ПОКОЛІНЯ ЮДЫ



Дідо Мохнацкий з Мохначкы уважал Юду за святого, а Петра апостола за здрадника, и ниякий поп му иначе доказати не мог. Юда, гварит дідо, мал сумліня, совість, бо як здрадил Христа, то го так тота людска совість грызла, што собі аж смерть зробил, повісился. А Петро отрюкся от свого учителя Христа три разы, и не лем не повісился, але ище за тоты свои заслугы зробился папом, и почавши от него, от первого римского папы, всі його наслідникы без ниякой людской совісти ошукуют народ, а Христову науку мают лем на тото, штобы ньом народ ошукувати и панувати. Христа они лем на тото мают, штобы з бідного народа дерти його доробок, а сами богатіти и в роскошах жити.

Так вірил дідо Мохнацкий з Мохначкы и с таком віром помер. Ци го св. Петро пустил до царства небесного, мы не знаме, але знаме, што дідо Мохнацкий не вірил тому, штобы св. Петро мал право дакого пускати або не пускати до неба, як и в тото не вірил, штобы папа мал право робити дакого святым.

И я думам, што дідо Мохнацкий мал веце правды, як папа, и што тот первый Юда, доносчик на Христа, был ище найсправедливійший Юда зо всіх Юдов, котры потом на світ пришли, што тот первый Юда мал людске сумліня, совість, котра му не позваляла дальше жити, коли он здрадил свой народ. Бо треба нам знати, што Христос боролся за бідный народ, боролся против рабского закона, против рабства, за свободу бідного народа. Коли Юда донюс на Христа, то он донюс на вождя свого народа, а тым самым здрадил свой народ.

Так тот первый Юда Искариотский зо згрызы потом повісился. Што до днешных Юдов, то ани им не споминайте, што им бы треба повіситися, штобы они были достойны их прародителя Юды Искариотского. Днешный Юда не лем же не має ниякых угрызений совісти, але он ище пышный на тото, што йому удастся здрадити народ, он зыскує славу и благословение папы, а як православный, то благословение православного патриарха. Приміром: Ніт сегодня большого Юды-здрадника, як здрадник испанского народа Франко. И он сам дуже добри розуміє и сознає, што он єст здрадник свого народа, бо спровадил на свой народ чорных мавров з Африкы, и білых мавров з Германии и Италии, котры без всякого людского чувства мордуют соткы тысяч цілком невинных, безборонных бідных испанскых жен и дітей, бурят и палят испанскы міста и села, ровнают всьо зо земльом. И якраз на Великдень папа римский посылат му своє благословение и обіцує, што го зробит святым. И Франко не має ниякых угрызений совісти, бо той совісти не має. Знайме, што тот модерный Юда напевно не повісится, аж го мусят другы повісити.

Або приміром Троцкий: Ленин лем го познал, дораз го назвал Юдом, и ждал, што Троцкий сам повісится. А коли по смерти Ленина Троцкий уж так открыто здраджал совіты, гдекотры большевики требували, штобы го попросту засудити на смерть за очевидну здраду народа. Но Сталин выступил в його обороні. Певно думал так, як думал Ленин, што у Троцкого єст штонайменьше така совість, як у Юды Искариотского, тай повісится сам. Но видиме, што мимо того, што Троцкому и його банді доказали страшну збродню здрады робочого народа, он собі найспокойнійше жиє, и ани не думат повіситися. Жде, покаль го робочы повісят.

Но а Гитлер, а Муссолини, а английскы лорды, а польскы паны, — таж они всі модерны юды, котры здраджают свой народ, и не мают ниякого клопоту зо свойом совістьом, як мал их прародич Юда Искариотский. А нашы мадьяроне уж такой просто сами признаются, што они здраджают свой карпаторусский народ, так и пишут, што ідут до мадьярскых панов, штобы здрадити свой народ, хвалятся том здрадом публично, хвалятся тым, што они юды под сам Великдень. Та правдивый Юда ся тым никому не хвалил, што он иде здрадити Христа.

Найсмішнійшы тоты нашы юды, котры недавно объявили, што хотят здрадити наш народ, а не мают кому. Угорскы хоц мают кому, и мают чым похвалитися, што они ище дост великы юды, бо они мают кому здрадити, мают мадьярскых панов. Тоты другы юды, што повідают, што они спасают “Подъяремну Русь”, уж раз ниякыма панами не можут похвалитися, кромі тых біженцов білогвардейскых, котры также “подъяремны” ту в Америкі. И тоты “подъяремны” нашы юды, хоцбы хотіли даяку юдину роботу чинити, не мают кому, то лем так пусто пышатся, што они тоже юды. Но тоты другы юды, што мают кого и кому здраджати, такых порожных пустых юдов не уважают, не рахуются з нима, бо они добри знают, што тоты нашы “подъяремны” юдьг уж не мают кого здраджати и запродавати. А здрадили бы и запродали, коли бы мали кого, бо серебренников им барз треба, аж мурчат.

Так выходит, што наш дідо Мохнацкий з Мохначкы правду повідал, што тот первый Юда, котрый здрадил и продал Христа, был ище святый чоловік, против всіх другых послідовавшых аж до нашого модерного часу. Первый Юда Искариотский так згрызся своим подлым учинком здрады и юдиной продажы, тоты 30 серебренников так му затяжили в його руках и на його совісти, што принюс их назад до римскых панов, кинул им их и рюк: “Я продал кров невинну!” А сам пошол и задусился, и доказал світу, што он чоловік.

Кто з нас може привести такий примір модерного здрадника? Я такого не знам. Я знам лем такых, што грошы возмут и спокойно собі дальше жиют, одного чого ся боят, то большевиков. По том страху их познати, всіх модерных юдов, здрадников народа.

Хлоп.
JudasGenEnd

[BACK]