат. А што пару тысяч испанцов або китайцов фашисты убют в єдну годину, то то ничого, то цивилизация модерных юдов, бо они спасают тоту цивилизацию и християнство. Бо то червены выноваты тому, што ся боронят. Треба поддатися, то буде покой. Най каждый запре очы, а отворит рот и най слухат, што фашистска потвора повіст, а сам най молчит. А як отважится штоси сказати, то голову долов.

Фарисеи, то завсе шукают юдашов, абы ся мали на кого оперти. Словакы дуже скоро нашли модерного юду, што запродал словацкий народ. Лем не знати, сколько взял. Та и на Карпатской Руси так само не бракує юдов, лем серебнякы показати, то и маму и отца продаст, и то хоцкому, кто веце даст. Але повіситися не хоче, лем сміє ище ходити помеж честных людей и дивитися в день до солнца, и не ганьбятся людей, не боятся Бога, лем за грошами страшно трясутся. Яке лем имя му представлят, то прийме. А о материнский язык йому ся не росходит, ани о то, што народ скаже и што народ хоче, бо народ не платит так добри, як фарисеи, котры знают, як здерати з народа, и на тото силу мают, свою добру машину. Та ліпше тримати с фарисеями, як з народом.

Но уж пришол час и на наш народ братися до діла. Тепер уж нема часу сваритися на вірах, на церквах, але треба буде шукати кусок хліба. Но где го знайти? Та певно, што не в Германии у Гитлера, бо там голод. И певно, што Гитлер многых збудит с темноты. Тепер дознаются, што газета “Лемко” их правильно напоминала, што Совітский Союз, то єст приятель всіх робочых світа, а неприятель всіх выкорыстувачов и лінюхов. Зато тота сволоч так выступат против Сов. Союза.

И ци не мают понести покуту такы, што роблят роздор меж великым русскым народом. Таж Карпатска Русь, то єст часть великого русского народа, а украинцы, то родны братя. Але што видиме, где тягне тота сволоч, котра захоровала на вітрогонску самостийнну соборну хоробу. Тота сволоч летит ку капральови и готова продати честный украинский робочий народ, лем кобы достати спару срібняков и даякий высокий титул. А у капраля тых титулов не бракує, поддатися, то титулы будут. Але чорт знає, яке бажаня у вітрогонов! Видно, што братство и товаришество, то у них велика безбожность. Але зато высоко ставит даяке “благородие”, “воєводство”, “гетманство”, а може даяка “екселенция”, або “величество” — чорт його знає, зачым он пре, лем абы не робочий, бо он чоловік “панствовый”, то хоче мати сам своих рабов. Но але не так легко собі самому рабов подчинити, то треба бісноватый фашизм, абы знищити большу часть народа и його доробку, и так собі придбати рабов террором и голодом. Але ци ся им тото подарит, то нам будучность на тото отповіст.

Ци не ганьба и проклятие на вас за тоту зраду, што морочите невинный украинский и карпаторусский народ? А нам, братя, ци не час уж стати до єдного Великого Славянского Робочого Союза? Тогды не будут над нами збыткуватися жадны половцы, мадьяры и гуны, бо славянский народ, то великий народ, около 200 миллионов людей, котры говорят понятным для себе языком. Та ци мы не маме нашто быти горды, што мы члены того великого племени.

Але ту ище єст єдна важнійша справа, а то тота, што русский народ не має в свойой программі зробити собі другы народы своими рабами, як Германия, Италия, Япония. Там, в Совітском Союзі всі народы мают свою национальну и языкову свободу. Там не выкорыстує єден другого, але всі выкорыстуют землю, из ней хосен тягнут, а не из свого ближнього. А ту што видиме: Жаден побожник того не любит и не хоче землю выкорыстати своими руками, але дре миллионы зо свого ближнього. Тото уже не лем славянскы роботникы порозуміли, але роботникы цілого світа, лем украинскы фашисты не можут порозуміти, бо у них велика жажда славы и сребрелюбие, а по русской программі нема надіі на преосвященство, на величество, на сиятельство, бо там єст братство и товарищество. Пропало рабство, пропало болванство.

Та идте, рабы, на поклон до німецкого капраля, бо он выхваленый лордами и буржуями под небеса, яко их спаситель. Як бы у него, у того капраля был здоровый розум, то он бы ани не принял такого величания и восхваления. Но, але який конец буде тому “великану”, то мож предвидіти. Бо где сут такы великаны пред 20 роками, як кайзер, цар, цисар?

Два капралі поробилися диктаторами над своими народами, и хотят стати диктаторами над всіми народами, над цілым світом. Радуйся світе, бо тя капралі поведут. Але где? Та певно, што не до просперити, а певно до загибели! До послідного цента отдали на зброю и говорят о покою, а миллионы народа гине от бомб фашистскых гиєн. Як раз ту предомнов газета, котра подає, што в Китаю за 15 місяцев погибло два миллионы людей, а с того больша часть жены и діти. А в Испании, то уж никто не знає, скилько убито.

Но и тепер дакто ище скаже, што світ иде до цивилизации. Дуже жалію, што треба молчати на даякий час и тримати тот тягар на свойом сердцу. Бо мі завсе пред очами стают великы числа убитых, и то жен и дітей, а ту світ называт себе “цивилизациов”, “демократиов”. Як раз то мя мучит, што не можу цілый той свой боль на папер положити, котрый мі на сердцу лежит.

А дальше вас прошу, дорогы читателі, дописуйте до газеты “Лемко”, бо я дуже люблю читати, бо мало такой дописи в газеті “Лемко”, абы не было фактов зо житя нашого поневоленого народа. И я бы частійше писал, але мало міста. Я думаю, што всі карпатороссы так рады читают “Лемка”, як и я, бо каждый з нас хоче знати за своих родных и краянов, а нияка газета на світі так нам добре не напише, бо она пише нам родным нашым языком. Зато дуже приємна. А по-друге пише правду из житя роботника и дає порады. Так така газета на свойом родном языку дуже мила.

А тот наш родный русский язык хотіли нам вырвати мадьярскы гиєны, бо они знали, што як мы будеме знати свой язык, то мы порозуміємеся разом с цілым русскым народом, и як русский народ соєдинится, то тых мадьярскых фашистскых гиєн може роскопати без зброй.

Итак, дорогы братя и сестры, знайме всі, што кто нашому народу хоче вырвати його материнский язык, то єст наш найбольший враг, бо ніт ничого дорожшого от нашого материнского языка, бо мы лем при помочи нашого материнского языка можеме просвітитися и соєдинитися, и так добыти собі ліпше житя.

Иван Яцош
от Снины



[BACK]