Война в Африкі
АФРИКА, ТО третя зряду часть світа, што до свойой величины, што до территории, недалеко 4 разы больше от С. Ш. С. А., выше 11 миллионов квадратных миль. (Сов. Союз около 8 и пол миллиона квадратных миль).

Африка найгорячийша часть світа, бо найбольше выставлена до солнца. Праві через саму середину переходит екватор, котрый ділит географично земску кулю на сіверну и южну половину.

ContofColonies

По причині той горячости климата, Африка заселена праві чорном расом, народы другых рас, котры нашлися в Африкі, то уж иммигранты, прибывшы из Азии або Европы. Всего населения около 150 миллионов (С. Ш. А. 120 мил. Сов. Союз 170 мил.). Коли посмотриме на мапу Африкы, то увидиме, што вся тота огромна территория поділена на колонии европейскых империялистичных держав. Найбольшы и найліпшы кускы Африкы захватила Англия. Она захватила южну Африку, где найбогатшы копальні золота и дияментов на світі. Памятаме ищы английско-бурску войну. Тота война велася Англиом против европейскых, голландскых колонистов, котры осіли в южной Африкі, и так долго никто их не беспокоил, як долго Англия не довідалася, што там найбогатшы копальні золота. А коли довідалася, сейчас рушыла на них з войном, и по долгой и тяжкой войні забрала территорию буров и єй богатства, мимо того, што тоты буры был білый европейский, цивилизованый народ.

Другий найбогатший край, то ест Египет, колыска старой египетской цивилизации, якой минуло больше як 5 тысяч літ. Знаны нам богатства и урожайность того краю из библии. Здаєся, што першы египтяне почали управу землі и першы знали хліб.

И так, найліпшы кускы Африкы захватила Англия, и за ньом уж менше вартостны захватили другы европейскы державы, як Франция, Германия, Бельгия, Италия. Коли Германия была розбита в минувшой світовой войні, то єй африканскы колонии были от ней отняты Англиом, так што Африка поділена тепер лем меж три великы европейскы державы: Англию, Францию и Италию, а кромі того великий кус належыт до малой державы, до Белгии.

На цілой той огромной территории Африкы остала до сегодня лем єдна независима держава — Абиссиния або Етиопия. (Слово Абиссиния значыт мішанина, а слово Етиопия из греческого, значыт дословно край с опаленым лицем).

Абиссиния

Як видиме на мапі, в пропорции до цілой Африкы Абиссиния яка 30-та часть Африкы, но мимо того она больша от Германии и Франции разом взятых.

Население Абиссинии мішане, бо пару раз приходили другы племена в Абиссинию, от того называтся мішанина. Всего населения около 12 миллионов. История того краю дуже стара. Предание повідат, што етиопска царица Саба, або Шеба пришла до еврейского царя Соломона учытися от него мудрости, и от Соломона родила сына Менелика, котрый потом вернул в Етиопию, як первый цар из рода Соломона и принюс в Абиссинию правдивый “кивот завіта” из Єрусалима. Тот “кивот завіта” має хранитися, по выдумкі абиссинскых попов, в городі Аксум, котрый был даколи столицом Абиссинии, тепер остал лем отпустовым мітом, як был пред русском революциом Киев с Печерском Лавром и св. мощами.

Бо треба нам знати, што Етиопия приняла християнство в старых часах, в 4 віку, в тоты часы, коли почалися в християнской церкви разны партии и ереси. Тота их християнска віра тоже мішанина еврейской віры с христианском. Приміром новорожденных дітей не лем крестят, але и обрізуют. Но кромі того старого християнства много жителей исповідує магометанску віру, а много ищы вірит в старых, африканскых божков.

Форма управления державом — абсолютна монархия, значыт абиссинский цар, його слово, то найвысше право, но и тот цар зависит от духовной кляссы, бо духовна клясса має таке влияние на темны народны массы, што може их и против царя збунтувати и поставити такого, котрый попам на руку, котрый им признат высшы привилегии.

Цар, шляхецка клясса и духовенство належыт до упривилегиованого народа, правдивых абиссинцев, котрых ест около 4 миллионы. Тот пануючий народ, то мішанина негров, старых етиопов, евреєв и арабов. Социяльный порядок старый, феодальный, значыт край поділеный на провинции, над каждом провинциом поставленый царом пан, губернатор, шляхта посідат великы добра, а селянство мусит на них робити, як тоже и на поповску кляссу. Но то нич дивного, бо и в Европі така система была недодавна. Не дуже ищы и тепер змінилася, бо приміром в Польші селянство праві даром мусит панам робити, а як не панам, то капиталистам, што наєдно и тото выходит.

Население Абиссинии неграмотне, кромі богатой кляссы и духовенства и никто не старатся о даякы школы для населеня, кажут му триматися старых обычайов и старой віры.

Як то сталося, што европейскы империалисты уж давно розділили цілу Африку, а Абиссиния остала независима до сегодня?

Найперше зато, бо Абиссиния положена в неприступных, высокых горах, котры сягают до 14 тысяч футов над уровнем моря. И климат не подходящий для европейцев. Но як мы видиме из завойований империалистов, то ніт такых перешкод в світі, штобы они не побідили их, розумієся, посредством бідного народа, войска, котре они поженут всяди, хоцбы и до пекла, лем як почуют, што там даякы богатства, што можна им взбогатітися. И в Абиссинии тоты богатства сут. Абиссиния стратила бы свою независимость, лем же при том послідном африканском краю росходится о одно: Кому он має достатися? Англии, Франции, ци Италии? Як на мапі увидиме, они почали уж ділитися тым крайом по кусочку, бо сегодняшню Абиссинию пообрывали уж наоколо, откинули от моря, росходится тепер, кто з них больший и ліпший кус має захватити.

Муссолини

Около 40 літ тому назад Италия пустилася уж воювати Абиссинию, но италийскы войска были абиссинцями розбиты. То было в тоты часы, коли ищы не мож было нищыти жытя и людский доробок з воздуха, коли не знали труючых газов, танков и т. д. Тепер Муссолини зорганизувал наймодернійшу армию для захвата Абиссинии, и можна предвидіти, што як не на землі, то из воздуха упокорит єй и завоює. Но Муссолинъому в той войні росходится не лем о Абиссинию, росходится в той войні, яка почалася в Африкі, о переділ світового богатства, світових колоний, из котрых найбольше захватила Англия. Коли Италия захватит Абиссинию и угрунтуєся там, то потом сягне по Египет, котрый зависимый природно от Абиссинии, бо из Абиссинии, из озера Тана выплыват ріка Ниль, без котрого воды Египет не лем нич не вартат, але коли италиянцы заставят воду в озері Тана, то Египет упаде сам, без войны, на коліна пред Италиом, и добровольно мусит поддатися. Кромі того Италия из высот Абиссинии буде панувати над Червеным морем, над водным путем Англии в Индию. Перервана дорога в Индию для Англии значыт конец Англии.

Про саму Абиссинию, коли бы не была загрожена Англия, мы бы не слышали о ниякых санкциях над Италиом, ухваленых Лигом Наций. Бо зме виділи, што Япония забрала Манджурию, бере постоянно Китай по куску, но ниякых санкций Лига наций не ухвалят.

Зато нам треба розуміти, што Англия не стоит в обороні Абиссинии, а в обороні своих награбленых колонияльных богатств, по котры вытягат руку Муссолини. Абиссиния, то лем на ліпший апетит для дальших захватов.

Из истории знаме, што всяка держава, котра наберала силы, штобы могла змірятися з Англиом, наводила на себе збудовану английском пропагандом и дипломатом коалицию, и мусіла упокоритися пред Англиом. Так было с Испаниом, так с Франциом, так з Германиом, котры думали о собі в рижных часах истории, што они дошли до той силы, штобы змірятися с Англиом и послі єй розбитя заняти єй місце во світі.

Таку штучну коалицию Англия утворила тепер для себе из Лигы наций, и старатся при помочы той коалиции поскромити Италию, котра почулася в силі змірятися з ньом, и италийский фашизм хоче поставити Италию на місто Англии во світі.

Ци дойде из той войны в Африкі до европейской и світовой войны?

Коли италийскы войска побідят абиссинцев и будут занимати Абиссинию, зближатися до столиці, а особливо до озера Тана, котре жывит Египет, то приде неизбіжно до войны в Европі. Перва Англия замкне для Италии Суезкий канал, отріже морску дорогу, котра веде в Абиссинию. Розумієся, што Италия того стерпіти не може, и война в Европі уж єст.

А найбольша трагедия той африканской войны в том, што италийский фашизм не може вернути назад без полной побіды, бо як верне без полной побіды, то конец фашизма в Италии, фашизм в Италии повалит народна революция и заведе новый народный порядок, совітский порядок. А революция в Италии, то значыт революция на Балканах, во Франции, тай в цілой Европі. То одна сторона медали, коли Муссолини верне без побіды.

А коли выйде, як выше вспомнено, с побідом, то неминуєма европейска война, найперше англо-италийска, котра розгорится на цілый світ.

Из будущой світовой войны може вывести и спасти людство и його цивилизацию, людский душевный и материальный доробок, лем світова народна революция, котра покончит тоту страшну войну справедливым миром и союзом угнетеных народов.

WarAfricaEnd

[BACK]