ПРИХОДИТ НОВА КУЛЬТУРА

У нашого народа ище николи не было такой организации, як наш Лемко-Союз, штобы так наш народ учыла правды. А было у нас до сего часу дост всякых организаций. Но што нашому народу за корысть с тых организаций была, коли ани єдна з них не стояла за народ, бо кажда з них была основана лем длятого, штобы народ выкорыстати, а не штобы з ней народ корыстал. А што всі тоты “организаторы” добри розуміли, што лем темный народ даст себе им найлекше выкорыстати, то му не несли просвіту, лем темноту, вмісто просвіщати народ, то го затемняли. А штобы ище им лекше было, штобы тоты затемнены люде часом не збунтувалися, як часами бунтувалися и темны рабы против своих панов, то тота пануюча клясса поділила народ на віры-религии, на партии, выкорыстувала рижниці языка, расы, барвы, учыла ненависти одных бідных людей до другых бідных людей, лем жебы отвернути их увагу от того, што они всі єднако кривджены панами, ци они, тоты бідны люде німцы, ци русскы, ци талияне, ци полякы. Так само кривдят свой народ паны німецкы, польскы, талиянскы, — так само жыют його трудом, пануют над бідным народом. Для талиянов нич не ліпшы талиянскы паны, як польскы паны для поляков. Выходит, што всі паны єднакы, тай и бідны люде в свойом жытю єднакы, бо єднако кривджены, єднако выкорыстуваны.

И долго бідны люде не могли того порозуміти, што они мусят єднако бідно жыти по вині тых, котры их єднако ошукуют и выкорыстуют, што всі тоты организации, партии, религии, якы дотепер были основаны, служыли лем орудием для богачов и их агентов для ошуканства и выкорыстуваня бідного народа.

То была стара культура, стара система жытя людей на світі. Она оператся на той наукі, што єден мог жыти трудом и коштом другого.

Но тепер, коли народ почал розуміти тогу несправедливость в жытю, почал организуватися сам, в свои правдивы народны организации, и с тым часом, коли трудящийся народ почал будувати такы свои народны организации, и почал при помочы тых своих робочых организаций борьбу за нове справедливе жытя для всіх робочых людей, для всіх народов, от того часу почалася нова культура, новый период истории людского жытя на землі.

Стары учытелі, стары патриоты и духовникы толкували нам, што придут такы часы, што буде шол єден на другого, брат на брата, отец на сына, сын на отца. Чом очи нам так проповідували? Бо они добри знали, што до того мусит придти, бо они были люде учены, то добри знали, што така несправедливость все на світі остати не може, штобы єдны ужывали того світа в достатках, на котры наробилися бідны люде, а тоты, што працуют, штобы голодны ходили. Они добри знали, што такий час мусит придти, што тоты выкорыстаны, кривджены люде пробудятся, порозуміют правду, просвітятся, и почнут борьбу зо своими выкорыстувачами и угнетателями. И в той борьбі не буде брата ани отца, бо коли брат буде тримати сторону панов, угнетателей, то он враг народа, враг правды и справедливости, враг новой людской культуры.

А штобы тота людска культура пришла, штобы запанувала меж людми правда, згода, братство, справедливость, то мусит быти знищене всьо то зло, котре находится в старой культурі, мусят быти знищены тоты люде, котры тото зло сіют, затемняют народ, затрувают його жытя свойом фальшивом науком, они мусят уступати з дорогы новой культурі, до котрой они не належат.

Наш Лемко-Союз, то єдна с тых многых народных світовых организаций, котра учыт наш народ той новой культуры в их жытю. И мы маме быти горды на тоту свою народну организацию, як горды другы народы на такы свои народны организации, бо она уж нас, занедбаных, затемненых лемков поставила наровні з другыми народами, с тыма народами, котры стремят до новой культуры.

Но гордым на свою организацию быти, а нич для ней не робити, а тым самым нич не робити для скоршой побіды світла над темнотом, новой культуры над старом, — та пуста гордость. Коли мы маме быти горды на свою организацию, то мы мусиме и робити для ней, бо коли робиме для той свойой народной организации, то робиме для нашого народа, а тым самым сами для себе и нашого поколіния.

Бо тота организация учыт наш народ єдинства и борьбы за лучше жытя для народа, учыт нас розуміти нову культуру, котра приходит, мусит придти, ци дакто хоче, або дакто не хоче, бо так дальше, як до того часу, люде на світі жыти не можут, штобы мордувался бідный народ, а не знал зашто и прошто, штобы люде голодували и терпіли недостаткы, коли на той землі всього дост.

Г. Иштван.
Istvan

[BACK]