ЦИГАНЪ ПАВЛЬО ВѢНЧУЕ.

Ото я Павльо изъ Брунари,
Нароблений и барзъ старый,
Ужъ не годенъ Вамъ заграти
Такъ хочу Вамъ винчувати:
”Дай Вамъ Боже щестя, здравля,
Повонности для хотаря,
Здравы ручки до мотычки
Легки ножкы до музычки!
Мои газдове ай газдынѣ,
Жебысте мали все повны скринѣ,
Повно въ стодолѣ ай на подѣ
Бысте незнали о голодѣ.
Жебы ся Вамъ вшытко родило,
Хоцъ не посѣяне найбы сходило,
Жебы Вамъ всього добра збывало,
И для цигана кусьцьокъ остало. . .
Дай Вамъ Боже щастливый рочокъ,
Бысте доховались красныхъ дѣточокъ,
Жебы былъ приростъ въ той ”гминѣ“,
Хоцъ по десятеро въ каждой родинѣ. . .
Жебы ся Вамъ вели быцкы, теличкы,
Красны пацятка ай ягничкы,
А и коникы найся ховаютъ,
Але я ихъ не люблю бо барзъ копаютъ
А качечкы и курочки,
Жебы вылѣгалися безъ квочкы
И гусочкы такы бѣлюсѣ —
Ой ажъ мѣ слина тече по брюсѣ. . .
Заховай Боже отъ граду блискавицѣ,
Жебы поздихали вшитки чаровницѣ,
Котры молоко Вамъ отбераютъ
И люцку працу сами пожераютъ.
А вамъ братя въ Америцѣ,
Што робите тамъ въ фабрицѣ,
Ци на ярдѣ, ци где въ ”брурѣ“
Ци въ тыхъ майнахъ, темной дзюрѣ.
Дай Вамъ Боже въ щасцю жыти
И талярковъ заробити!
А якъ будете ихъ дуже мати
То прошу Васъ намъ прислати.
Бо гевъ въ Польши вера Боже,
Никто намъ ничъ не поможе!
Наша Польша все ялова
Ничъ не мае, сама гола. . . .
Дай Вамъ Боже Милостивый
Здравля, щестця, доброй силы, 
Вытрималости, охоты,
До танцю и до роботы!
Такъ здравеньки оставайте,
Павля зъ Брунаръ памятайте,
Бо онъ старый сердеча,
”Одель мидель ту менче очен делега. . .“

Гриць Смеречокъ.



[BACK]