ШТО КОГО ТѢШИТЪ?

Каждого штоси тѣшитъ. Коли ничъ ужъ чловека не тѣшитъ, то ужъ можъ му преповѣсти близку смертъ.

И ажи така лемковска приповѣдка естъ: ”Деси мѣ ужъ конецъ приходитъ, бо мя ничъ не тѣшитъ!“

Такій чловекъ (або жена), которого ужъ ничъ не тѣшитъ, посовѣе, голову спуститъ, згорбится, вмовитъ въ себе хоробу, ляже и вмератъ.

Але таки, што ищи не хотятъ умерати, то каждого штоси тѣшытъ. И такъ: Стрѣльця, коли застрѣлитъ заяца, ундертекера тѣшитъ похоронъ. Хоцъ бы тамъ яки смутки показовалъ и жалобу робилъ то той утѣхи не скрые. И правильно: Каждого тѣшытъ, коли му дашто капне.

Мого сусѣда Майка тѣшитъ, коли го дакто закличе и каже, а самъ ся выкрутитъ вернути. Кума Гриця тѣшитъ, коли робитъ овертаймъ, а его кумъ безъ роботы сидитъ. Кума Демка (въ старомъ краю) тѣшитъ, коли вмѣсто гроша на оферу шмаритъ ”гомбичку“ съ перерванымъ ушкомъ, а церковникъ, который збератъ оферу, не довидитъ.

Нашого гросера тѣшитъ, же яйця подскочили 10ц. на дозинѣ, а у него 10 баксъ въ запасѣ. Мою сусѣдку Орину тѣшитъ, же хоцъ Мера купила дрессъ за 25 дол. то ей пущатъ и збѣгнулся, а она дала лемъ 15 дол. а ни не пущатъ, ни не збѣгатся.

Одни ся тѣшатъ, же имъ Богъ далъ дѣточки, други ся тѣшатъ, же имъ не далъ.

Грицко Подпенка ся тѣшытъ, же му приходитъ ”Лемко“, хоцъ не заплатилъ и читатъ задармо, а сусѣдъ, Майкъ Червенякъ, не зна читати, а муситъ брати двѣ газеты и платити за нихъ.

И такъ каждого штоси тѣшитъ на томъ божомъ свѣтѣ и муситъ го тѣшити, бо якъ ничь не тѣшитъ то шкода жити.

Певно хотѣли бы сте знати, што мене тѣшитъ?

Мене тѣшитъ, коли дакому бракуе ужъ лемъ пару долларовъ до нового тысяча, а ту выходитъ му дати на желѣзный Фондъ пару десятокъ и засъ того муситъ глядати даде.


Ваньо Гунянка.



[BACK]