Симъ побѣдиши — Чорный Делегат

НАШЫ ЮНАКЫ

Повідают дадны люде, што лемкы остали — што молоде поколіня цілком занедбали! — То неправда, я так гварю, бо такы героі — не родятся другым людям, як нашы кавбоі! — Чудо бойсы, тоты нашы діточкы юношы — никто не зна так як они пильнувати грошы — никто не зна так як они стеречы нам кассы — никто не зна так як они крутити кобасом — и лапати на кобасу, як кавбой на pony — никто такий не побожный, не послушный попу! Прейдте цілу Америку, от краю до краю — никто вам так не заграє, як они заграют. . .

Чудо бойсы! Нашы діти ся нам выкарали — якбы другы такых мали, штобы за них дали? — Майк музыкант первоклассный, а Джян, наш юноша — то найліпший наш “писатель” и рахувач гроша! — Чытат в церкви апостола и помагат дякам — який добрый муншайн варит, продає руснакам? — А третий Пит, наша слава, маме быти горды! — Бо Пит побил всі світовы кавбойскы рекорды!

— И ход они славны люде, а нас ся тримают — ход мы такы просты люде, лем гриноры с краю. . . — Повідают “большевикы”, же то лем про кассу — же о нас ся не росходит и о “русскость” нашу — лем о нашы тяжкы центы, што зме наскладали. . . — Але то лем таке плетут всякы “безбожникы”, “коммунисты” и “червены”, всякы “большевикы”!

— Бо я сам знам, што юношы “русскы бойсы” нашы — бо кто з нима голосує, не скупят кобасы — и честуют нас “по русскы”, не так поледачы — добрым пивом и “дринками”, напитком горячым. . .

— И от “русскых священников” мают свою владзу — благословил и посвятил “русский” Капанадза. . . — Зато вышло так “по русскы”, так вшытко до складу — выбрали зме лем “юношов” самых до уряду — и тепер будеме певны нашой цілой кассы — як зме певны от них “трунку” и доброй кобасы — бо пильнуют єй кавбоі, храбры сыны нашы — а нашы боскы слугове им допомагают — о беспечность нашой кассы божичка благают. . .

Чорный Делегат.


[BACK]