Св. Николай и «Сенти Клосъ» — Ваньо Гунянка

То тотъ самъ святый. Святый, котрый носитъ дѣтямъ дарунки. Тотъ самъ св. Николай.

Але совсѣмъ онъ другій въ старомъ краю, а другій въ Америкѣ. Повѣли бы сте, же есть два св. Николаи:

Старокраемый Николай тяжкій, поважный, торжественный. Коли появится дѣтямъ, дѣти трухлѣютъ зо страху. Маютъ больше страху, якъ предъ старокраевымъ попомъ, або учителемъ. Свѣтлы ризы, епископска палица, митра. . .

Тутъ въ Америкѣ, американскій святый Николай стоитъ на корнерѣ улицы, въ высокихъ чоботахъ, въ курткѣ и шапочкѣ, подскакуе собѣ разомъ съ дѣтми, або, яко добрый бизнессменъ, стоитъ въ департаментъ шторѣ и приводитъ костумеровъ своему хозяину.

Нашъ Гершко въ старомъ краю, коли видѣлъ якій святый христіянскій образъ, жмурилъ очи и отверталъ голову. Отверталъ голову и отъ святого Николая. Тутъ въ Америкѣ тотъ самъ Гершко выставилъ въ окнѣ свого штору пять святыхъ Николаевъ и «Крисмастри», такъ выстроилъ, такъ убралъ, жебы у никого такого не было. . .

Въ старомъ краю день предъ святми робиме роботу, «бизнессъ», а потомъ цѣлый мѣсяцъ святкуеме. И Рождество и св. Іосифа Обручника и св. Стефана и Обрѣзаніе Господне и друга вілія и Іордана.

Тутъ въ Америкѣ цѣлый мѣсяцъ робятъ «бизнессъ». «Крисмасбизнессъ» то найлѣпшій бизнессъ. Цѣлый мѣсяцъ держитъ. Кто не зробилъ «Кризмасбизнессъ», то може закрыта свой «шапъ». . . Але зато лемъ день и то, здается не цѣлый, свято.

И якъ тоты два святы Николаи неподобны на себе, такъ старый край неподобный на Америку. Америкѣ нужный св. Николай для бизнессу, нужный «Кризмасъ» для бизнессу. Если бы им тотъ св. Николай не приносилъ бизнессу, здаеся давно бы забыли о немъ, якъ забыли о другихъ святыхъ. «Кризмасс» потребный для бизнессу. А коли бы не приносилъ бизнессу, здаеся совсѣмъ бы забыли, якъ забыли о Іорданѣ. У нихъ есть ралигія, есть вѣра настолько, насколько имъ нужна для житья. Однако далеко менше думаютъ о небѣ. Головный у нихъ бизнессъ, робота, а небо, якъ Богъ дастъ. Въ старомъ краю люде жіютъ для религіи, для неба, а робота, бизнессъ на другомъ мѣстѣ.

И потому американцы стараются вышколовати свое поколѣня на добрыхъ бизнессменовъ и на первомъ мѣстѣ кладутъ школы. Всяки школы. Въ старомъ краю стараются выховати свое поколѣня въ страху Божомъ и потому на первомъ мѣстѣ ставлятъ церкви.

И зато нашого св. Николая зносятъ на рукахъ изъ неба ангелы, свѣтлого, поважного, тяжкого, а американскій «Сенти Клосъ» ѣде самъ изъ сѣверного полюса на ренахъ.

Котрый св. Николай лѣпшій? Ктожъ то може знати?

Але мы опустили свого св. Николая въ старомъ краю и пришли глядати притулку у американского. . .


Ваньо Гунянка



[BACK]