То, чого намъ въ Америкѣ найбольше потреба! — 'Акронецъ'

Въ славнимъ мѣстѣ, Акронъ Огайо, зродилася въ головахъ цѣлкомъ неученыхъ дивна мысль!

Не есть въ томъ ничъ чудного, кедъ мысли родятся въ славныхъ головахъ, напримѣръ, въ головѣ егомосця, котрый на парохіальнимъ митингу говоритъ своимъ прихожанамъ, же онъ цѣлый тыждень ничъ не робитъ, лемъ думатъ.

Въ нашимъ случаѣ ходитъ о мысль, котра, якъ высше сказано, зродилася въ головахъ простыхъ-неученыхъ и котра вартатъ того, жебы надъ нею серіозно застановитися и ширити ю между русснаками по цѣлой Америцѣ.

Парунадцетъ мѣсяцевъ тому назадъ поговорили медже собомъ три Акрончане, г-да Гавріилъ Михальскій, Симеонъ Микулякъ и Иванъ Коваликъ и рѣшили заложити банкъ. — Банкъ барсъ легко заложити, кьедъ сутъ пѣнязи але труднѣйше, кьедъ-пѣнязи не естъ, але наша бодра тройка не стратила охоты и вѣры въ успѣхъ, лемъ согнала до купы 24 людей и завязала организацію, котру до того часу люде называютъ ”банкомъ“, хоцъ тото названіе не цѣлкомъ соотвѣтствуе духу и цѣлямъ организаціи. Цѣлый рокъ працювала тота организація безъ устава, бо никто изъ насъ не знавъ, якъ такій ”банкъ“ закладати и якъ его вести и, доперва по роцѣ на основаніи практики, завели ”банкери“ уставъ, руководячися до дня введенія устава лемъ добромъ вольомъ членовъ и рѣшеніями митинговъ.

Первымъ и основнымъ правиломъ, котрыхъ ”банкъ“ руководился было рѣшеніе, на основаніи котрого каждый членъ ”банкъ“ мусѣвъ вложити въ ”банкъ“ одного доллара на тыждень а ”банкъ“ смѣлъ пожичати пѣнязѣ лемъ своимъ членамъ на 7% на тыжневы сплатки.

Результатомъ того правила было то, же большинство членовъ вложило въ ”банкъ“ по 52 дол. такъ, же разомъ мало того быти $1.248 за рокъ отъ 24 членовъ, але столько того не было, бо члены не барсъ точно платили. Хоцъ члены и не барсъ точно вплачували свои взносы, то и такъ пришло за рокъ заробку по 6.47 на кождого члена а якъ ся о томъ члены довѣдали, то заразъ свои вклады подоплачали, такъ же ”банкъ“ разомъ съ процентомъ съ концемъ першого року мавъ $1.409.00 капиталу.

Якъ ужъ повѣджено отъ каждыхъ 52.00 дол. приходило $6.47 доходу, кто хотѣвъ бы потрудитися и выраховати, якій то процентъ, то при рахунку не смѣетъ забыти, же лемъ першій долларъ процентовався цѣлый рокъ а каждый, слѣдующій долларъ процентовався все о тыждень меньше такъ, же остатній съ тыхъ 52 долларовъ бывъ на процентѣ лемъ еденъ тыжденъ. Если о томъ при рахунку не забудеме, то вырахуеме, же тоты 52.00 дол. вплачаны тыжнево значитъ тилько, якъ кьедъ бы $26.50 процентовалося цѣлый рокъ. Иншима словами $26.50 або 24.4%; таку сумму заробляютъ на насъ чужи банки.

Могъ бы дато подумати, же заробивъ лемъ тотъ, кто не пожичавъ а съ того, што пожичавъ, же зме ”скору дерли“ якъ и инши банки. И тото не правда. Членъ, котрый въ нашимъ ”банку“ пожичивъ $100.00 на рокъ, заплативъ $7.00 проценту и 15ц. за реситъ — разомъ $7.15 — $6.47, то естъ 68ц. Котрый банкъ пожичитъ $100 за 68 центовъ проценту на рокъ? Если членъ пожичивъ $200.00, то онъ заплативъ $14.15 а заробивъ $6.47, значитъ его пожичка коштовала го $7.68 зо всѣми выдатками.

Якъ видиме, членъ, котрый пожичавъ, доставъ пожичку на такъ выгодныхъ условіяхъ, же нигде такъ туньо и такъ скоро ей не достане а головне, же таке просте правило, довело и до того, же грошъ заробленный русскимъ чловекомъ остався и надале въ русскихъ рукахъ, приносячи пользу однимъ, а велику помочь другимъ.

И не дивно, же до ”банку“ приступило теперь двохъ новыхъ членовъ и банкъ развивается прекрасно дальше, маючи за 15 мѣсяцевъ около $1.900.00, лемъ дивно, же ружны ”роджены святы“ противъ ”банку“ выступаютъ и ажъ до адвокатовъ ходятъ звѣдуватися, якъ бы ”банкови“ ногу подставити, забываючи о томъ, же ”родженымъ святымъ“ ся лемъ хтовды лѣпше жіе, кьедъ народъ матеріально добре стоитъ.

Але ”банкъ“ маетъ и много другихъ добрыхъ сторонъ; такъ, напр. члены ”банка“ увидѣвши результатъ своей работы и познавши, яка сила есть въ единенію, рѣшили и дальше не выпускати гроша изъ русскихъ рукъ и стараются, што лемъ можно, купувати у своихъ русскихъ людей, жебы оденъ другого поддержувавъ, наветъ уголь купуютъ разомъ, жебы таньше купити, обращаютъ ся одинъ къ другому съ братскою любовію, несмотрячи на религію и, што не меньше важне — не одинъ изъ нихъ такъ ся розохотивъ, же на стары роки ставъ учитися рахунковъ и т. д.

Тутъ треба отмѣтити, же до ”банку“ належатъ лемъ сами старши люде и не есть медже нами жадныхъ мудрагелевъ.

Въ новопринятомъ уставѣ маме много иншихъ добрыхъ пунктовъ; рѣшено провадити моргиджовы операціи медже членами и не забыто тоже и о народномъ дѣлѣ, на примѣръ, при ликвидаціи нашъ уставъ не забыватъ о Желѣзномъ Фондѣ и т. д.

Книги въ нашимъ ”банку“ ведутся дуже точно согласно найновѣйшимъ гандлевымъ методамъ; кассовы книжки ведутся по англійски а рекордовы по русски. Жебы члены были все точно информованы о положенію ”банка“ отбываемъ каждого мѣсяця одинъ митингъ, на котромъ дают свои справозданья и правленіе и ревизійна комиссія. Наконецъ, жебы забезпечитися, жебы ”банкъ“ не ставъ даколи жереломъ вызыску — жаденъ членъ не може мати больше, якъ одинъ вкладъ ани больше, якъ одинъ голосъ.

Правленіе состоитъ изъ слѣдующихъ лицъ: г. Гавріилъ Михальскій, предсѣдатель; г. Симеонъ Микулякъ, финансовый секретарь; г. I. Шевчикъ, прокуроръ; г. И. Брода, кассиръ; г. А. Марцинскій, рекордовый секретарь.

Въ составъ ревизійной комиссіи входятъ: г. дръ Александръ Телехъ, предсѣдатель; гг. Лука и Павелъ Новакъ и г. Иванъ Гальчакъ, члены.


Акронецъ.



[BACK]