Самокритика
ДУЖЕ ЧАСТО находиме в буржуазной прессі, враждебной Сов. Союзу, выдержкы из совітскых газет о неудачах совітской господаркы, о неудачах на фабриках, критику и сатиру на высокых урядников и цілы уряды, критику судов, державных прокуроров, школьных директоров, совхозов, колхозов и т. д. Буржуазны редакторы лем ждут дачого такого, даякой неудачы, бо всякым такым неудачам они радуются и натігают тоты вісти о неудачных из сов. газет на всі стороны, смакуют и ділятся ними взаимно. Но совітскы газеты, вмісто заперестати открывати свои блуды и неудачы, все ліпше их открывают, критикуют и осмівают. Сами себе критикуют и осмівают.

Скаже дакто, што они глупо робят, они дают орудие против себе в рукы своих врагов. Повісте, што лем глупый человік, глупый народ, глупа держава може открывати пред світом свои блуды, неудачы. Так думают лем несвідомы люде, несвідомы робочы. Тоты буржуазны, капиталистичны редакторы дуже добри знают, што значыт така самокритика, таке открываня своих власных блудов, своих власных неудач. Они розуміют, што лем сильный характером человік осмілится открыти свои блуды, а боячий, бесхарактерный таит свои блуды, або што найбольше пошепче попу до уха, але и так не тоты блуды, котры шкодят в його жытю, а дурниці, котры не мают нич вспольного з його жытьом и з жытьом других людей.

Лем сильна держава, держава направду народна, може позволити свойой власной прессі открывати публично свои блуды, блуды своих высокых урядников, лем така держава, котра певна свойой силы и певна свойой роботы в интересі своих граждан.

В Америкі прессовый магнат Герст має в своих руках скоро половину прессы Америкы. Но он в той свойой прессі не лем себе николи не критикує, не лем своих блудов не открыват, але николи не открыє блудов капиталистичной господаркы, тых блудов, котры отбиваются страшным способом на массі граждан Америкы, на массі самых чытателей герстовской прессы. Он закрыват пред ними тоты найгоршы блуды и провадит своих чытателей и народну массу ищы в больший блуд, бо єсли критикує и представлят блудно, то як раз тото, такы реформы, господарку, котра была бы в корысть народа.

Щыра, честна самокритика, открываня блудов в газетах публично, може быти лем в такой державі, котра веде господарку своима земныма богатствами в интересі народа.

Щыра, честна, здорова критика и правда може печататися лем в такой прессі, котра служыт народу, його интересам, служыт народной правді. И така критика, открываня своих блудов причынятся найбольше до самосознания народа, до його прогресса.

Редакторы капиталистичных газет, котры покликуются на совітскы газеты, приводят тоты блуды, якы совіты сами открывают, дуже добри розуміют, што така щыра, честна совітска самокритика укріплят их державу. Они того не скажут, не напишут своим чытателям, они той совітской самокритикы употребляют для затемнения своих чытателей. — Сами пишут, што им зле иде! Сами пишут, што не можут выполнити. . . Але они того не объяснят, што они потому пишут, штобы поправилися, и коли поправят свой блуд, благодаря його открытю, они уж того не напишут.

Слідами совітской прессы и совітской державы должна ити всяка робоча пресса и робоча организация не лем назвом “робоча”, але и свойом роботом.

Руководители Сов. Союза люде честны, такы люде, котры ставят выше добро державы, добро народа, як своє приватне добро. Коли попаде меж них такий, котрый цінит выше своє приватне добро, свой приватный успіх от общого добра, його устраняют. Так сталося недавно с секретарем Ц. Исп. Ком. Союза, Енукидзе, так сталося колиси с Троцкым, котрый ставил выше свои амбиции от державной господаркы. Всякий, котрый ставит свои амбиции, своє приватне добро выше общого добра, выставленый на беспощадну критику. И што мы видиме при выборах на уряды в Сов. Союзі, а при выборах на уряды в капиталистичных державах? Што в Сов. Союзі, благодаря той самокритикі кандидатов на уряды глядают и вынаходят сами сов. граждане, глядают найспособнійшого на тот уряд и найчестнійшого, найбольше заслуженого. Ниякий кандидат не пхаєся на уряд сам, бо знає, што жде го отвітственность за його роботу пред цілым народом и беспощадна критика, коли не выполнит наложеных на него задач. Ниякых специяльных выгод, ниякых специяльных доходов сподіватися не може, як то єст в капиталистичных державах. И зато видиме, што в капиталистичных державах кандидаты друтся о уряды, бются єдны з другыма, преплачают, купуют избирателей явно, но пресса молчыт о том, бо она на службі капиталистов, на службі капиталистичных партий, капиталистичной выборчой машины. И лем взяти такий примір, што даякий кандидат в майоры вшыткой плацы достане 10 тысяч дол., а на свой выбор выдаст 100 тысяч дол. А он мусит заробити, бо лем зато кандидує, жебы заробити. Кто платит для него тот заробок? Лем бідный народ, бідный робочий мусит покрыти всі кошта выборов и добрый заробок майору. Ясно, што всі тоты кандидары на министров, на урядников в капиталистичных державах не кандидуют в той ціли, с тым намірением, жебы добри зробити для граждан, а лем жебы заробити. Газеты о том не пишут, не критикуют, бо они куплены, зато их хвалят.

То само мы видиме и в нашых запомоговых организациях, што кандидаты на урядников бются о свои уряды. Ци може длятого, што хотят добри для членов? Лем темный член може тому повірити. А организацийны газеты их хвалят, як они добри робят для членов. Они, тоты организации себе не критикуют.

Робочы организации и члены тых организаций должны якнайбольше критикувати себе, бо то найліпша наука и найліпший залог розвития и роста робочых организаций.

Нашы робочы организации в Америкі и их члены занимаются найбольше критиком своих врагов, а самокритиком занимаются дуже мало. Мы отдідичыли по нашых старых, запомоговых и церковных организациях ищы тот обычай самохвальбы и любиме больше, як нас хвалят, хоц и незаслужено, як мают нас критикувати, хоц и справедливо. А при такой старой самохвальбі мы дуже помаленкы роснеме. Похвалят человіка и он уж зарозумієся, што вшытка робота ним зроблена, бо його похвалили. Часом и сам похвалится, як го другий не похвалит. Любят так похвалити часом и зато, бо часто робочий, котрый недавно вышол лем из под опікы тых, котры го хвалили лем зато, жебы го выкорыстати, они знали, што такий несознательный человік любит хвальбу, зато го хвалили и брали от него послідный цент за тоту похвалу. В робочой организации не можна ужывати такой пустой хвальбы яко орудия выдостаня средств, бо такыма хвальбами послугуются попы. Для нас уж в нашой роботі, ци жертві, заключена и похвала. Робота найліпше хвалит организацию и каждого єй члена.

Часто нашы члены нарікают, што в газеті не была поміщена подяка для гостей на предприятию, на даякой забаві. Подяку выписуют дуже часто для поодинокых гостей, по имени каждого, як поп на проповіди хвалит найліпшых жертвователей. То стара наша привычка, коли мы чекаме такой публичной подякы в газеті, и нам треба отвыкати от старых привычок, от такых рабскых подяк и похвал, бо они нас лем до спаня колышут. Здорова, справедлива самокритика ожывлят и учыт людей, чого нам, робочым, найбольше треба, бо пред нами ищы огромна робота, а мы ищы дуже слабы до той роботы. Самокритика укріплят нашы силы. Самокритика очыстит нас от капиталистичных блудов, котрыма мы пересякли, як рабство, страх, перекупство, выкорыстаня єден другого. Робоча организация має очыстити своих членов от тых блудов, очыщаются сами члены через самокритику, а потом очыщают и народны массы.

В робочой организации мусят вестися всі діла организации честно. Єсли в нашу организацию втешутся люде нечестны, с тым намірением, штобы выкорыстати организацию, своих братов членов, с такыма людми не може быти ниякой церемонии, мы не можеме их закрывати, лем як зауважыме неправильность, то треба тоту неправильность вытягнути на членском митингі, пред всіма членами. Не треба боятися, што член, котрого критикуєся, погніватся, бо коли он справедливый член, то он не погніватся, а докаже правильность свойой роборы, а коли он несправедливый, то може гніватися, о такого несправедливого члена нам не росходится, бо он нам принесе больше шкоды, як корысти.

Найбольше нам треба уважати, штобы были точно зданы рахункы з нашых предприятий, с членского, с предплаты, словом всі рахункы отділовы и центрального уряда. То дуже важне в робочой организации, и коли даякий член зауважыт неточности в рахунках, сейчас должен упомянутися, штобы му выяснили на отділовом митингу, а што до головного уряда через делегата його отділа. Каждый член должен пильнувати, штобы тота робота велася честно, бо в той честной роботі заключатся будучность бідного народа, будучность робочой кляссы.

Всякий, кто здорово смотрит на світ, мусит признати, што так дальше тот світ управлятися не може, што он мусит управлятися в будучности справедливо, в интересі людства, а не в интересі кучкы богачов. Справедливо може управляти світом лем робоча клясса, бо лем робоча клясса може управляти світом в интересі народных масс. Робочы организации подготовляют робочу кляссу до управления світом. Кажда робоча организация должна быти робочом школом, где учатся передовы робочы робочой чести и робочой правды, штобы передати свою науку дальшым робочым массам. В тых робочых школах найважнійша наука, то самокритика, котра найліпше очыщат нас от старых капиталистичных привычок, от тых нашых привычок, на котрых держытся стара, несправедлива система. — тных діл! самокритикы, а боймеся нечес Не боймеся [sic]


[BACK]