Грицъ Оповѣдатъ о Отпустѣ на Кальваріи — Грицъ
На Кальварію народъ иде
По каменистой дорозѣ. . .
На Кальварію народъ дыбатъ
И мае надѣю въ Бозѣ!
Бо хоцъ на дворѣ слота,
Же ужъ два тыжнѣ роситъ,
Же хоцъ стоитъ робота,
Все то буде якосикъ. . .
На Кальварію народъ кыватъ:
Хлопы, бабы и дѣвкы —
На цѣле горло спѣваютъ,
Набожны спѣваютъ спѣвкы.

* * *

Каждый набравъ сой хлѣба,
Сыра, масла, пероговъ,
Жебы было што ѣсти,
Бо далека дорога.
Зо три милѣ ку ”водѣ“
А отъ воды съ пять буде,
Але хоцъ такъ далеко,
На отпустъ тягнутъ люде. . .
Видятъ села и мѣста,
Видятъ люди зъ далека:
Ничь дивного — видѣти
Хоче чловекъ чловека.

* * *

А дячокъ зъ нашого села,
Впровадилъ насъ до костела. . ..
Гваритъ, же то една вѣра,
Пану Богу една мѣра.
Потомъ мы шли по стежечкахъ,
По капличкахъ и такъ дале,
Але трудно было дойти,
Бо горнякы барзъ ся пхали. . .
А горнякы якъ горнякы,
Едны мудры, другы нѣтъ;
Преця всяди сутъ бортакы,
О томъ знае цѣлый свѣтъ!

* * *

Пхали ся бойкы якъ бараны,
Ажъ ихъ поляны сварили. . .
Кождый хтѣлъ быти першій,
Мало ся не побили.

* * *

Позѣдали отпустникы остатнѣ перогы,
Тра было купити ѣсти, хоцъ и барзъ дорого,
А пѣнязи мало мали, отпустникы нашы,
Бо и откаль бы ся брало? Неска тяжкы часы.
Пѣнязь маютъ лемъ ”склепаре“, або адукаты,
Целибаты и лѣкаре, Бо естъ зъ кого взяти!

* * *

Але каждый мавъ въ бундзику,
Завязаныхъ злотыхъ пару,
А дакотры, што богатшы,
То мали и по доляру.

Преця кождый хтѣвъ купити
И собѣ памятку;
Но и треба было дати
Одпустову ”складку“!

Але грошы мали мало,
То купили, што ся дало,
За пѣнязѣ поскладаны
Купили двѣ чорны фаны!

А повѣмъ я, глупый Грицъ,
Же вмерлому не тра ничъ!
Лемъ му треба штыры дошкы,
И той святой землѣ трошкы.

А больше му ничь не треба,
Бо душа пиде до неба,
А лемъ того грѣшне тѣло,
Въ сырой земли буде гнило.

Не поможе ани ”фана“,
Ни кадило ни кропило,
Шкода грошы — што-сте дали —
Бо ужъ на все вамъ пропали!
Грицъ.



[BACK]