Максим Горький
В ЧЕТВЕРГ 18-го юня 1936 г. умер знаменитый русский писатель, горячо любимый народными массами Сов. Союза, Максим Горький. Он заболіл гриппом два тыждни тому назад. Болізнь привела к ослаблению діятельности сердца, и напрасными были усилия докторов-специалистов, штобы спасти от смерти великого писателя.
Максим Горький

Правительство Сов. Союза выпустило слідуюче официальне сообщение о смерти Максима Горького:

“Умер великий русский писатель, мастер литературы, вірный друг трудящыхся и борец за побіру коммунизма...”

Максим Горький был близкым другом Ленина. Послі Ленина он был самым замічательным человіком, якых выдал русский народ в велику революцийну епоху свойой истории. Их имена останутся тісно связаны, як имена великых преобразователей русского жытья.

Максим Горький (правдиве имя: Алексей Максимович Пешков) родился в 1868 р. в Нижнем Новгороді, його отец Максим Пешков был бідным ремесленником, и умер, коли будущому писателю было 4 рокы. В пять літ послі того умерла и мати, так што на 10-ом року свого жытья хлопец остался круглым сиротом. С той поры началися його скитания по світу и тяжке жытье бідного сироты. Ище при жытью матери його послали в школу, но в школу он ходил лем пять місяцев. Сам Максим Горький писал позднійше о свойой школьной наукі так: “Учылся я плохо, школьны порядкы ненавиділ, товарищей тоже, бо все любил уєдинение. Заразившися в школі оспом, я кончил школьну науку и больше уже не возобновлял єй.”

Молодый хлопец мусіл сам зарабляти на своє жытье. Брал всякы занятия, якы хлопец в його віку мог получити, Сам научылся чытати и писати. К 16-ому року жытья он подготовился настолько, што пробовал записатися в университет. Но в том йому отказали. Потом приготовлялся к екзамину на сельского учытеля, но ничого из того не вышло, бо бідный хлопец был без средств до жытья, нераз приходилося му ночувати в трущобах и терпіти голод. Он бере роботу в пекарні за 3 рубли на місяц. Потом служыт дворником и садовником у одной генеральшы.

Тото тяжке безпросвітне жытье так измучыло молодого хлопця, што в 1897 р. он хоче покончыти самоубійством. Он стрілят собі в сердце, но куля лем заділа легке и осталася в лопаткі. Выздоровівши, он дальше веде нужденне жытье, то пробує роботу на рыболовных промыслах, то служыт сторожом на желізных дорогах. Дальше он получил роботу писаря у одного адвоката.

В тых своих скитаниях он встрічатся с радикальном молодежом и с революционерами и входит в их кружкы, в котрых пополнил своє образование и скоро сам втягнулся в революционну роботу, а с тым и познакомился первый раз с царском тюрьмом. В слідуючых роках он переходит пішком от Волгы аж до Бессарабии, а оттуда вертаєся назад и доходит аж до Тифлиса.

В тых своих скитаниях, он познакомился с народном біднотом, изучил жытье босяков, дробных торговцев и поденных заробников. Но тото жытье не зломило його, але загартувало и дало му огромный житейский досвід. Само собом родится у него желание писати и представити перед чытаючом публиком жытье тых людей, с котрыми он встрічался, и свой взгляд на их жытье. Його оповіданья мали огромный успіх. Он становится извістным писателем и входит в круг найвиднійшых представителей русской литературы. Он знакомится с Короленко, с Чеховым, с Толстым и другыми.

Так начынатся писательска карьера Максима Горького. Он роскрыват перед чытаючом публиком новый світ и нову философию жытья, котра ворвалася в русску дійствительность як волна свіжого воздуха в затхлу, застоявшуся атмосферу темницы. Он выводит в своих розсказах и оповіданьях людей бідных, выбитых из жытьовой колеи, но у него тоты люди выходят сильными, гордыми, котрых жытьовы невзгоды не могли зломити духовно, лем загартували их. У Горького был громадный писательский талант, и он мог представити жытье своих героев в яркых картинах, котры глубоко волновали и переконували чытателя. И Горький стался скоро самым популярным писателем. Його книжкы росходилися в огромном чыслі екземпляров. В 1903 р. шеститомне собрание його творов выдержало 5 изданий, а пьеса “На дне” — 14 изданий за один рок. Його творы переводилися на другы языкы и мали огромный успіх заграницом, так што писательска слава Горького росла не лем в России, но и по всему культурному світу.

К 1902 року Максим Горький достиг такой славы, што його, бывшого босяка, выбрано почетным академиком Академии Наук в Петрограді. Но по требованию самого царя Николая ІІ выбор уневажнено ввиду “политической неблагонадежности” писателя.

В революцийны рокы 1904 — 1905 Горький выступат різко против царского самодержавия. Послі “кровавого воскресенья” в Петрограді он публично обвинят Николая II “в убійстві мирных людей” и призыват всіх граждан к непримиримой борьбі с царскым правительством. Сам собират жертвы на оружие для революционеров. За то попал знова в тюрьму, його заперли в Петропавловску кріпость, где у него розвился туберкулез легкых. Выпущеный на свободу, он скоро выіхал заграницу, где суджено му было провести много літ. Он посітил и Америку. Тут в Нью Йорку йому была оказана парадна встріча, лучшы представители американской литературы витали го як славного писателя и неустрашимого борца за свободу народов царской России. Но нараз всьо перемінилося. Секретар российского посольства опубликовал заявление, што М. Горький не єст либералом, лем опасным радикалом-революционером, и што он жыє на віру с женщином, котру представлял за свою жену. Американска публика отвернулася от него, як от зачумленного, всі готелі заперли двери перед ним, и он мусіл чым скорше уізжати из Америкы.

Заграницом Горький прожыл аж до 1913р. Большу часть свого жытья он проводил на острові Капри, в южной Италии. В тых часах он сблизился больше с русскыми революционерами. Познакомился ближе и с Лениным, котрый высоко цінил писательский талант Горького. Заграницом Горький написал ряд большых повістей, в том чыслі “Мать” и “Исповідь”, в котрых он выводит борьбу фабричных робочых против капитализма и приходит к заключению, што лем организованый пролетарият може спасти человічество.

В 1913 Горький вернулся в Россию. На початку світовой войны он поступил даже охотником в русску армию, бо был переконаный, што побіда Германии в світовой войні означала бы конец всякой свободы и конец демократии в Європі. Он был раненый на фронті в Галичині и скоро послі того освобожденый от воєнной службы. В слідуючы рокы он выдає свои лучшы творы, воспоминания из свого жытья, “Дітство”, “В людях” и “Мои университеты”.

На початку великой русской революции он розышолся с большевиками. Он боялся, што у большевиков мало культурных сил для того, штобы они сами могли справитися с анархиом, длятого он был против диктатуры одной партии. Но Ленину удалося переконати го, што политика большевицкой партии была правильна, и Горький переходит на сторону совітского правительства. Для поправления здоровля он іде знова заграницу. В 1928 р. он вертатся в Сов. Союз на официальне праздование 60-літия со дня його рождения.

Послідны рокы свого жытья великий писатель провел в Сов. Союзі, окруженый любовью и почетом народа. Он працує неутомимо для поднятия культуры в народных массах, опікуєся молодыми писателями и ділитися с ними своим огромным писательскым и жытьовым досвідом.

Максим Горький дожыл до того часу, што мог видіти нове, счастливе жытье народов Сов. Союза, освободившыхся от ярма старого ненавистного режима. Он виділ, што його віра в лучше жытье претворилася в дійствительность. На початку свойой писательской діятельности он устами одного свого героя говорил: “Неправда, что жизнь мрачна, неправда, что в ней только язвы да стоны, горе и слезы. В ней не только пошлое, но и героическое, не только грязное, но и свелтое, чарующее, красивое. В ней єсть все, что захочет найти человек, а в нем єсть сила создать то, чего в ней нет. Этой силы мало сегодня — она разовьется завтра.”

Максим Горький был счастливый в том, што виділ на свои очы, як из малых сил, котры он застал на початку свойой писательской діятельности, розвилися огромны силы, перебудували ціле жытье России и тепер вліяют могучо на жытье всего человічества. 




[BACK]