Карпатска Русь

Наш край в середині світовой увагы


В НОВОМ империалистичном преділі центральной Европы, котрому дал початок пакт в Мюниху, заключеный меж здрадниками демократии Чемберленом и Даладье, а фашистскыми диктаторами Гитлером и Муссолини для розділа демократичной Чехословакии сусідными фашистскыми правительствами — наш край, наша Карпатска Русь набрала межнародного значения. Показалося, што нияка территория, ниякий край Чехословакии не єст так важный при том империалистичном поділі Чехословакии, як Карпатска Русь. Бо коли всі тоты империалисты з легкой рукы согласилися на отрізание от Чехословакии Судетского краю, всі они согласилися на отрізание богатой Тешинской земли польскыми панами, а даже на обрізание Словакии, то на Карпатской Руси пришло меж империалистами до тяжкого непорозуміния.

Карпатска Русь

Коли мы тото пишеме, то знаме, што часть Карпатской Руси, а то Подкарпатска Русь, получила так звану автономию и своє правительство. Розумієся, члены того правительства реакционеры, приятелі фашизма, сами фашисты, бо лем таке противнародне правительство може быти допущене Гитлером, котрый почал диктувати свою волю обрізаной, по волі єй “демократичных” западных союзников, Чехословакии. Но для истории Карпатской Руси, поневоленой и запереченой віками, тото перве “своє” правительство, хоц оно истнувало бы лем єден день, має огромне историчне значение. То уж буде записано в истории, яко право на национальну свободу Карпатской Руси. Тото право признано нам, карпатороссам, противорічиями, незгодами империалистов, в котрых заключатся их упадок и полна свобода всіх, меж ними и нашого, карпаторусского народа.

Мы добри знаме, што для нашого краю и народа ниякы империалисты свободы не желают, а найменьше желат нам той свободы германский империализм, котрый вытяг свои лапы на восток, на славянскы народы и их землі. И германскому фашизму-империализму, як маме примір по славянской Чехословакии, не трудно поневолити меньшы славянскы народы и их державы, даже без войны. Югославия, Болгария, Польша слабы славянскы державы, штобы могли даже думати о опорі германскому империализму. Можно сказати, што панскы правительства тых держав так подлягают Германии, як и чехословацке правительство. Польскы паны отзываются несміло, што они хотіли бы вспольну границу з Мадьяриом, з мадьярскыми панами. Но Гитлеру старчит тупнути німецкым бутом, штобы польскы и мадьярскы паны скрылися в кут и отреклися вспольной границы. Бо Гитлеру потребна свободна дорога в Румынию и на Украину, а тота дорога веде через Карпатску Русь.

Карпатска Русь

Повторяме, што пишеме тоту статью о Карпатской Руси в тот час, коли о ню почалися непорозуміния меж фашистами, так што не знаме, што с того ище выйде меж ними. Мы сегодня знаме лем єдно, што сами фашисты-империалисты, нехотячи, против свойой волі, были змушены вытягнути Карапатску Русь на фронтовы страницы світовых газет, заинтересувати нашым крайом цілый світ, а и нас самых, нашы карпаторусскы массы на емиграции, порушати нас в обороні свого родного краю. И сами фашисты, нехотячи, против свойой волі, дали тым початок пробуждения нашого карпаторусского народа, заинтересованяся своим родным крайом и вступления в борьбу за єдинство Карапатской Руси и правдиву народну свободу для карпаторусского народа.

Тепер мы змушены сами познавати свой край, учитися о свойой Карпатской Руси, знати єй географию, народ, його историю. Мы мусиме всьо знати о свойом родном краю, о Карпатской Руси, бо тот час недалеко, што ни Гитлер, ни Муссолини, ни Чемберлен, ни Даладье, ни польскы ани мадьярскы паны не будут рішати нашу судьбу, а будеме єй рішати мы сами, карпаторусский народ. То всьо, што тоты непрошены империалисты постановляют о Карпатской Руси, и карпаторусском народі, — всьо то лем тымчасове, всьо то лем доказує, што час, коли сами народы будут рішати свою судьбу — дуже близко, и што они робят тепер, то лем зо страху пред тым близкым часом.

Найважнійша наша задача приготовитися до того часу. А штобы мы могли приготовитися, найперше мы мусиме познати сами себе, свой край, мусиме соєдинитися для одной ціли — освобождения нашого народа от угнетателей.

Што то єст Карпатска Русь?

Империалисты звернули увагу и открыли світу своими незгодами лем потребну стратегично половину Карпатской Руси, то єст Подкарпатску Русь. Другу половину, от Ужа и Сяна по Попрад, так звану Лемковину, котра поділена меж Словакию и Польшу, они замолчуют и днеска. На той части Карпатской Руси они не сварятся. Правда, польскы паны выступили с претенсиом до Спиша, но скоро замолкли, штобы тым не открыти, што на Спишу, так само як и дораз за границом в Польші, жиє карпаторусский народ — лемкы. И длятого нам все треба припоминати світу о том, што Подкарпатска Русь, то лем половина Карпатской Руси, а друга єй половина розділена меж Польшу и Словакию, и нам треба соєдинити найперше тоту другу половину и цілу присоєдинити до Подкарпатской Руси, створити соєдинену Карпатску Русь з миллионом карпаторусского населения.

Коли бы фашисты не были фальшивы с тым своим самоопреділением народов, то они бы дали тото право 250 тысячам лемков в Польші, котры в массі беспрерывным ланцухом лемковскых карпаторусскых сел тягнутся вздолж польско-словацкой границы, а разом з другом таком самом частьом в Вост. Словакии вбиваются клином меж польский и словацкий народы аж под Татры. На поданой напереді мапі Карпатской Руси тото каждый може видіти.

И хотя того карпаторусского населения на той розділеной империалистами Лемковині єст столько, а може ище больше, як в автономной Подкарпатской Руси за Ужом, то мы видиме, што о той т. з. империалистами “Рутеніи” аж за много бесідуют и торгуются на ней, а лемков совсім замолчуют, для них ніт ниякой “автономии” у империалистов, тоту половину карпаторусского населения в Западной части Карпатской Руси, на Лемковині, они хотят совсім стерта с той земли, вынародовити и выморити. И то не даякы німецкы або мадьярскы империалисты, а братскы славяне, словацкы и польскы шовинисты, тоты самы, на котрых з єдной стороны пре мадьярский шовинизм, а на другых, на поляков, німецкий.

Итак, под Карпатском Русьом не мож нам розуміти саму Подкарпатску Русь, на котрой торгуются империалисты и о котрой столько тепер пишут и говорят, бо она стала причином империалистичных незгод по поводу свого географичного и стратегичного положения. Под Карпатском Русьом не мож розуміти Подкарпатску и Пряшевску Русь (словацку часть Лемковины), бо и так она неполна географично и етнографично (народно). Под Карпатском Русьом треба розуміти цілый тот наш край и народ, котрый показаный на поміщеной спочатку карті-мапі Карпатской Руси.

Длячого Карпатска Русь?

Якраз сегодня, коли тото пишеме, довідуємеся из американскых газет, што первый премьер Подкарпатской Руси Бродий запродался мадьярскым панам и был арестованый, а на його місто был назначеный премьером поп Августин Волошин. А в тот сам час съіхалися в Відні германскы и итальянскы фашисты и обрізали Подкарпатску Русь — присудили мадьярскым панам найбольшы карпаторусскы міста: столицу Ужгород и старе карпаторусске місто Мукачев, так што через то позбавили Подкарпатску Русь культурных и промышленных центров, и желізнодорожного соєдинения с Чехо-Словакиом. А разом с тым пан превелебный Волошин, яко “премьер”, назначеный чехословацкым правительством, котре слухат Берлина — переименовал Подкарпатску Русь на Подкарпатску Украину. А то значит, што Гитлер хотіл Волошина, и Гитлер хотіл той назвы “Украина" для Подкарпатской Руси. Хотіл длятого, бо тота маленька “Украина” має му служити за гачок (американцы гварят “бейт”), на котрой он думат зловити велику Украину.

А тепер діло в том, ци правильна для Подкарпатской Руси назва “Украина”? Зо стороны фашизма она правильна, бо фашизм не просится народа, он диктує народу. Но ниякий демократ фашистской “правильности” признати не може, бо тогды он бы не был демократом. Демократ мусит считатися з вольом народа. А лем фальшивый чоловік не признат того, што огромне большинство карпаторусского народа не хоче зміняти свого имени на “украинский”. В самой Подкарпатской Руси, мимо шаленой пропаганды кучкы украинскых фашистов и украинскых руководителей компартии, украинска назва при голосованию заледво собрала 25 проц голосов. То в Подкарпатской Руси. На Пряшевской Руси ніт не то 25 процентов, но ніт 25 людей за украинску назву, а што до галицкой Лемковины, то сами украинці, честны демократы, признали в канадской робочой “Народной Газеті”, што ніт 10 процентов. Длятого мы можеме сміло заявити, што кто хоче накинути карпаторусскому народу нову для него назву против його волі, тот або не знає того народа, або он, єсли украинец, то фашист, єсли другой народности, то не розуміє, або иде на руку Гитлеру.

Наш народ в старом краю под властьом фашизма не може выявити свою волю, бо фашисты накинули му свою волю. Но мы в Америкі и Канаді по отношению до нашого народа в краю маме свою волю, и мы на емиграции можеме свободно тоту волю, не лем свою, але и поневолену волю нашых братов в краю выразити свободно.

А на емиграции, в Америкі и Канаді, ніт такых людей с Подкарпатской, ани с Пряшевской Руси, ани з галицкой части Лемковины, котры бы соглашалиcя з розділом родного краю, котры бы соглашалися з насильным фашистскым накидуваньом му новых назв. Ніт такых меж нами, робочыми карпатороссами, котры бы шли на компромис, на згоду з германскыми фашистами, з мадьярскыми и польскыми панами, ніт такых, котры бы шли на згоду с тыми, котры за поневоление Карапатской Руси, ніт меж нами такых, котры бы шли против России, против Совітского Союза. Карпаторусский народ николи не пойде против России, против Совітского Союза! Тото най розуміют всі врагы русского народа, што в том єдном случаю ніт и не може быти ниякого розділа меж карпаторусском народном массом.

Мы уважаме украинцов за нашых найблисшых братов, но лем тых, котры уважают за своих найблисшых братов великоруссов. А тых, котры уважают за своих братов и помочников німецкых фашистов, карпаторуссы ненавидят, як заразу, котру треба вынищити на нашой землі.

Карпаторусска емиграция в Америкі и Канаді
зограт велику ролю в истории Карапатской Руси

Нашым родным крайом поділилися фашистскы захватчикы. Уж и тоту маленьку Подкарпатску Русь за Ужом не оставили в цілости, єй головны міста: Ужгород, Мукачев и Берегово, з найліпшыми землями, фашисты приділили фашистской Мадьярии зо 100 тысячами карпаторусского населения. Решту Подкарпатской Руси, без желізнодорожной коммуникации, без міст, без промышленности, оставили при Чехо-Словакии, в котрой приказує Гитлер при помочи чехословацкой реакции, аграров и Клебанов. В плані Гитлера из той части нашой родной землі утворити тоту маленьку Украину, яко “бейт" для великой Украины. Покаль тота Подкарпатска Русь не буде освобождена из пазуров фашизма, житя нашого народа там буде страшне. Но мы переконанні в том, што таке житя потягнеся лем пару літ. За пару літ наш народ буде свободный.

Пряшевска Русь, около 5 тысяч квадратных километров и 250 тысяч карпаторусского населения (лемков), осталася надальше в лапах словацкых шовинистов и клебанов, котры взяли собі за головну задачу знищити карпаторусске население в той части Карпатской Руси. Друга половина лемков-карпатороссов, галицка Лемковина, нашлася послі світовой войны в пазурах польскых панов, котры поставили собі за задачу знищити тот народ. По польской стороні нашой землі єст така сама территория, як по словацкой, и таке саме число населения.

Для честного карпаторосса не може быти ниякой иншой первой национальной программы, от той, штобы соєдинити тоты всі штыри части карпаторусского народа в одну Карпатску Русь! То єст перва точка нашой национальной программы, и она мусит быти первом у каждого честного свідомого карпаторосса.

Друга точка нашой карпаторусской программы соєдинение нашого родного краю з Русскым Востоком, соєдинение цілой Карпатской Руси, яко єдиницы. Так буде выполнена наша национальна программа в цілости.

Мы всі должны знати, што тото цілковите выполнение нашой национальной программы дуже близке. Оно наступит сейчас послі розвала фашизма, европейской реакции и капитализма-империализма. А тот розвал луже близко. Всьо, што тепер творится в Европі, показує тот близкий розвал старого порядка. Цілковитый розвал наступит, коли тот старый порядок, спасающийся в фашизмі, зотреся з новым порядком в Восточной Европі — с Совітскым Союзом. А тото стертя приведе до упадку старого социального порядку, а на його місто приде полне национальне и економичне освобождение народов. С тым загальным освобождением приде освобождение и Карпатской Руси. В том ниякого сомніния не може быти.

Но за час фашистской неволі нашы братя в краю не можут свободно выражати свою волю. Всякы здрадникы будут говорити в имени карпаторусского народа. Бо кто бы хотіл выразити волю народа, того посалят в тюрьму або отрубают голову. И в том выражению волі карпаторусского народа — його массова емиграция в Америкі зограт огромну ролю. Мы счастливы уж тым, што половина нашого народа находится в Америкі и Канаді, и никто не може заперечити, што воля той половины нашого народа на емиграции, то єст и воля Карпатской Руси.

Но штобы нам никто не мог перечити, мы, на емиграции, мусиме быти организованы, мусиме мати выбране народом политичне руководство, котре бы не штучно, не поддільно говорило в имени народа, а выражало його не подроблену, не штучну волю.

Початок такой народной организации, такого народного руководства у нас уж єст. А єст ним выбраный массом карпаторусскых емигрантов на грандиозным вічах в Нью Йорку, Пассайку и другых карпаторусскых колониях на емиграции —

Карпато-Русский Народный Комитет.

Уж тепер, через свой народный выбор, Карпато-Русский Народный Комитет лем один має право говорити в имени всей карпаторусской емиграции, яко политичный карпаторусский верховный руководитель на емиграции. Но штобы доказати свою силу в массах, штобы доказати, што вся карпаторусска народна масса стоит за прогромму и руководство КРНКомитета, тот Комитет должен организувати и скликати Народный Конгресс, котрый должен переизбрати тот Комитет и утвердити го, дати му полномочие говорити в имени всей карпаторусской емиграции. Уж самом организациом такого Народного Конгресса Комитет докаже своє верховне руководство на емиграции.

В Конгрессі должны принята участь, яко делегаты, представителі всіх карпаторусскых колоний, и як найбольшого числа карпаторусскых организаций: клубов, братств, церквей.

Неприятелей и противников Конгресса мы не боимеся, бо єсли такы найдутся, то они мусят пропасти от нас, они стратят всяке значение, бо то тоты, котры хотят руководство над народом, но над сліпым народом. А такых наш народ откине, бо пришол такий час, што народ хоче видіти, куда його ведут.

Программа тымчасового выбраного на народных вічах КРНКомитета заключатся в його отзыві к карпаторусскому народу, котрый дальше печатаме.

То перве наше политичне народне руководство, котре не крыєся зо свойом программом. И мы увірены, што коли положение нашых братов и родного краю того потребує, а треба буде змінити дашто в той программі, то о каждой такой зміні Комитет повідомит народ и объяснит, штобы мы всі знали, як нам треба ориентуватися.



ОТ КАРПАТО-РУССКОГО НАРОДНОГО
КОМИТЕТА КО ВСІМ КАРПАТОРОССАМ
В АМЕРИКІ И КАНАДІ

Дорогы Братя и Сестры:

9-го октября 1938 года сталося велике карпаторусске діло в городі Нью Йорку. Найперше, пред тым днем, зышлися руководителі всіх карпаторусскых организаций, политичных, культурно-просвітительных и церковных и объявили велику Карпаторусску Манифестацию в обороні Карпатской Руси в демократичной Чехословакии от нового посягательства на нашу родну землю мадьярскых и польскых панов. И на призыв нашых объєдинению карпаторусскых организаций, 9-го октября 1938 года собралося в великой Вебстер галі в Нью Йорку поверх тысячи нашого карпаторусского народа зо всіх карпаторусскых организаций и церквей, котрый єдинодушно запротестовал против ганебного посягательства Гитлера, и польскых и мадьярскых панов на Карпатску Русь, и выразил єдинодушно свою волю, штобы наш родный край, наша дорога Карпатска Русь, была соєдинена и было єй дано право на самоопреділение, и штобы наш карпаторусский народ остался в демократичной Чехословацкой республикі на ровных правах с чешскым и словацкым народами. До того мы затребовали самоопреділения для 250 тысяч карпаторусского-лемковского населения в западной Галичині в Польші, от Сяна по Попрад, котре дораз по войні выразило свою волю присоєдинения до Карпатской Руси, до котрой принадлежит географично и етнографично (народно). В том смыслі была составлена резолюция, єдинодушно народом принята и телеграфично выслана демократичным правительствам великых держав: Англии, Франции, Совітского Союза и С. Ш. С. Америкы.

Мы увірены, што до того голосу объєдиненного карпаторусского народа в Нью Йорку, душевно присоєдинится вся наша карпаторусска емиграция в Америкі и Канаді. Но того душевного объєдинения мало, штобы мы могли мати рішаючий голос в судьбі нашого карпаторусского народа. Для того, штобы мы могли мати рішаючий голос в дальшой судьбі нашого карпаторусского народа в краю, нам нужне организоване объєдинение по всей Америкі и Канаді и єдине политичне руководство, котре бы говорило в имени всей нашой объєдиненой карпаторусской емиграции в Америкі и Канаді, штобы не говорили в нашом имени совсім непрошены нами, самозваны люде, то галицко-украинскы фашисты, то другы слугы Гитлера, то самозваны мадьяроны и другы непрошены политичны шпекулянты, котры присвоюют тобі право говорити в имени нашой карпаторусской емиграции. А можут они собі присвоювати наше право так долго, як долго у нас не буде свого єдиного, выбранного карпаторусскым народом, политичного руководства. И длятого, на нашом манифестацийном всенародном карпаторусском вічу в Нью Йорку, в котром приняли массову участь емигранты из Подкарпатской и Пряшевской Руси, як тоже з галицкой Лемковины, — то значит, из цілой Карпатской Руси, — был выбраный народом

Карпато-Русский Народный Комитет,

котрый уполномочено представляти политично карпаторусску емиграцию в Америкі и Канаді, и говорити в єй имени, яко єдиному выбраному карпаторусскым народом на массовом вічу карпатороссов, тымчасовому, политичному руководству.

Тому Карпато-Русскому Народному Комитету препоручено организувати и скликувати такы народны карпаторусскы віча по всіх карпаторусскых колониях и подготовляти общий наш

Карпато-Русский Народный Конгресс

представителей карпаторусскых колоний и организаций из всей Америкы и Канады. Тот Конгресс переизбере Карпато-Русский Народный Комитет и уполномочит го представляти всю нашу карпаторусску емиграцию, говорити в єй имени и виступати в обороні Карпатской Руси и рішати о єй дальшой судьбі, он буде дальшым, постоянным политичным Верховным Руководителем нашой емиграции.

На тоту ціль, собравшийся народ в Нью Йорку на манифестацийном вічу, и його организации, зложили добровольных жертв штыриста пятдесят долларов ($450.00), с котрых покрыто кошта віча и телеграммы (около 90 дол.), а решта находится в банку для оборонной и организацийной роботы.

15-го октября тымчасовый Карпато-Русский Народный Комитет в Нью Йорку, отбыл своє перве заседание, на котром было постановлено выпустити тото возвание и выроблено план дальшой роботы и подготовкы к Карпато-Русскому Народному Конгрессу, на основі чого:

1. Комитет звертатся с призывом ко всім карпаторусскым колониям в Америкі и Канаді, поступити по приміру нашого карпаторусского народа в Нью Йорку: объєдинити для такой ціли всі организации на плейзі и созвати массову манифестацию-віче, штобы народ мог выразити свою волю по отношению до свого родного краю, Карпатской Руси.

2. На том вічу выбрати такий сам Карпато-Русский Народный Комитет для политичного руководства на плейзі. Предсідатель и секретар того Комитета стают членами тимчасового Карпато-Русского Народного Комитета в Нью Йорку. Такий Комитет на плейзі должен подготовляти карпаторусскы организации до Карпато-Русского Народного Конгресса.

3. На каждом таком вічу соберают на Оборонный Фонд, с чого покрываются найперше росходы віча. Што останеся, то половина иде в общий Оборонно-организацийный фонд тимчасового Карпато-Русского Народного Комитета в Нью Йорку для обороны Карпатской Руси и для организации Конгресса. Друга половина остаєся у містного комитета для його организацийной роботы на плейзі.

4. Коли в якой колонии организации соєдинятся для такого общого віча и назначат день, то они дают знати Карпато-Русскому Народному Комитету в Нью Йорку, котрый вышле на их віче бесідников. Бесідникам платится звичайний желізнодорожный билет из центральной кассы тимчасового Карпато-Русского Народного Комитета в Нью Йорку.

Такы были постановления на послідном засіданню нашого Карпато-Русского Народного Комитета в Нью Йорку для добра карпаторусского народа в Карпатской Руси и на емиграции.

Дорогы Братя и Сестры из Карпатской Руси: Мы, подписаны члены первого Карпато-Русского Народного Комитета, вибраного народом, не желаме ничого для себе, мы желаме лем добра для нашого карпаторусского народа. Но мы сами ничого великого сділати не можеме. Велике діло для всего нашого народа можеме сділати лем всі мы, объєдинена наша емиграция в Америкі и Канаді, а виразом єй объєдинения буде общий успішний

Карпато-Русский Народный Конгресс.

Наша задача — организувати тот Конгресс!

Дорогы Братя и Сестры, не позерайме, кто до якой церкви або партии принадлежит, бо рішатся єднакова судьба всего нашого карпаторусского народа и Карпатской Руси. И она не рішится так скоро, як бы того хотіли Гитлер, мадьярскы и польскы паны, бо судьба каждого народа в його власных руках. И тот час мусит придти, коли народ буде рішати свою судьбу.

Борьба за свободу Карпатской Руси лем тепер началася, и нам, карпаторусскому народу на емиграции, на свободной землі Вашингтона, нужно соєдинити свои силы, штобы нашу борьбу за права карпаторусского народа довести до побідного конца, т. є. выбороти правдиве демократичне право самоопреділения. Но народ мусит показати волю рішати свою судьбу. Мы, в Нью Йорку, показали, што мы маме тоту волю. Но того мало. Мы мусиме показати свою волю о Карпатской Руси в цілой Америкі и Канаді. Для того мы мусиме объєдинитися, устроювати манифестацийны віча нашой волі и устроити єден общий Карпато-Русский Народный Конгресс, котрый выразит волю всей нашой карпаторусской емиграции в Америкі и Канаді.

Нью Йорк, 15 октября, 1938.


Карпато-Русский Народный Комитет
Михаил Лайчак, предсідатель.

Містопредсідателі:
Петр Гузлей,
Михаил Логойда,
Дмитрий Вислоцкий,

Д-р Симеон Пыж, секретар,

Иван Каня, помочник секретаря.

Михаил Петрик, кассир.

Члены Комитета:
Михаил Магоник,
Андрей Каня,
Ярослав Кобан,
Иван Грофик,
Андрей Грабский.

Address:
Carpatho-Russian National Committee
16 Greenwich St. New York, N. Y.



[BACK]