Сила—Будовы — Ваньо Гунянка

13-ТЫЙ ГОДЪ ВЛАСТИ БОЛЬШЕВИКОВЪ ВЪ РОССІИ.



Чого они хотятъ тоты большевики? Ци они довершатъ тото, чого они хотятъ? Коли они упадутъ? Где у нихъ береся столько силы такъ долго триматися у власти?

Каждому изъ насъ насуваются таки вопросы.

Я буду старатися на тоты просты вопросы отповѣсти безсторонно.

Можу отповѣсти безсторонно потому, што смотрю на большевиковъ безсторонно. Ни я самъ большевикъ, якъ гдекотры любятъ мене называти, ни слѣпый ненавистникъ большевиковъ, якихъ у насъ много.

Я смотрю на большевиковъ безсторонно. Были часы, што и я ненавидѣлъ большевиковъ, коли они бурили Россію. Теперь, коли они будуютъ, не мамъ причины ихъ ненавидѣти, яко человѣкъ русскій.

Чого они хотятъ, тоты большевики?

Они хотятъ свѣтового переворота, хотятъ завести въ свѣтѣ нову систему, нове право коммунистичне, штобы все добро на свѣтѣ належало до всего человѣчества, штобы каждый человѣкъ малъ однаковый шеръ на землю, воду и воздухъ. Значитъ, штобы на свѣтѣ былъ организованный одинъ великій кооперативъ, въ которомъ бы каждый человѣкъ былъ ровноправнымъ членомъ. То есть остаточна цѣль коммунистовъ. Але, чѣмъ до того дойде, то вшиткимъ богатымъ людямъ треба одобрати капиталъ, маетокъ и треба перебрати на власность того кооператива. Тото можна зробити лемъ силомъ, коли бѣдны отберутъ маетокъ богатымъ. Тота операція бѣдныхъ надъ богатыми, называтся пролетарска революція. Черезъ таку революцію дошли большевики, яко партія, до власти въ Россіи.

Але ихъ цѣль завладѣти не лемъ надъ Россіей, але и надъ цѣлымъ свѣтомъ, и коли они завладѣли Россіей, то старалися черезъ революцію завладѣти цѣлымъ свѣтомъ. Надѣялися, што и въ другихъ державахъ свѣта дойде до такой революціи и потому помагали организоватися коммунистамъ въ другихъ державахъ матеріяльно, значитъ высылали имъ изъ Россіи грошеву помочь.

До свѣтовой революціи ніякъ не доходило, што заставило большевиковъ змѣнити свои планы, именно:

Пребудовати Россію въ таку соціялистическу, коммунистическу державу, взбогатѣтися, задоволити всѣхъ гражданъ, накормити и одѣти такъ, штобы никто не былъ голоденъ, ни не мерзъ, а жилъ собѣ выгодно. Втоды увидятъ и други народы, што така система, яку ввели большевики въ Россіи, добра и переберутъ тоту систему правленія и соединятся въ одну всемірну, соціялистичну державу.

И потому они почали будову русской индустріи и земледѣлія, бо промышленность и земледѣліе, то фундаментъ богатства и добробыта державы и ей гражданъ. Потому будова той индустріи и земледѣлія, то ихъ перша цѣль наразѣ, бо коли имъ удасться довершити той будови яка въ ихъ планѣ, то безъ сомнѣнія они выграютъ, бо имъ признаютъ всѣ народы, же ихъ державна система добра.

Большевики наложили на себе и русскій кародъ велики тягары для проведенія своихъ плановъ и индустріализаціи. Такихъ тягаровъ, лишеній, недостатковъ, не могъ бы перенести ни одинъ народъ въ свѣтѣ, якъ переноситъ 13-тый рокъ русскій народъ, ба не 13-тый, а 17-тый, бо ужъ отъ початку войны. Я переконаный, што лемъ скромный народъ русскій може перенести тоты недостатки, яки онъ переноситъ. То ужъ така русска выносливость на всяки недостатки и страданія.

И лемъ така партія, якъ идейны большевики коммунисты можутъ съ такимъ отреченіемся свѣта, такъ упорно и энергично робити за свою идею.

Бо я большевиковъ мамъ за идейныхъ людей. Идейный человѣкъ, то такій, котрый посвятитъ свои личны выгоды для даякой общой цѣли. И я оцѣню каждого идейного человѣка, для якой бы онъ идеи, або вѣры служилъ, але коли служитъ честно и готовъ посвятитися за тоту свою вѣру, свою идею. Я можу не вѣрити въ тото, што онъ вѣритъ, але зато оцѣню вѣру каждого христіянина, ци онъ католикъ, ци протестантъ, ци православный, коли онъ направду вѣритъ и готовъ и крестъ понести, за свою правду. Не лемъ христіянина цѣню, але и иншой вѣры человѣка, если онъ щирый, не фалшивый, якъ массы всякого духовенства, котры давно отстали сами отъ того, што проповѣдуютъ.

И я переконаный, што большевики щиро вѣрятъ въ то, што проповѣдуютъ.

Вѣрятъ наразѣ. — Бо быти може, же они даколи тоже сфалшивѣютъ и коммунизмъ перейде въ таку религію, котра остане лемъ яко религія, вѣра, а не буде переведеный въ практицѣ, въ житью, якъ сегодня Христова наука остала лемъ религія, а въ практицѣ, въ житью перевести не далася. Правдивыхъ христіянъ сегодня нѣтъ и потому большевики откидаютъ христіянство.

Ци большевики довершатъ того, чого они хотятъ? — То залежитъ отъ того, ци стане русскому народу геройства, вынести тоты тягары, што кладутъ на него. Така будова, яку почали большевики по своей пятилѣткѣ, потребуе огромного труда и капиталу. Того капиталу большевики не можутъ позычити отъ никого, лемъ мусятъ выдусити изъ самой Россіи, изъ русской земли, изъ русского народа. И тото, што народу потребне, вшитко лѣпше што уродится, большевики вывозятъ за границу, штобы достати гроша. И до сего часу имъ удается покрывати росходы доходами, але съ великими жертвами народа.

Што ихъ триматъ, яка сила, чомъ народъ не взбунтуе противъ нихъ? 13 лѣтъ терроромъ не можна триматися у власти, среди враговъ въ серединѣ державы и ворожо настроеного свѣта, потому, што въ такихъ условіяхъ и армія и полиція бунтуютъ, коли видятъ, што власть фалшива, сама уживатъ, а народъ страдае. Такъ што держитъ большевиковъ въ Россіи при власти?

Держитъ ихъ сила будовы. Большевики силами русского народа будуютъ. Будуютъ индустрію, безъ котрой Россія была слаба держава, такъ слаба, што не могла передержати войну. Русскій народъ понялъ, што потребно Россіи, штобы она была перва держава въ теперешнемъ свѣтѣ. Въ той всемірной войнѣ каждый неграмотный мужикъ, коли его высылали пѣшкомъ съ коломъ на нѣмця, розумѣе, што ту кромѣ иконы и кола треба нѣмецкой индустріи, нѣмецкой желѣзной дороги, нѣмецкого оружія, штобы оборонити Россію. Што Россія въ теперешній индустріяльный час не може быти сильна ни при царѣ, ни при архіереяхъ, а лемъ може быти сильна при богатой индустріи и раціональномъ земледѣліи. До будовы того для Россіи большевики взялися съ шаленой энергіей. Коли пятилѣтній планъ предъ рокомъ еще была лемъ посмѣшка свѣта, сегодня свѣтъ смотитъ съ удивленіемъ, а многи, котры предъ рокомъ смѣялися, сегодня вѣрятъ, што большевики переведутъ свой пятилѣтній планъ индустріализаціи. А если вѣрити тому, то Россія по окончаніи пятилѣтки стане на ровнѣ съ индустріяльными державами индустріи. А што въ Россіи незмѣримы суровы богатства, то скоро Россія буде и перва богата и найсильнѣйша держава въ свѣтѣ.

Тота сила будовы держитъ большевиковъ въ Россіи при власти. Тота сила будовы повздержуе и други державы напасти на Россію. Тоту будову большевиковъ подивляютъ велики противники коммунизма и стаютъ ихъ пріятелями, заступниками во свѣтѣ.

Коли большевики упадутъ?

Коли имъ бракне сили будовати, коли перестанутъ будовати. Если у нихъ остане тота сила будовы, тота энергія, то они будутъ владѣти свѣтомъ.

Сила будовы дае власть. Народъ, або партія безъ той силы муситъ уступити мѣсто тымъ, у котрыхъ тота сила, энергія, идея — есть.


Ваньо Гунянка.



[BACK]