ФАШИСТСКА РАСОВА ТЕОРИЯ
И ГОСПОДАРКА

Німецкы фашисты учат, што німцы найвысша раса меж народами и длятого німцам належится панувати над всіми народами. Итальянскы фашисты спочатку не мали такой расовой теории, но недавно и они переняли тоту расову теорию от німецкых фашистов, так што по наукі фашизма уж два народы высшой расы мают панувати над другыми народами, то єст німецкий и итальянский. Но ту треба было заключати пакт з японскыми косоокыми самураями, треба было их приняти в свою фашистску фамилию, так што и косоокых японців треба было признати за высшу расу.

Но и тепер, по наукі фашизма, маме на світі єдну высшу расу, до котрой належат німецкы нацисты, итальянскы фашисты и японскы самураи.

Чым отзначатся тота раса? Отзначатся тым, што где она находится при власти, там всяди голод. Найперше тоты расовы люде, яко расовы, страшно сами жрут и николи не можут насытитися. О другых людей совсім не дбают. Всі нацисты в Германии, фашисты в Италии, самураи в Японии тлусты, выпасены, а роботникы и селяне выголодуваны, худы и мизерны.

Господарка тых расовых така, же што не зожрут сами, тото переміняют на каноны, бомбы, аммуницию. Повідают, што народ може обыйтися без хліба, масла, мяса — не може обыйтися без канонов, бомб, аммуниции.

Нацисты, фашисты и самураи мают специальну охоту на богатства русского народа и другых народов Совітского Союза, бо знают, што коли бы так мали “Украину, Ураль, Сибир”. . ., а запрягли працувати на себе русский народ, то бы мали велике жертя, а сами бы не потребували працувати. Но народы Совітского Союза приготовили для обороны против тых расовых дост аеропланов, канонов, бомб, гранатов и найлучше вышколену в світі, и найсознательнійшу армию, так што коли тоты “расовы” осмілятся напасти на Совітский Союз, то буде значити их конец, конец фашизма. Мы бы были затым, штобы фашисты якнайскорше напали на Сов. Союз, штобы им скорше пришол конец. Покончити с фашизмом поможут всі поневолены ними народы, всі роботникы и селяне, меж ними сами німецкы, итальянскы и японскы селяне.



[BACK]