На 1931 Годъ — 'Сватъ'
Дай Боже счестья — здоровья — Въ томъ Новомъ Року.
И най никого не коле — Въ ямцѣ ни въ боку!
Най каждому въ каждомъ дѣлѣ — Все добре иде —
И най въ згодѣ жіютъ наши — Лемки сусѣде. . . . .
Най ся наши Лемки множатъ — Якъ Богъ приказалъ,
Жебы насъ ужъ зъ нашой малы — Никъ не вымазалъ!
И най каждый газда мае — Добру газдыню,
И най ся му вшытко родитъ — Хоцъ на каминю. . . .
Та най наши братья не пьютъ — Виски ни руму,
Най имъ Богъ дасть въ Н. Року — Веце розуму!
То не буде до выпитки — Тельо оказій,
И каждый сой зашпаруе — Дакусъ пѣнязи. . . . .
И дай Боже, жебы было — Лѣпше на свѣтѣ,
Жебы руснакъ малъ што ѣсти — Въ зимѣ и въ лѣтѣ.
А лемковскимъ ”меценасамъ“, — Што друтъ зъ насъ гроши.
Брюха маютъ, попиваютъ, — Жіютъ въ роскоши,
Най же втоды, якъ народу — Треба помочи,
Задомъ ся не обертаютъ, — Не жмурятъ очи!
Нашимъ львовскимъ редакторамъ — Терпеливости.
Най ся не жрутъ межи собомъ, — Якъ псы на кости!
А Лемковскому Союзу — Сто тысячъ членовъ
Самыхъ Лемковъ, такъ гриноровъ, — Якъ "ситизеновъ". . . .
А где людска сила розумъ — Ничъ не поможе,
То ужъ поможь ведля воли — Великій Боже!
Отъ повѣтря, глада, огня, — Воды и войны,
Хрань насъ Боже! А дай намъ — Часы спокойны. . . .
Дай намъ Боже зъ нашихъ дѣтей — Дуже потѣхи
И даруй намъ всѣ велики — И малы грѣхи!
И най идутъ отъ насъ вшитки — Целибатяре.
Але даруй имъ, о Боже, — Всѣ вѣчны кары!
Петлюровцямъ тыжъ подаруй — Вшиткимъ запорядъ,
Ибо дурны и незнаютъ — Сами што творятъ. . .

Сватъ.
NewYearEnd
[BACK]