Доброй Памяти Членов Лемко-Союза

СЧАСТЛИВЫМ от свого основания был Лемко-Союз в Канаді, аж до конца 1936 року. За цілый тот час не было ани одного смертного выпадку меже членами нашой организации. Правда што много членов нашых упало жертвами всякых катастроф, при роботах, на релифах, в бойовых рядах за право на жытя, через што десяткы молодого членства стратили здоровя, оставлены на ласку и неласку близких и ратунок других. Погибло много нашой лемковской емиграции в Канаді за короткий емиграцийный период в молодом віку, но мы о них не знаме, о них не можеме писати. Они не были членами нашой организации. Аж 1937 рок принюс зо собом великий удар для нашой организации Лемко-Союза, бо лем за одну половину року забрала нам смерть трох членов нашой организации и примірных борцов за права нашого народа в краю и на емиграции.

* * *

ГРИГОРИЙ ВАХНОВСКИЙ

Перву страту потерпіл молодый отділ Лемко-Союза ч. 59 в Порт Артур, Онт. Дня 20 января 1937. в тяжких муках умерал Григорий Вахновский.

Gregory Vakhnovsky, Vacknovsky, Vaknovsky, Vaknovski

Тов. Вахновский родился в 1894 р. в селі Устье Русске, Горлицы, на Лемковині. 20 літным хлопцом забрали го на світову империялистичну войну в 1914, с котрой он попался в русский плін. По розвалі Австро-Венгрии вертатся на родину в Карпаты, но не може жыти спокойно дома, а крыєся по лісах, бо польски жандармы хотят го на войну з большевиками. При полюваню на дезертеров был раненый, но пойматися не дал. Рану помагают му выгоити подобны йому товарищи дезертеры в карпатских дебрях. По войні з большевиками, и по оголошеной амнестии, заберают го на службу до польского войска, по оконченю котрой вертат дому, где женится. Но выжыти долго в той біді, яка настала по войні на Лемковині немог, и в 1927 р., лишат малых двоє дітей при грудях матери и жены, а сам выізжат на емиграцию в Канаду, глядати для себе и родины куска хліба. Свойой и свойой родины долі через безроботя поліпшати не мог. Ни повернути к родині не было с чым, ни о чом родину забрати на емиграцию. Зрозуміл, што за долю родины и бідной кляссы треба боротися. Зато, коли в 1929 року лемковскы хлопці закладали первый отділ Лемко-Союза в Виннипегу, он вступат в члены и стає первым кассиром того отділа. Потом выізжат до Порт-Артур, где прожыват переважно стало, хоц без роботы. Робил по невольничых лагерях в околици и там при лят-долларовой місячной платі, планном жытю и боссовскых спид-апах так нарушыл своє здоровя, што мушеный был подлатися двом тяжкым операциям, послі котрих о два дни на 43-ом року жытя умерат в великих муках, оставляючи жену вдовом и діти сиротами, родичов в краю и брата и сестру в Канаді. Секретар порт-артурского отділа Л. С. товариш Петрончак пише о покойном:

“Тов. Вахновский был дуже добрым товаришом и активным членом Лемко-Союза. розуміл робочу справу и боролся враз з нами за освобождение робочой кляссы из капиталистичной неволі. Он належал так само до Коммунистичной Партии Канады.”

При помершом найдено всего богатства сімдесят-пят центов. Похороном занялася организация Л. С. в Порт-Артур и Форт-Виллям, котрый устроєно в пролетарском духу. Отділы Л. С. Восточного и Полночного районов жертвували через КЦКЛСоюза для сирот Вахновского около $30.00, котры были высланы літом 1937 року.


* * *

ПЕТРО КСЕНИЧ

Petro Ksenich

Другу утрату свого члена потерпіл отділ Л. Союза ч. 21 в Торонто. Дня 26 апріля 1937 р. по тримісячном лежаню в шпытали и по трох тяжкых операциях, умер Петро Ксенич. Походил он из села Конечна, Горлицы, Лемковина. Умер молодым, на 31-ом року жытя. Приіхал до Канады в 1929 р., к брату Максиму. Безроботя обох их звольнило от роботы, так они разом бідили, глядали роботы и ходили просити релиф. Жыл переважно в Гамилтон, Онт., там стал членом Л. С. По причині безроботя не мог платити своих взносов. Участь брал, насколько му позволяли обставины на релифі. Раз удалося му достати роботу на трекі. Боссовский спид-ап розрушыл його вычерпаный организм и остал без вынагороды, сквитованый, послі чого он з’явился обратно на релиф, на котром захворіл параличом.

Коли о його хвороті в 1936 р. донесли до КЦКЛСоюза, были высланы два члены отвидіти го, а то тов. И. Ксенич и Н. А. Цисляк. Приміщеня релифове в Гамилтон, где спали безроботны, перероблене из гараджу. Діла будова пересякнена газами, а на долині находится дальше гарадж, с котрого курится цілыма днями, чути стук и гамор автомобилов по ночах. Петро Ксенич выглядал, як жалостна каліка, зогнутый в двоє. Помочы от организации не принял ниякой. При помочы брата Максима, котрый іздил по кемпах и помагал му материяльно, частично выздоровіл, як звычайно молодый чоловік. Велике наше здивованя было, коли из лісных кемп той самой осени, на Тионаго, мы довідалися, што П. Ксенич робит в лісі.

Виділ и порозуміл тот капиталистичный світ, што треба ратуватися лем роботом, и выіхал на роботу до ліса, вмісто того, штобы пойти вылічытися окончательно. Там застудился и приіхал до Торонто, просто до шпыталя, где пролежал три місяцы и при третой операции умер в так молодом віку. Был самотный и оставил в жывых брата Максима в Канаді, котрый не мог быти на похороні, и сестры, братов и маму, в Краю.

Похорон отбылся в Торонто дня 28 апріля, по пролетарскы. Похороном тоже занялася организация Л. С. в Торонто, при помочы финансовой поддержкы Л. С. в Гамилтон и Монтреал.


* * *

ВЛАДИМИР ИВАНОВИЧ ПЕЙКО

Громадна утрата, котру потерпіл не лем отділ Л. Союза в Торонто, але ціла наша организация в Канаді, то была смерть Владимира В. Пейко, примірного и активного члена и Головного Организатора Л. С. в Канаді. Умер он 29 мая, 1937 року.

Vladimir Payko

Владимир И. Пейко родился 5 сентября, 1903 року в селі Устє Русске, Горлиці, Лемковина. Хлопцом был родичами отданый на Ковальский курс в Горлицах. Днями зма гался в роботі с челядниками, а вечером посіщал промыслову школу. По окончению курса был принятый в ковальский цех, но средств не было на открытя власного варстату, то 1929 року приізджат до Канады, штобы ту заробити и устроити своє жытя, як пристоит мати робочому чоловіку. С першых дней обставины примусіли го хвататися фрейта и глядати роботы от моря до моря. Но то не помагат. Змученый, в 1930 року, он остаєся в Торонто, где на безроботю много терпит голоду и холоду. Так жыє цілыма роками. Бере активну участь, як знаменитый актор в независимом лемковском драм-кружку, а коли основался отділ Л. С. в Торонто, он на первом собранию вступат членом, и не так як то вступают соткы членов, штобы быти записаны. Он вступат и бере отразу инициятиву, и робит постоянно в отділовых кружках. Бере участь в борьбі безроботных за релиф, за скасуваня 98 секции реакцийной уставы, котра находилася в законі Канады против робочых. В 1934 р. вступат в члены подпольной Коммунистичной партии Канады, и в 1935 року маршує из Виндзор, Онт. в голодовом историчном поході на Оттаву, не смотрячы на террор, котрого мож было в кажду хвилю сподіватися, на выставлены в Оттаві пушкы и змобилизоване войско напротив маршевиков. По дорозі написал историчну статю: “3 Голодным Походом на Оттаву”, с котрой чытателі “Лемка” дозналися, як борются молоды люде в Канаді против рабскых лагеров, котры в тоты часы были заведены реакцийным правительством Беннета.

В осени того самого року был высланый виндзорскым отділом за делегата на І канадский С’ізд Л. С., котрый отбывался в Торонто, в котром он проявил много доброй инициятивы.

В місяци маю 1936 на предложение КЦКЛСоюза он радо обовязуєся идти на высший политично-просвітительный курс в Виннипегу, где за 6 місяцев учытся пильно, о чом говорят инструкторы того курса. Отбываючийся II канадский с’ізд Л. С. в Монтреал, Кве., назначат го Головным Организатором Лемко-Союза в Канаді. Владимир Пейко принимат на себе обовязок Организатора, и кажде препоручение КЦК Л. Союза выполнят точно по указаной линии, выконує щыро, отдаєся той справі организации цілом душом. Переходит он через нашы отділы Полночного и Восточного района, дає всім инструкции. Славится своим характером самокритикы, принимат на себе критику и критикує блуды, хоцбы своих найблисшых приятелей. Отверто стає в обороні национальных и социальных прав для нашого карпаторусского народа, для бідного свого племени лемков, котрыма он нигде не встыдался, все был гордый на свою материнску бесіду, народну співанку. Веселый и бодрый при каждом хоц и тяжком труді. Жытьова практика выробила в нем твердый незломный характер. Любил он свой народ, и каждый, кто знал тов. Пейка лично, мусіл го любити.

Місяц перед смертьом получил канадскы гражданскы папери, котры власти не хотіли му выдати за пару літ. Умер на 34-ом року жытя на удар сердца, скоропостижно, в Гамилтон, Онт. Похороненый дня 1-го юня, на “Проспект Цминтар” при великой участи народных масс в Торонто, при участи представителей центральных робочых организаций в Канаді. Як передовый член в нашой организации оставил для наслідуваня каждому з нас честне жытя роботника. В свойой діятельности он выразил, што треба боротися за новый світ и новых людей, меже котрыма не буде высшых и нисшых, славленых и поневераных, солодкых и горьом мученых, а будут ровны братя в правах на жытя и свободу.

Похорон, як свому организатору, справили всі отділы Л. Союза в Канаді, и многы из них прислали на гроб покойного вінкы в знак любви и почести за заслугы для нашой организации и нашого народа.


* * *

Три молоды жертвы из нашой организации за половину одного року. Забраны они капиталистичном системом перед часом зо світа. Причина их вчастной смерти капитализм, в котром богатый класс, выключаючы несподіваны выпадкы, дожыват в выгоді и роскошах глубокой старости, а бідный класс истощеный, от первой годины свого народженя, бідує ціле жытя, и в половині людского віку умерат.

Наша передвоенна емиграция в Америкі ище дожыват до 50 — 60 — 70 літ жытя, но николи до такого віку не дожьіє повоєнна емиграция в Канаді. Уж из той емиграции погибло десяткы в Канаді.

Причина тому одна. Передвоєнна емиграция не пережывала войны. Повоєнна емиграция, хоц гдекотры и не были на войні, хоц в тот час они ище были дітми, але были всі на фронті, бо тот фронт был в Карпатах, а там панували заразливы хвороты, тифусы, нужда и голод. До того ище причинилося повоєнне гаруваня, страх за заран, а в Канаді фрейт кары, безроботя, згнилый релиф суплайны и спид-апы, а часом и демократичны полицманскы клобы. То сут причины, за котры маме право обвиняти капитализм враз з його нездалом неотповідном для людского жытя системом. Позбавитися капитализму, то значыт позбавитися такой передвчасной смерти, бо днеска уж каждый видит, што нова социялистична держава, Совітский Союз, дала свойой молодежы розвития, она здорово выхована физично и духово, весела и задоволена, прогрессує, бо она позбавлена біды, позбавлена смутку о заранишний день, котрый то смуток так много поідат здоровя робочой молодежы при капитализмі. Капитализм, то система, котра жыє молодыма жертвами робочого классу.

Три жертвы забрал нашой организации в Канаді капитализм за одну половину року. Всі три молоды. Были то борці за свободу, за нове жытя молодежы и робочого народа. Треба нам соєдинитися в организации и организации злучыти в оден могучий народный фронт, заполнити нашы ряды новым членством, и одном народном силом знищыме капитализм, бо инакше он нас по одному выгубит, выгубит найкрасшых борцов, якы выходят из робочого классу. Не оставляйме их самых в борьбі, а помагайме им соєдиненыма силами боротися. Товды лем их побореме, и настане новый, справедливший світ, в котром отродятся нагаруваны люде, и их потомство буде кріпке, веселе и счастливе, а тым самым и жыти буде долше, як жыєме днеска мы.

Н. А. Цисляк.

———o———

ЙОСИФ ЯРЕМБИНСКИЙ

Наша карпаторусска робоча колония в Нью Йорку стратила минувшого року одного из найліпшых и найсознательнійшых своих членов и товаришов, а то Йосифа Ярембинского.

Joseph Yarembinsky

Йосиф Ярембинский родилдился 11-го мая 1889 року, в селі Ярембина (Орябина), на Спишу. Служыл в австро-венгерской армии, и коли пришла світова война, то был взятый на войну, где набавился хвороты на почкы (ныркы), котра то хворота запричинила предвчасну його смерть.

В часі войны Ярембинский попал в русский плін, в котром он ище больше полюбил русский народ, и взагалі Россию, но народну, робочу, а не царску Россию. Царский режим он зненавиділ. Но тягло го в своє родне село до свойой родины, так што вернул в Ярембину, а што дома не было як жытя устроити, то мусіл опустити родне село. В Россию вертати не мог, потому што в тоты часы было дуже трудно из Чехословакии достатися в Сов. Союз, чехословацке правительство даже не признавало, што така держава существує на світі. И як всі нашы лемкы, котры не можут выжыти на свойом куску землі, так и Ярембинский выіхал перед 16 роками в Америку. Ту за цілый час працувал в одном будинку в Нью Йорку.

Но мимо того, што ту все працувал и устроил своє и свойой родины жытя, як и другы нашы емигранты роботникы, котры без перервы працуют, Ярембинский не переставал думати, якбы он мог достатися в Сов. Союз и там працувати для робочой державы. Итак, Ярембинский, зо своими братями и зятьом, и другыми своими краянами вписался в школу механиков в Бруклину основану американскыми роботниками с тым, штобы выучыти трактористов и механиков для Сов. Союза. В 1933 року многы из учеников той школы выіхали зо своими родинами в Сов. Союз на роботу. Там они основали свою колонию в Бавленах — 6 годин ізды треном з Москвы, и открыли мастерску поправкы тракторов и другых земледільскых машин.

Гдекотры из краянов Ярембинского сподівалися специальных привилегий и выгод, яко емигранты, а коли тых сподіваных привилегий и выгод не получили, вернули скоро назад и почали клеветати на Сов. Союз.

Йосиф Ярембинский працувал в Бавленах 2 рокы и не хотіл уж вертати в Америку, но ту рождены діти не могли привыкнути до тамтого жытя и климату, так што Ярембинский был змушеный вернути.

Ту, як нашы чытателі собі припоминают, он выступил в “Лемку” против гдекотрых своих краянов, котры клеветали на Сов. Союз, и доказал им их фальшиву натуру в своих дописах.

До послідных своих годин жытя покойный Ярембинский интересувался успіхами Сов. Союза и народной Испании.

Што покойный Йосиф Ярембинский остался вірный до конца робочой кляссі, то найліпшым доказом того його робота среди своих блисшых краянов аж до свойой смерти. Он был один из основателей карпаторусского отділа И. Р. О. котрый принадлежал до словацкой секции, он умер предсідателем того отділа (2138). Стоял членом Л. С. и чытателем газеты “Лемко”, нашу организацию уважал за свою родну, найблисшу.

Умер Йосиф Ярембинский 23 юня, похороненый был своими товаришами робочыми 26 юня.

Оставил жену Марту, выдану доньку и двох доростаючых хлопцов. Всі они робочого духа.

Земля йому пером!


* * *

МИХАИЛ КОРМАНИК

Михаил Корманик, молодый лемко американец, всього 19 літ от роду, погиб несподіваном и трагичном смертьом. В субботу 7 августа, М. Корманик выбрался в Кони Айленд купатися и уж больше не вернул. Якоси так несчастливо скочыл в море, што ци там ударил в якийси предмет, ци достал корчы жолудка, але як го вытягли з воды, уж не могли го до жытя вернути.

Michael Kormanik

Михаил Корманик родился в 1918 року, в Джанставн, Па. В 1920 року родичы іхали до краю, до свого села Гранастова на Спишу, то взяли зо собом и маленького Михала. В краю он вырос на тугого и высокого молодого чоловіка, и два рокы тому назад приіхал в Америку. Як праві всі нашы діти, котры родилися в Америкі, а выхованы были в краю, иншы от ту рожденных и ту выхованых нашых дітей, бо они тримаются свого народа, а в нашых народных организациях они найдіятельнійшы, так покойный Михаил Корманик был дуже діятельный хлопец при нашых карпаторусскых народных организациях в Нью Йорку, так што члены тых организаций покладали на него велику надію. Организованый недавно Карпаторусский центр в Нью Йорку выбрал го своим секретарем и менаджером клуба, а карпаторусский отділ И. Р. О. своим рекордовым секретарем. Нич дивного, што на його похоронах плакали старшы люде, члены тых организаций. Карпаторусска колония в Нью Йорку, а специально карпаторусска молодеж, стратила свого лидера.

Земля йому пером!


* * *

ТЕОДОР ФЕДОРОВСКИЙ

Theodore Fedorovsky

Покойный Теодор родом из села Устье Русске, повіта Горлицы. Приіхал он в Америку и поселился в городі Чикаго, Илл., где прожыл до 65 року жытя. Был он идейным пионером в народной роботі.

Покойный Федоровский был первым членом и основателем отділа Лемко-Союза в Чикаго, Илл. и первым фин. секретарем того отділа. Для нашой организации працувал он щыро и безкорыстно, и в нем наша организация стратила цінного народного труженика. Он помер 21 марта, 1937 року.

Земля йому пером!



[BACK]