Народный Фронт
РОК ТОМУ назад мы ище дуже мало слышали за Народный Фронт. А сегодня ніт такого чоловіка в Европі и Америкі, котрый бы не знал за народне движение, народный рух, котрый называтся Народный Фронт. Тоты два слова доходят уж в найдальшы закутины нашой землі, переходят из уст до уст. Из того уж видно, што тот народный рух под именем Народного Фронта має огромну силу. Сегодня уж тот Народный Фронт веде кроваву борьбу против дикого фашизма в Испании, тот Народный Фронт поставил своє правительство в Испании, Франции, Мексику. Пред тым Народным Фронтом дрожат зо страху Гитлер, Муссолини, польскы, мадьярскы паны, румынскы бояре, банкиры и капиталисты. А всего лем єден рок, як дакто из нас слышал за Народный Фронт. И в так коротком часі он возрос в таку силу, росне и кріпне дальше, в большу, в огромну народну силу, в демократичных державах открыто, на очах всіх, в фашистскых державах под земльом. Нияка сила врагов народа не може встановити роста силы Народного Фронта.


Длячого Народный Фронт

Уж тоты два слова “Народный Фронт” говорят нам сами, што то народне движение, народный массовый рух, народна организация обороны перед даякым ворогом народа. Што народу, його жытю, грозит даяка велика опасность, велике небеспеченство, яке николи пред тым не грозило.

Ци грозит народу даяке небеспеченство, яке николи пред тым не грозило? Ци грозит нашому жытю даяка опасность? Так, грозит, и то велика опасность жытю народных масс, яка ище николи в истории не грозила, а том страшном опасностьом для жытя народных масс, то фашизм и война.

Але зачым придеме до фашизма и войны, подумайме о жытю, котрому тоты страшны потворы, страшны врагы человіка, загрожают.


О жытю.

Ци єст для чоловіка дашто дорожше от жытя, от здоровля? Каждый здорово думающий, при здоровых смыслах чоловік мусит признати, што для чоловіка найдоржше жытя. Бо што кому из нас с даного на світі, коли мы помреме. Та и коли нашы найблисшы поумерают, нашы братя, сестры, нашы діти, то найбольший для нас смуток. И мы видиме, што лем дуже несчестный, нездоровый чоловік способен сам наложыти руку на своє жытя, но коли чоловік яко-тако може жыти, який такий кусок хліба має, яке таке здоровля, то он хоче жыти, он не хоче умерати, он готовый отдати всьо от себе, лем штобы спасти своє жытя. Он го спасат за всяку ціну.

И коли каждому из нас, особно, найдорожше жытя, то так само найдорожше жытя всім нам разом, народу, цілой массі. Но минувшы войны доказуют нам, што тым, котры доводят до воєн, до массового мордерства, истребления людей, до массовой смерти, єст дашто дорожше от жытя народа. А тото дорожше для них, то их богатства, маєткы, капитал, золото, земля, словом, их приватны богатства и прибыли, заробкы на смерти и біді народов. У тых богатых, пажерных людей, жытя людске не цінится, лем их власне жытя и их приватне награблене богатство. Они стараются при помочы того свого богатства якнайдолше и найліпше жыти. Видно из того, што для них тоже жытя найдорожше, и они стараются, штобы оно было у них найсолодше, хоц бы коштом смерти миллионов бідного народа. И так было за цілый час людского жытя и його розвитя, што клясса богата старалася продолжыти и осолодити своє жытя коштом бідных масс народа. Так она вела господарку земныма богатствами, для свого солодкого жытя. Она пановала над народными массами и давала тым массам таку науку, яка была выгодна для богатых.


Капиализм, фашизм и война.

Капитализм, то теперишня система господарства земными богатствами, от котрого зависит дальше жытя и розвитя людства. О той системі господарства єст велика наука, котру мы ту всю не можеме привести, бо на тото ніт міста. Скажеме лем, што были великы учены и пророкы людского жытя и розвитя, котры предсказали уж 100 літ тому назад, што на тоту систему господарства, на капитализм, мусит придти великий кризис, што тота система окажеся совсім недобра для людского жытя и розвитя. Што мимо того, што люде при остатной стадии капитализма дойдут до найвысшой продуктивности труда, до изобылия продуктов и всякых товаров для свого употребления, они тых продуктов и товаров не будут мочы ужывати, при горах хліба будут массово померати з голоду, при стосах одежы и обутя будут обдерты и босы.

И мы гнеска видиме тото на свои власны очы, што тото всьо так єст, до того приходит, што при огромном богатстві продуктов и всякых товаров штораз то больше людей голодных и обдертых, мусят обходитися без продуктов, або жебраным хлібом жыти, все больше и больше людей на світі без роботы, або робят даяку штучно непотребну роботу, або роботу шкодливу, робят аммуницию, оружие, газы, сами против себе, на свою погибель, на свою смерть.

А єст так длятого, бо всі средства для жытя народа, земны богатства, средства продукции захватили капиталисты, банкиры, компании, группы и установили собі монополии на всьо, а газдуют тыма земныма богатствами без всякого взгляду на жывый народ, лем зо взглядом на свою прибыль, своє взбогачыня. Каждый зрящий чоловік видит, што тым монополистам на земны богатства, на средства до жытя для народных масс, совсім не росходится о людей, а лем о свои доходы, о свои богатства.

И коли бы народы оставили так дальше тых капиталистов газдувати средствами людского жытя, то они с часом готовы всьо згромадити на купу и сісти сами на нью. Вшытко, што уступят из свого богатства, то лем для фашистской армии и полиции, штобы боронила их и их богатств пред голодным народом.

Капитализм вошол в остатню свою стадию розвитя, в т. з. стадию империялизма, котра принесла зо собом фашизм и страшны империялистичны войны за новый переділ мира и земных богатств. В тых войнах, при новых выдуманых людми и побудованых для капиталистов машинах, буде нищытися жытя людей массово, а о нич инше ту не буде росходитися, лем о тото, котра группа капиталистов має забрати другой группі капиталистов богатства, бо новых богатств, новых колоний уж ніт, цілый світ уж поділили меж собом, тепер мусят єдны другым отберати.

Но штораз то больше народа прозріват и видит тоту несправедливу господарку капиталистов, штораз то больше народа чує тоту несправедливость жытя, бо чує біду, нужду при огромных богатствах. Народ протестує. Но тот протест капиталистам так долго не страшный, як долго народ против них не организованый, як долго не розуміє, длячого оно так єст, што пришол такий кризис капитализма, бо мал придти, мусіл придти по причині розвитя капитализма. Того кризиса не хотіли ни капиталисты ни коммунисты, о котрых столько тепер чуєме. Ни єдны ни другы не хотіли кризиса и не привели го, а он пришол сам собом. А выход из него єст лем єден: Змінити систему господарства так, штобы люде вырабляли, продуковали не для прибыли и дальшого взбогачыня капиталистов, а для свого ужытку, для свого жытя. Но хоц капиталисты сами нароком не спровадили кризиса капиталистичного господарства, и они не хотят того кризиса — то ниякым способом, ни на просьбу ни на грозьбу не отречутся той свойой системы, бо мусіли бы отречыся богатств, прибылей и свойой власти над світом и над народами. Зато они мусят боротися против всіх тых, котры бы хотіли змінити систему господарства, а найперше мусят боротися против всіх народных робочых институций, организаций, котры дают народу науку, мусят боротися против просвіты и прогресса народных масс, бо от просвіты и прогресса народных масс грозит им найбольше небеспеченство.

Тота борьба против народа, против його народных организаций, против наукы, культуры и прогресса народных масс — то єст тот фашизм.

Фашизм, то брудна борьба капитализма против народа, прогресса и жытя — фашизм, то оборона гнилого капитализма — фашизм против культуры — фашизм дикость, фашизм хоче вернути людство в темны часы — фашизм несе зо собом смерть для людей и цілых народов.

Откаль черпат свою силу фашизм? Фашизм черпат свою силу найперше из гнилого капитала. Капитал має в своих руках прессу, контролює школы, має на службі духовенство и хмару своих агентов, капитал контролює правительства и державы. Но все-таки, тоты капиталисты со всіми своими богатствами, агентами и политиками не мали бы ниякой силы против народа. Они из тых своих богатств, агентов и политиков не способны такой силы утворити, котру бы могли поставити против народных масс и народной силы. Они мусят ставити против народной массы — другу народну массу, против народной силы другу, несвідому народну силу.

Мы николи не чули, штобы Морган, Рокфеллер, Форд и другы капиталисты, в часі страйку, боролися сами против робочых. Но, они высылают против робочых своих агентов, свою полицию, а коли того мало, то и войско. Однако всього того мало против робочой массы, робочу массу, страйкаров, не може побідити ни полиция, ни войско, бо робочым не треба надставлятися, не треба наступати и битися ни с полициом ни с войском. Им нич не треба, лем не идти до роботы, покаль не получат то, чого требуют. И капиталисты знают, што никто другий не побідит робочых, лем сами робочы, несвідома, неорганизована, сліпа масса, “скебы”. И в часі страйку вся сила капиталистов не в полиции, агентах и войску, а в скебах, в несвідомой робочой массі. Коли капиталисты побіждают в робочых страйках, то лем при помочы самых робочых.

Так и тепер, при упадку капитализма, старой системы — не можут спасти капитализм сами капиталисты, ани их агенты, ани полиция, ани армия — капитализм ище долго може триматися, але лем на самых робочых, на их несвідомости. И фашизм, тот организованый оборонця капитализма, головны свои силы черпат из темной части народа, котру затруват фальшивом науком через капиталистичну прессу, духовенство и всякых профессиональных платных политиков и агентов.

Тоты панскы слугы, духовникы, редакторы, всякими хитростями, фальшивыми науками, клеветами, при помочы религийного або национального чувства народа, при помочы роздуваня расовой, национальной, религийной, державной ненависти, або попросту смішныма байками и приповідками стараются отвернути увагу народной массы, той темной несвідомой єй части, от правдивых причин біды, от правдивых причин голода и нужды, а представляют єй фалфшивы и смішны причины той біды.

Гитлер приміром потрафил ошукати німецку несвідому массу таком неправдом, што причина єй біды в євреях, што євреи ідят добро німецкого народа. В Польші страшна біда, а тоту біду привела на Польшу безмыслна панска господарка. Но паны и их агенты, штобы спасати свою скору, говорят, што тому виноваты євреи. И темный бідный народ вірит тому.

Німці выбили євреєв, одобрали недобиткам всякы права, но тепер видят, што мимо того, их жытя не лем не поправилося, але ище погоршылося. И тепер уж им Гитлер повідат, што то зато, бо в России сут євреи, што тамтых треба выбити, а цілу Россию, Украину, Сибир, треба забрати, то уж втоды будут всі німці плавати в маслі. И єст масса затемненых німцев фашистскым фальшом, фашистском препагандом, што тому вірят. Они вірят, што они будут в силі завоювати цілый Сов. Союз. На той темной, несвідомой, ошуканой німецкой массі триматся Гитлер, а с ним и німецкий грубый капитал, тота главна причина нужды и біды німецкых народных масс, продолжат своє существование и страшну експлоатацию німецкого народа.

В Америкі, фашизм старатся набрати силы в народных массах через пропаганду ненависти до чужинців, штобы отвернути увагу от правдивой причины безроботя и біды. Ниже подаєме отбитку одной карточкы-летучкы, котра роспространятся меж американскым народом в миллионах.

Вы дораз зауважыте, што авторы той статистикы сами не вірят тому, чому хотят заставити вірити народ. Они сами добри знают, што они кламут, што шырят фальш, они сами морально упавшы люде, но и так ганьблятся свого поступка, ганьблятся тых людей, котры розуміют, яку ціль они переслідуют. Они знают, што тот поступок, тота пропаганда не лем не людска, дика, але она совсім фальшива, ошукує не лем чужинців, а самых 100 процентовых американнов, тота некультурна пропаганда, понижат культурну Америку. То найбольшы врагы Америкы шырят таку некультурну пропаганду и хотят Америку понижыти пред культурным світом.

Но але то найліпший примір фашизма, так што мусиме ліпше призрітися тому приміру.

Так на одной стороні видиме рисунок, як “чужинец” (форнер) дає “кика” ту рожденному молодому американцу, а сам бере його “дзяб”. Такым рисунком американский фашист хоче “поучытй” и “доказати” образово молодым безроботным американцам, што коли они не мают роботы, то лем зато, што их роботу забрали чужинці иммигранты.


DearCongressman

Посмотме на другу сторону той карткы, где найдеме статистику иммиграции, чужинців, котрых єст 16,500,000. Уважме, што он в тых 16 и пол миллионах обнял всіх иммигрантов, чым он хоче взбудити ненависть ту рожденных, даже дітей до их отцов и матерей. Бо коли бы он хотіл взбудити ненависть лем до ненатурализованых, то подал бы лем число ненатурализованых. Но коли дакому не говорит до совісти ненависть до натурализованых, то може скорше му говорит до 7,500,000 ненатурализованых, тым больше, што по той його статистикі полтора миллиона из них на релифі, а 6,000,000 тримат тоты “дзябы”, што могли бы тримати ту рожденны американцы, коли бы тых 6,000,000 чужинців не было. А и тым полтора миллиона релифу бы не треба давати, якбы их совсім не было, якбы их так в Атлантик “здомпувати”.

Но але кого ище не мож рушыти и тым, против иммигрантов, то уж напевно каждому заговорит до розума и до совісти 3,500,000 нелегальных иммигрантов, тых уж всіх якнайскорше треба полапати и дагде здомпувати.

Мы не будеме писати о заслугах иммиграции для Америкы, бо о тых заслугах иммигрантов для розвитя Америкы пишут, и признают тоты заслугы и жертвы иммигрантов, всі честны и культурны американцы. Всім нам извістно, што иммигранты побудували першу в світі американску индустрию и поставили єй продукцию на такой высоті, што американска промышленность и земледілие може выробити столько всякых продуктов, товаров и материалов для будовы, што Америка може легко накормити, приодіти и набудувати домов для два раз столько населения, як має сегодня, разом со всякыми “чужинцями”. Значыт, уж из того самого ясно, што не иммигранты причина недостатков и безроботя, а система.

Велике кламство, фашистский фальш, обрахованый на глупоту молодых американцов, така пропаганда, што коли позбытися столько а столько миллионов иммигрантов, то их дзябы заберут американцы, бо ясно каждому думаючому, што с тыма людми пропадут и их “дзябы”, хоц може не на том самом місті, то на другом — бо тоты миллионы иммигрантов ідят, одіваются, мешкают — употребляют продукты, и як их не стане, то о столько товаров и продуктов буде треба менше, и 6,000,000 американов не лем не отдідичат “дзябы” по иммигрантах, але ище миллионы стратят свои “дзябы”, бо не буде для кого продуковати, вырабляти. 16, ци 7, ци 6 миллионов населения сконсумує и употребит за миллиарды долларов всякых продуктов и річей, котры выраблят миллионы американцов, а коли тых иммигрантов не буде, то тоты миллионы потратят свои “дзябы”.

Тота справа совсім ясна капиталистам и их агентам фашистам, но коли они тото пишут, то лем штобы затемнити и ошукати несвідомых того. Ище єдно мусиме вспомнути, што капиталистам совсім не росходится о депортацию иммигрантов, они в душі против депортации, им дуже выгодны и то ты нелегальны иммигранты, бо тоты нелегальны робят им под вічным страхом за найнисшу плату. Они за депортацию, але лем организаторов и учытелей роботников. Они розуміют, што при иммигрантах они все ище можут ділити роботников и щути єдных на другых, што при том розділі роботников на американов и чужинцов, они можут черпати силу для фашизма из робочой массы.

Двояка ціль тых авторов той карточкы, котру они шырят меж американскым народом:

1. Поділити американскых роботников на иммигрантов и ту рожденных, штобы они ненавиділися. При такой ненависти трудно им организоватися. При такой ненависти добрый грунт для американского фашизма.

2. Тримати иммигрантов в вічном страху, рабстві и покорі, и далеко от робочых организаций, под грозьбом депортации.

Но кромі такых штук, як выше приведена, фашизм має и другы штукы. Герст страшыт всіх “коммунизмом”, а коммунист у него каждый культурный чоловік, котрый бореся против фашизма, котрый открыват облуду фашизма — каждый свідовый роботник, каждый организатор робочых юний, котрый не хоче запродати себе капиталу, у Герста коммунист. У Герста коммунист каждый, кто признає свободу слова и прессы. Коли чытате прессу Герста, то вам ся здає, што уж вся Америка, разом с єй правительством в Вашингтоні, то нич, лем коммунисты, котры слухают приказу 3-го Интернационала. У Герста лем єдна дорога до фашизма для обороны грубого капитала: Страшыти страшным кровавым коммунизмом, штобы лем отвернута увагу от правдивых причин безроботя и нужды американского народа, а нагнати го в сіти фашистов. Он, правда, и против “фашизма”, но сам всьо робит по фашистскы. Против капиталистов Герст сам не выступат, бо му не выходит, он сам грубый капиталист. Но зато он и його товаришы грубы капиталисты, штобы большу массу легковірных ошукати, мают и такых агентов, што выступают против капиталистов и банкиров.

Патер Каклин типичный фашист. Його задача брати массу агитациом против капиталистов и банкиров, але в интересі капиталистов и банкиров. Каклин полнит ролю Гитлера. Гитлер назвал свою партию, штобы ошукати народ, достатися до власти и боронити-грубый капитал в Германии — назвал свою партию “народно-социалистичном”. Патер Каклин назвал свою, партиом “социальной справедливости”. И громит патер Каклин на каждом казаню капиталистов и банкиров. Но он против робочых организаций, робочых юний, он найбольший враг Рузвельта, а лем зато, што Рузвельт допускат робочым право на независиму от капиталистов индустриальну юнию. Капиталисты и банкиры добри розуміют, што ниякий крик попа Каклина не лем им не пошкодит, але поможе, бо збаламутит тых роботников, што чуют на собі тягар капитализма, але не розуміют, як боротися против експлоатации, они лем злость и боль чуют, чуют свою кривду, але ище не розуміют, што ніт ниякого другого способу борьбы за свои права, лем массова индустриальна робоча юния, юния всіх роботников, не лем даякых выбраных, яка десята часть. Штобы збаламутити тоту массу, передовсім католицку, капиталисты выбрали собі католицкого попа Каклина для той роботы, и сказали му: “Крич против нас, сколько хочеш, нам твой крик нич не пошкодит, лем не допуст своих вірников до робочых организаций. Мы лем массовых народных робочых организаций боимеся”...

Но и капиталисты и банкиры, подумайте собі, помагают попу Каклину кричати против себе, лем жебы розбивати робочий народ. Бо тота “социальна справедливость”, котром патер Каклин выкручат, то чысте надувательство, ошуканство, ниякой социальной справедливости в його программі ніт. Тота його “социальна справедливость” така сама, як “социализм” Гитлера.

Як видиме, то фашизм подходит с каждой стороны, штобы лем розбити народ на враждующы группы. Фашизм подходит к робочым ажи через новый, "четвертый интернационал”, через Троцкого. А не треба николи забывати, коли говориме о фашизмі, што фашизм придумали капиталисты для продолжения свого господарства народными добрами, для свого дальшого взбогачыня.

Но фашизм тому их господарству не поможе, капиталисты не можут дати роботы безроботным, не можут обеспечыти жытя народу. И народны массы в фашистскых державах переконуются, што фашизм им ничого не дал, ниякых своих обіцянок не выполнил, кромі вооружений. Так што капиталистам и фашизму остає ище лем єдно средство, єдна збродня, штобы ище потриматися який час, а то война.

И мы видиме, што дві збанкротованы фашистскы европейскы державы уж лем в войні глядают продолжения свого существования. Муссолини кинулся на Абиссинию. Завойовал Абиссинию, но тота выграна война не лем не улекшала жытя итальянскому народу, но погоршала. Итальянскы народны массы страшно обідніли, народ ходит голодный и обдертый, предвчасно вымерат.

Но фашизм не може занятися уліпшыньом жытя народа, бо для того потребны социальны реформы, а такы социальны реформы нарушат панов и капиталистов, чого фашизм, як их вірный слуга, робити не може.

И потому фашизм мусит глядати дальшой войны, штобы ище продолжыти своє существование. И видиме, што так Гитлер як Муссолини глядают войны. Наразі нашли тоту войну против испанского народа. Никто инший, лем Гитлер и Муссолини почали войну против испанского народа. Бо они знают, што як долго в Испании буде война, так долго они будут триматися. Побіда Народного Фронта в Испании буде смертельным ударом для світового фашизма.

Грозят они войном Сов. Союзу, але откладают на конец, як уж буде их добри припікати, бо они розуміют, што война против Сов. Союза принесе для них остаточну розвязку, остаточный конец. Откладают, як можут найдальше тот свой конец.

И вот нам, всім роботникам и селянам, всім культурным людям, всім честно трудящимся, всім народам, треба творити оборону против дикого фашизма и войны, треба творити охорону людского жытя, людского доробку, людской культуры пред дикым фашизмом. Том обороном и охороном для народа може быти лем общий


Народный Фронт.

Кто творит Народный Фронт?

Народный Фронт творят всі сознательны роботникы и селяне под предводительством своих робочых и селянскых партий и робочых и селянскых культурно-просвітительных организаций. Для всякого роботника и селянина місце в Народном Фронті, а не в фашистском фронті. Єсли в фашистском фронті против Народного Фронта стоят даякы роботникы и селяне, то стоят тоты, котры не можут ищы думати своим розумом, а думают розумом своих ворогов, собі на згубу.

Народный Фронт творят всі честны учены люде, всі честны интеллигентны, писателі, профессоры, честны учытелі народа, всі тоты высшы люде, котрым дорожша культура и прогресс людства от классовых привилегий. В Народном Фронті против фашизма и войны, стоит ціла одна найсильнійша держава на світі, в котрой побідила нова народна культура над старом панском, капиталистичном культуром, а то Сов. Союз.

Итак, Народный Фронт против фашизма и войны творит найліпша, найкультурнійша часть человічества, так ліпша часть народной массы, роботников и селян, як и ліпша часть интеллигенции.

Напротив, фашистский фронт творят пажерны капиталисты, их платны агенты и несвідома, затемнена часть роботников и селян.


Народный Фронт мусит побідити.

Уж тото само, што в Народном Фронті стоит ліпша, культурна и честна часть ученых, писателей и другой интеллигенции, и честна, свідома, культурна и организована часть народа, культурна часть роботников и селян, ручыт за побіду Народного Фронта над дикым фашистскым фронтом.

Ручыт за побіду Народного Фронта и його быстрый рост. Таж рок тому назад мало кто из нас ище знал о творению народного фронта против фашизма, коли мы уже давно знали о фашизмі, о фашистском фронті в Италии и Германии. Больше як десят літ мы чули о фашизмі, а от року чуєме о Народном Фронті против него. Но за тот рок Народный Фронт набрал в світі огромной силы, його наука, його идеи, доходят в кажду закутину світа и одушевляют народны массы. В том одном року Народный Фронт выбрал свои правительства в Испании и во Франции. Передовсім во Франции, в самой передовой державі Европы, побіда Народного Фронта на выборах має огромне значение и свідчыт о огромной силі Народного Фронта.

Народный Фронт мусит побідити, бо он ставит свой фундамент и будову на просвіті, культурі и прогрессі народа, втоды як фашизм черпат свою силу из некультурности, темноты и заотсталости народных масс. Но чоловік не може итти взад, лем як все ишол вперед, так и тепер мусит вперед итти. А вперед итти, то значыт итти к культурі, к прогрессу, к світлу. Таке єст право розвитя. И зато Народный Фронт розвиватся, иде вперед, а фашизм лем на короткий час може вернути часть темнійшого народа взад, но скоро народ опамятатся и верне вперед, а то значыт переход в Народный Фронт. Ниякы тымчасовы побіды фашизма нич не значат, они лем тымчасовы, тымчасове затемнение, тымчасове збитя чоловіка с правильной природной дорогы прогресса, покаль он не зауважыт, што зблудил, што иде против своих интересов и против природы.

Народный Фронт мусит побідити, бо фашизм не може дати народным массам жытя, у него ніт программы жытя, ніт ниякого народного плану господарства, фашизм не признає жытя для другых, лем хоче жыти сам коштом другых, коштом жытя другых, коштом рабунку и розбою. Зрештом, нам не треба ниякых такых доказов, старчыт нам право природы, право розвитя, котре нам говорит, што вшытко жыве розвиватся, коли оно має жыти. Єсли чоловік має жыти, мусит розвиватися, мусит мудріти. И чоловік мудріє. Мы видиме, што мудрійша часть людей, роботников и селян, трудящихся, творит Народный Фронт. Мы видиме, што тот фронт кріпне с каждым дньом, што каждый день он сильнійший коштом фашистского фронта, што и тот роботник и селянин, котрый по свойой несвідомости попал в фашистский фронт, скоро освідомлятся, мудріє, и переходит в Народный Фронт, там, где його природне місце. А тым самым фашизм слабне, а Народный Фронт кріпне. И коли Гитлер, Муссолини и Герст почали так в остатных часах на всі стороны метатися, то лем зато, бо видят, што их ряды ріднут, а ряды Народного Фронта роснут.

Народный Фронт мусит побідити, як мусит побідити культура, прогресс и світло — над дикостьом, заотсталостьом и темнотом. Так все было, так буде и тепер.

Народный Фронт мусит побідити свойом народном программом жытя, над фашистском программом смерти.


Народный Фронт за братство народов.

Фашизм проповідує, для затемнения народа расову высшость. Гитлер учыт німцев, што они избранный народ, што всі другы народы, то нисшы расы, и потому всі мусят слухати німцев, мусят быти рабами німецкых фашистов. Первых треба завоювати славян, поработити их, а их землю забрати, бо они, яко нисша раса, не вартают той землі, на котрой жыют. Тота земля належытся німцам.

Но то само учыт Муссолини итальянцев, што итальянска раса найвысша, бо итальянцы потомкы старых римлян, котры даколи пановали над цілым знаным світов.

То само повідат Герст, што 100 процентовы американцы першы люде на світі и им належытся вшытко, а другым нич. То повідают фашисты польскы, мадьярскы, а даже нашы русскы и украинскы. Розумієся, што то єст глупость така национальна наука, бо то значыт вічна национальна вражда, ненависть и война. Фашисты и их боссы капиталисты дуже добри розуміют, што то єст глупость така национальна наука, бо каждому народу належытся жытя на той землі — но им тота наука потребна для затемнения народов, штобы могли их выкорыстувати. Им потребна вічна национальна вражда, ненависть, котра родит войну, на котрой они зарабляют.

Народный Фрогіт учыт нас, што каждый народ и каждый чоловік має ровне право на жытя на світі, каждому народу належытся национальна свобода. Каждый народ має право учытися и розвиватися на свойом родном языку. Єсли котрый народ стоит ниже культурно, то виноваты тому тоты, котры не дали йому можности учытися и розвиватися, виноваты угнетателі, виновата біда. И тепер ліпше культурно розвитый народ должен помочы заотсталым народам розвитися. Освобождены национально народы дуже скоро будут розвиватися и скоро догонят передовы народы.

Народный Фронт против национального гнета, национальной неволі, а за правдиву национальну свободу всіх народов, и длято — он мусит побідити над фашизмом, котрый не признає свободы и ровности народов.


Народный Фронт за социальны реформы.

Народный Фронт мусит побідити, бо он признає право на жытя для каждого чоловіка и бореся за тото право. Фашистский фронт стоит за стару капиталистичну систему, он будуєся лем для той одной ціли, штобы оборонити тоту стару систему, котра признає право на жытя и полну свободу лем богатой маючой кляссі. Жытя массы народа при капитализмі не обеспечене, бо всі средства до жытя и труд народа привластила собі богата клясса и через привлащены земны богатства, средства до жытя, контролює жытя народа, богата клясса диктує жытя народу. Або вы будете жыти так, як хоче Морган, Рокфеллер, Меллон, Форд — або помрете з голоду.

Народный Фронт повідат, што в культурном світі так быти не може, штобы жытя миллионов народа зависіло от пару капиталистов и банкиров и от их агентов фашистов, а што народ сам должен роспоряжати своим жытьом. То возможно лем через социальны реформы, такы реформы, такы права, такы законы, при котрых сам народ буде властительом земных богатств и средств до жытя, властительом плодов свого труда. Зрозуміло и ясно для каждого, кто лем хоче порозуміти. И все больше и больше такых, котры розуміют, длятого Народный Фронт мусит побідити.


Народный Фронт за правдиву демократию.

Говорят нам много о демократии. И Герст говорит о демократии и Каклин говорит о демократии, як Гитлер говорил о “социализмі”. Демократия дословно значыт “власть народа”. Но не може быти власти народа там, где пару єдиниц контролює богатства державы, средства до жытя, а через то выборы и правительство. Правдива демократия може быти лем при ровном праві на жытя.

Народный Фронт за ровне право на жытя для всіх, фашистский фронт лем за право на роскошне жытя для богатой кляссы — длятого Народный Фронт мусит побідити, лем коли большинство народа порозуміє программу Народного Фронта, а мы видиме, што с каждым днем все больше и больше людей розуміє, длятого Народный Фронт мусит побідити над фронтом фашизма, котрый триматся лем на сліпоті народных масс, на ошуканстві, на религийной и национальной ненависти, словом, на темноті и дикости, коли Народный Фронт будує свою силу на наукі, просвіті и прогрессі.




[BACK]