ОТ ЧЛЕНОВ Л. С. Ч. 63 В ФОРТ-ВИЛЛЬЯМ, КАНАДА.

От Членов Л. С. ч. 63 в Форт-Вилльям, Канада

Дорогы Братя и Сестры, в Америкі, Канаді и в старом краю, мы, члены Лемко-Союза в Форт-Вилльям, Онтарио, Канада — хотіли бы поділитися со всіми Вами своими мыслями, поговорити о жытю нашого народа ту на емиграции и в старом краю, о нашых болях, котры нам долігают и коротят наше жытя.

Всі мы пережываме тяжкы часы, біду, нужду. Не думайте собі, нашы братя в старом краю, што нам ту ліпше поводится, як вам там. Не смотте на то, што мы на фотографии може лучше одіти, як вы там. Жытя наше дуже тяжке, лем таке з дня на день, ниякой пред нами будучности, ниякого обеспечения нашого жытя, а через то нема у нас ниякой веселости, бо нема ниякой надіі.

Тяжка доля в старом краю выгнала нас далеко за море, в чужий край, меж чужы народы, глядати куска хліба для себе и своих дітей. А ци нашли мы го? Ци нашли мы такий кусок хліба, як мы надіялися найти, што будеме честно працувати в богатом краю, то будеме мати обеспеченый тот кусок хліба для себе до смерти, и для нашых дітей, покаль выроснут и будут способны до роботы? Но, мы того куска хліба не нашли, бо мы не находиме честной роботы.

Перед нашым выіздом в Канаду розмаиты агенты обіцували нам золоты горы, представляли нам богатства Канады, обіцували нам добры заробкы. Неєден з нас продал остатный кусок поля, бо не мог на том куску выжыти, а кто не продал, то затяг на него пожычку на вексель, штобы заіхати в Канаду и зробити собі ліпше жытья, таке жытя, як обіцували нам капиталистичны агенты.

Но коли мы приіхали в Канаду, то роботы для нас не было. Ту аж мы увиділи, што тым агентам не росходилося о нас, жывых людей, не интересовало их, як мы будеме жыти, а всьо, што их интересовало, то якбы забрати от нас послідне за перевоз, якбы на нас бідных заробити. Лем одно тоты агенты мали правду, што Канада край дуже богатый, но они не объяснили нам, што всі богатства Канады находятся в руках кучкы капиталистов, и што от той кучкы капиталистов буде залежати наша робота и кусок хліба. Итак, капиталисты нам роботы не дали, а котрым из нас дали, то дуже тяжку роботу за дуже мизерну заплату, так што хоц и тоты, што робят, не можут отробити свою дорогу. Котры продали свой кусок поля, то уж не заробят, штобы собі другий кусок купити, котры взяли пожычку на свой кусок поля, то им го продали за долг. И так мы остали без ничого.

Думаме, што и нашым старшым братям в Америкі не дуже ліпше повелося. Не єден з них працувал тяжко ціле своє жытя, ощажал, штобы дойти до якой такой хаты. Пришол кризис, забрали му всі його ощадности и його хату, и тепер он на старость не знає, где повернути, што робити, як дальше жыти.

А як жыєся тым, што остали в краю? Дуже тяжко им там жыти, мучатся нашы братя под чоботом польского пана и чехословацкой буржуазии. Замкнены нашы братя в тых горах, где терпят голод и холод, а кто з них осмілится поднести голову и речы слово против несправедливостей, чинимых нашому народу, того берут в тюрьму, из котрой он уж світа не увидит, бо там в тюрьмі мучат го аж до смерти. Голод и холод запричинят розмаиты хоробы, так што наш народ предвчасно, массово вымерат в старом краю. Непризнают нашым братям ниякых национальных прав, наша родна бесіда выкинена из школ, нашы школы полячат и словачат.

Мы, емигранты лемкы в Форт-Вилльям, Канада, порозуміли тоту правду, а як зме уж порозуміли, то мы постаралися организувати у себе отділ Лемко-Союза, єдиной нашой карпаторусской организации, котра веде наш народ, разом с другыма такыма организациями у другых народов, до народной свободы, до ліпшого, обеспеченого жытя. Мы организувалися в отділ Л. С., но але нас мало, ище и во всіх отділах Л. С., мало нас стоит в той организации на Америку и Канаду.

И длятого мы, члены Л. С. в Форт-Вилльям и Порт-Артур, кличеме Вас, дорогы братя лемкы и всі карпаторусскы роботникы, ставайте разом с нами в организацию, до борьбы за права нашого карпаторусского народа на жытя, так в старом краю, як и ту на емиграции, за морем. Подайме собі свои мозолисты рукы, тоты рукы, якы творят богатства, будуют цілый світ, подайме собі всі, трудящийся народ цілого світа и працуйме и бормеся за ліпше, счестливше жытя!


Члены Л. С. ч. 63,
Форт-Вилльям — Порт-Артур.



[BACK]