Лемковска Пѣсня

Народна поэзія, народна пѣсня, то душевне богатство каждого народа. Народна поэзія, то зеркало души каждого народа.

Русскій народъ богатый въ народну поэзію, народну пѣсню. Нашъ русскій народъ не уступит ни одному народу въ свѣтѣ въ томъ душевномъ, народномъ богатствѣ.

Кажде русске племя вложило свой родъ народной поэзіи въ общерусскую скарбницю: Великороссы свои «Былины», поэтичны рассказы о славныхъ русскихъ богатыряхъ, украинцы свои «Думы» и т. д.

И у насъ лемковъ, найменшого русского племени, есть своя народна поэзія, свои «повѣданки», свои пѣсни. Але коли народна поэзія другихъ русскихъ племенъ уже собрана и напечатана, а черезъ то сталася достояніемъ всего русского народа, наша лемковска пѣсня осталася еще въ народѣ.

Кромѣ пару ученыхъ профессоровъ, нами лемками русскій свѣтъ, на жаль, мало интересуеся.


Stefan Skimba

Стефанъ Шкимба

Стефанъ Шкимба, которому можеме дяковати за наши народны лемковски рекорды, родомъ изъ Воловца на Лемковинѣ. Не чудо, же такъ похопилъ лемковске весѣля и забыти го не може, бо ужъ укъ хлопецъ, ходилъ грати на басахъ съ цыганами, на нашихъ лемковскихъ весѣляхъ.

Пришовъ до Америки въ 1912 году, жилъ въ Бруклинѣ, Колдейлъ, Ватербери, служилъ въ американской арміи въ часъ войны полтора рока, вернулъ до Ватербери и тамъ ся оженилъ съ лемкиньомъ изъ Баницы, горлицкого повѣта. Ужъ пять лѣтъ жіе въ Бруклинѣ и робитъ на стритъ-карѣ, яко моторменъ.

Всѣ лемки должны быти благодарны г-ну Шкимбѣ, што передалъ на рекорды нашу народну лемковску музыку и весѣльны спѣванки и то чисто безъ ніякихъ прикрасокъ. Теперь г-нъ Шкимба помагатъ, яко партнеръ, нашому лемкови фотографу, г-ну Мих. Дужому, въ работѣ надъ фильмомъ: «Лемковске Весѣля». 


Треба признати велику заслугу Г-ну Стефану Шкимбѣ и Ко., которы собрали часть нашихъ лемковскихъ пѣсень и перенесли на рекорды п. з.

ЛЕМКОВСКЕ ВЕСѢЛЯ.

Самого Лемковского Весѣля есть 20 частей, або десять рекордовъ, (на каждой сторнѣ одна часть).

Возмеме за порядкомъ: Заручины будутъ перши: 1 и 2 Часть (1 рекордъ). Потомъ иде «Лемковске Весѣля» отъ 1—16 части, значитъ 8 рекордовъ. Потомъ «у мамы на гостинѣ» ч. 1—2, одинъ рекордъ.

Всѣ тоты 20 частей, або 10 рекордовъ, належатъ до «Лемковского Весѣля».

Послѣдній рекордъ: «Мужъ коситъ, жена ѣсти носитъ», то 11-тый рекордъ.

Во всѣхъ пѣсняхъ и бесѣдахъ столько простого, народного юмора, што мы запорядкомъ перенесеме всѣ слова изъ рекордовъ на паперъ.

Спѣвъ и бесѣды переплѣтатъ лемковска музыка.

Лемковске Весѣля Шкимбы и Ко. мае неоцѣнену вартость въ томъ, што на рекорды перенесено живо, натурально, народне весѣля на Лемковинѣ, безъ ніякихъ артистическихъ прикрасокъ. Тотъ народный стиль, тота правдивость причинятся до того, што тоты рекорды народъ любитъ, бо чуе, же то его, таке, якъ было въ старомъ краю въ его селѣ.

Чудно, же и сусѣде лемковъ, поляки и словаки любятъ «Лемковске Весѣля» больше, якъ свои весѣля! Мы получили письмо отъ своего краяна изъ Детройта, где пише, што полька, коли почула «Лемковоке Весѣля, заплакала.

Лемъ правдиве народне слово говоритъ народу до сердця и до понятія. Люде, учены музыки и спѣву, такъ наспѣвати на рекорды, якъ неучены того Шкимба и Ко. не потрафлятъ, бо учены предали бы такъ, якъ ихъ учили, а Шкимба и Ко. наспѣвали такъ, якъ чули, якъ сами даколи спѣвали на весѣлю, передали такъ, якъ оно было и потому оно цѣннѣйше, якъ всяки други, хоцъ бы и красше спѣвали.

Весѣля Шкимбы и Ко. чисто народне!

ЗАРУЧИНЫ. Ч. 1.

Бесѣда.

— Дай Боже добрый вечеръ!
— Дай Боже и Вамъ! А што Вы за люде?
— Мы иноше!
— А зъ якого села?
— Та съ того, де козы куютъ!
— А што ся родитъ на Вашомъ грунтѣ?
— Та вшитко ся родитъ, а каминя найлѣпше. . .
— А якъ такъ, то на недѣлю перша оповѣдь!

Спѣванка:

Повѣчь мѣ Катрено, повѣчь мѣ наразѣ,
2 Най мои коники не стоятъ на дразѣ!
Бо мои коники дуже мя коштуютъ,
2 Ани едну ночку дома не ночуютъ. . . .
Радте же ся, радте, за кого мя дате,
2 Моя рада така, же лемъ за гудака. . .
Гудакъ буде грати, а я танцувати
2 Такъ мы ся будеме хлѣба дорабяти. . .

Зазуля кукала, правду повѣдала,
2 Же я ту не буду демся выховала. . .

Бесѣда:

— Катрено! Повѣчь, ци пидешь за того Грица, ци не пидешь?

— Та може пиду, якъ мѣ запише полъ грунта. . .

— А коли пидешь, то заранъ идеме до запису! Гудаки грайте!..


Ой дѣвча, дѣвча съ панского роду,
2 Выйдъ-же ты ку мѣ на загороду гоя-я-я. . .
А я бы вышла, але ся бою
2. Ты бы мя зрадилъ, о то не стою гоя-я-я..
Катрено моя, напой мѣ коня —
2 Я не напою, бо я не твоя гоя-я-я. . .
Якъ буду твоя, напою ти два
2 Напою, приведу, де стайня твоя гоя-я-я. . .

ВЕСѢЛЯ: Ч. 1.

Спѣванка:
Лѣтатъ пташокъ по подъ дашокъ ой зима тамъ, зима тамъ
2 Коли я ся съ того села ой вымотамъ, вымотамъ?
Втоды я ся съ того села — ой вывину-вывину,
2. Якъ мѣ дадутъ штыри волы и перину-перину. . .

Бесѣда (старосты):

— Я староста! Прошу сѣдати до стола! Зѣме и выпьеме, а пакъ до шлюбу пидеме! Дай Ти Боже, Пане Младый, сто роковъ прожити — а Тобѣ Паньи Млада до такъ рока малого пророка! Но, цыгане заграйте, але таку, жебы ажъ паньи молода плакала!

Молода: — Мамо, поблагословте мя!

Мама: — Я тя благословю моя дѣвко и Богъ най тя благословитъ!


Спѣванка:
Прежегнай мя мамцю правомъ ручкомъ на вкрыжъ,
Бо ужъ остатній разъ на мой вѣнокъ смотришъ.
Прошу я Вась мамцю на Христовы муки,
А положте вы мѣ на голову руки. . .

Бесѣда (старосты и маршалки коли приходятъ зо шлюбу).
— Кто тамъ? — Я староста! съ молодятми зо шлюбу идеме!
Прошу отворте, пане маршалка!
— Гей, пане староста!
— Што, пане маршалка?
— А коли святый Іосифъ стоялъ на одной нозѣ?
— Ага! Та втоды, якъ сѣдалъ на такого осла, якъ вы, пане маршалка. . .

Спѣвъ (свашокъ).
Пусте же насъ пусте, двери намъ отворте,
Бо ся погнѣваме, та ся повертаме.

Ч. 2. Бесѣда (старосты)

— Дай Боже добрый день! Вшитко добре, лемъ, паньи свашки, треба буде молоду почепити: Дати ей химлю, чепець, и баршанокъ, а на чело сало, жебы ся блищало! А вы, цыгане, заграйте «На зеленой пашицѣ»...


Спѣвъ (свашокъ):
На зеленой пашицѣ розмарія квитне, розмарія квитне,
А чіе то дѣвчатко въ коморѣ завите, въ коморѣ завите?
А ктожъ его завивалъ, кто съ нимъ двѣ ночки спалъ
А я бы съ нимъ спалъ третью, жебы я го досталъ.

Бесѣда (староста и молода):
— Но якъ, паньи млада, любишь чепецъ?
— Люблю, люблю, пане староста, але мужа ищи лѣпше!
— Цыгане заграйте: «А за нашомъ хижомъ». . .

Спѣвъ (свашокъ):
А за нашомъ хижомъ купа сѣна
Вчера была дѣвка гнеска жена,
Вчера была дѣвка подъ вѣночкомъ,
А гнеска ужъ жена почеплена!

Бесѣда (старосты)
Гей, цыгане! Та заграйте едну доокола!

Спѣвъ (свашокъ):
Гей дружбове танцуйте,
Ей най дѣвки не стоятъ,
Ей най ся стары бабы,
Ей на танец не строятъ!

Ч. 3. ДО МЫТЯ ИДУТЪ

Бесѣда (старосты)

Дорога дружино — до мытя идеме! — Идеме на воду — умыти молоду! — Горѣ гудаки!


Спѣвъ (свашокъ):
Зыйдъ-же Боже съ неба,
Бо намъ ту тя треба,
Освятити воду
Умыти молоду!

Бесѣда (старосты и молодятъ)

— Смотте-ле добры люде, што то съ того буде — наша паньи молода — червена якъ ягода. . .

— Што вы гварите, пане староста? Та-жъ я такого роду!

Староста: Панове музыканты! На честь и славу нашихъ молодятъ прошу заграти обертану!


Спѣвъ (молодого)
Оженилъ емъ ся — не призрѣлъ емъ ся,
Теперь ся мѣ не здае. . .
На криво ходитъ — на криво смотритъ
А и кривый носъ мае. . .

Спѣвъ (свашокъ):
Зъ гори ся хмаритъ — зъ долы ся хмаритъ:
Буде ляло цалу ноцъ!
Сподобало ся мѣ дѣвча у сусѣда,
Але мѣ го не хтятъ дацъ!
Гей што ся стало — съ другимъ ся кохало
Теперь мѣ го даваютъ...
А я имъ го не хочу, обернуся где хочу
Та най сой го тримаютъ...

Ч. 4. БАЛЕЦЪ КРАЮТЪ

Спѣвъ (свашокъ):
О ци тота, ци не тота, што рано вставала,
Посмотрѣла до окенка, же ся не выспала. . .
Ищи не день, ищи не день слава Пану Богу
Ищи я ся попритулямъ ку свому милому. . .

Бесѣда (старосты)

— Пане маршалка! Балецъ покрайте — паньи молода дарунки роздавайте — паньи свашки коровяръ приберайте—дружбове и дружки ѣсти пити доношайте — а вы, музыканте заграйте, але грайте! Бо якъ нѣтъ, то на мой душу, басы вамъ покрушу!


Спѣвъ (весѣльныхъ)
Крайте балецъ, крайте,
А намъ за пецъ дайте,
Будеме кусати
Хлопця колысати. . .

Молодый:
Ужъ я ся оженилъ,
Ужъ буду свою малъ,
Ужъ я васъ дѣвчата
Не буду любовалъ!

Молода:
Любуй же мя, любуй и я тебе буду,
Хоцъ кажду недѣлю бита отъ тя буду. . .
Хоцъ кажду недѣлю, абы не каждый день
Любуй же мя, любуй каждый день презъ тыждень. . .

Ч. 5. ПРИДАНЫ

(Спѣвъ (приданянокъ)
Идеме мы ту въ придны,
За тымъ личкомъ малюванымъ,
Идеме го навидѣти
Ци му буде добре жити?

Весѣльны:
Пришли намъ ту приданяне,
Што мы имъ ту ѣсти даме?
Зарѣжеме имъ барана,
Най ся гостятъ ажъ до рана.

Бесѣда (молодой):

— Якъ ся мате Няню! Якъ ся мате Мамо! Якъ ся мате Дѣду, Бабо — Стрыку и Стрыно — Уйку и Уйчино и цѣла моя родино!


Отецъ (молодого):

Я отецъ мого сына, а вашого зятя — витаю васъ, мой дорогій свату и свахо! И васъ дороги гости и прошу сѣдати до стола! На здоровя свату и до васъ свахо и до васъ дороги гости! Ноле цыгане грайте, або задатокъ отдайте!


Спѣвъ (приданяне):
Заграй-же намъ заграй, ей якъ намъ машь заграти,
Бо мы не будеме, ей долго танцувати. . .

Мати молодой:
Ой Боже, мой Боже, ей што я поробила
Едну дѣвку-мъ мала, ей и тоту выдала...

Молода:
Мамцю моя, мамцю, ей не жалуйте того
Бо сте мя выдали, ей за мужа гардого!

Ч. 6. ПРИДАНЫ.

(Бесѣда (свашки и старосты):
— Пане староста!
— Што паньи свашко?
— Я хочу танцувати!
— Ой свашки, свашки! Та вы мене, присям Богу, замордуете! Една зъ рукъ, а друга до рукъ! Але коли такъ, то музыканты заграйте!

Спѣвъ:
Горѣла липка, горѣла
Мой мила подъ ньомъ сидѣла. . .
Искорки на ню падали,
Паробки за ньомъ плакали. . .
А вы паробцы не плачте
Зелену липку загасте. . .
Въ решетѣ воду носили
Зелену липку гасили. . .
Зелена липка, ядловецъ,
Лѣпшій паробокъ, якъ вдовецъ,
Бо вдовецъ біе-катуе
Паробокъ личка цѣлуе..
Гей я сой хлопецъ-хлопчина,
Не мамъ ни мамы, ни няня,
Лемъ тоту едну дѣвчину,
Што собѣ съ ньомъ ту танцую. . .

Ч. 7. ПОПРАВИНЫ

Спѣвъ:
Сѣла муха на коноплю, обвалила квѣтъ,
А ужъ ты мѣ моя мамцю завзяла свѣтъ.
«Чого плачешь моя мила, чого тобѣ жаль?»
— Того вѣнка зеленого, што есъ мѣ го взялъ...
«Чомъ есь втоды неплакала, колимъ ти го бралъ,
— Я думала, фалечнику, же ты жартовалъ.

Бесѣда (старосты)

Ха-ха-ха! Такъ, такъ паньи молода! Якъ есъ выгаздовала, такъ будешь мала! А вы, дружбове, идте и принесте судокъ пива, зробиме поправины! А вы, музыканте, заграйте!


Спѣвъ:
Вадровали вандровници
Былъ я за водомъ,
Волѣлъ я ся не женити
Моя мила съ тобомъ!
Та што съ тобомъ мой миленкій,
Што тобѣ ся стало?
Вчера сме сой присѣгали
А вшитко надармо!
Вандровали вандровницы,
Былъ я за Тиссомъ,
Волѣлъ я ся не женити
Съ томъ парадницомъ!..

Ч. 8. ПОПРАВИНЫ

Бесѣда:

— Гой старый, старый, ты старый піяку! Подъ домівъ, бо идеме спати!

— Та чекай стара, я хочу съ тобомъ танцувати! Гей музыканте! Заграйте намъ стародавну — потрясану:

Ей, а я старый дирда,
Не танцовалъ нигда
Ей а теразъ мушу,
Хоцъ ся ту задушу!

Тпруци, тпруци телята,
Де идете дѣвчата?
Меже горы потоки
Есть тамъ трава по боки!

Якій такій шубравецъ,
Бере дѣвча на танецъ —
Подже, дѣвча, подже подъ,
Якъ выросну, буду хлопъ!

Не иду я на танецъ,
Ей бо мя болитъ палецъ!
— Треба палецъ завити,
А на танецъ летѣти. . .

Ч. 9. ДРУЖБОВИНЫ

Бесѣда (дружки и дружбове):

«Гей дружбове, та не стійте якъ телята на помостку! Зачинайте дружбовины!»

— Заразъ, заразъ паньи дружко, лемъ музыкантовъ почестую! Музыканты пійте, але и грайте, жебы ажъ хижа дуднѣла!


Спѣвъ:
Дружба я сой дружба,
Горька моя служба,
Три рочки-мъ не косилъ,
Дружбити-мъ ся просилъ. . .
А наши дружбове
Барзъ ся парадуютъ,
Же сой на «дружбинахъ»
Съ дружками танцуютъ. . .
А наши друженьки
Танцуйте-же съ нами,
Най-же вамъ не росне
Травка подъ ногами. . .
Смотъ-же собѣ младый,
якъ будешь газдовалъ,
Жебысъ старый овесъ,
Новымъ присыповалъ. . .

Ч. 10. ДРУЖБОВИНЫ

Бесѣда:

— Гей дружба! А чомъ музыканте не граютъ?

Бо музыканте хотятъ до басъ!

— Цыганъ, на машь коруну до басъ, але грай, бо якъ ти стрѣлю едну, то ажъ ти зъ носа выскочитъ!


Спѣвъ:
Тотъ буде мій! Ручку далъ мѣ!
Ма сивого коня, сподобался намъ
И мѣ, и мѣ самъ. . .
Летъ коню летъ, презъ густый лесъ,
Принесъ мя до гаю, тамъ дѣвчатко маю,
Тамъ овса достанешь. . .
Дай мя манцю за кого кцу,
Бо якъ мя не дате, за кого я хочу,
До Дунаю скочу. . .

Бесѣда:

— Гей дружба! Та не стій якъ тото Гайтково теля, што пошло поза Опаленый! Возъ кварту палюнки и почестуй люди!


Спѣвъ:
Мила моя, купь мѣ коня,
А най я не сижу, най сой не корочу,
Дармо свѣта дома!

Ч. 11. СВАШКИ

— Паньи свашки! Дружбовины ся кончатъ, а сващины ся зачинаютъ!

«А такъ, такъ, дружбо! Бо я мушу ити домів, бо мои коровы ужъ тыждень не доены, ани дѣти не купаны. Але о томъ потомъ, гудаки заграйте едну»!


Спѣвъ:
Ей, свашка я сой свашка,
Ей ужъ я досващила!
Ей остатню корову,
Ей съ дружбами пропила. . .

Ой наши паньи свашки
Ой велики піячки!
Пропили зо себе,
Ей остатни запаски...

— Гей дружбове, мы ніяки не піячки! А коли выпьеме то за свое!

«Ха-ха-ха! Цигане грайте, бо свашки, присямъ Богу, пьяны!

А Боже, Боже, якъ то зле,
Ей кто любуе — не возме. . .
Ей а я любилъ и емъ взялъ
Ей та мѣ памбігъ добре далъ.

Ей, маю жену молоду,
Тай не пущу ей по воду. . .
Встигла бы ся мѣ втопити
Бѣда засъ ся мѣ женити. . .

Ч. 12. СВАЩины

А што съ вами, гудаки, же не грате? Грайте, бо гнеска сващины!

Спѣвъ:
Заграйте мѣ гуслѣ, заграйте мѣ басы,
Най сой вытанцую свои млады часы!
Была бысъ мѣ мила, свашка премилена,
Жебы мѣ стояла палюнка варена...
А Боже мой, Боже на таку мамичку,
Ме мя за мужъ дали, таку невеличку.
Корову не здою, бося хвоста бою
Хижу не замету, метлу не занесу...
Наша молодиця, легка роботница,
Не хоче робити, лемъ шумнѣ ходити...

Ч. 13. СУСѢДЕ НА ВЕСѢЛЮ

Бесѣда:

— Мамо, ци будеме сусѣдовъ на весѣля просити?

«Та будеме, невѣсто, будеме, але перше про нихъ корову зарѣжеме, жебы намъ даколи не повѣдали, же сме худобне весѣля справляли»...


Спѣвъ (сусѣдовъ):
Не пришли сме ѣсти, не пришли сме пити,
Лемъ мы до васъ пришли невѣсту видѣти. . .
Даласъ мене мамусь на шороку ролю
Не на роскошъ то мѣ, лемъ на бѣду мою.
На широкой ролѣ треба рано встати,
А я молоденька рада долго спати. . .

Бесѣда:

— Пане молодый, а съ якого села ваша жена?

«Бале чуете, та съ того, де буяка на церковь тягали и солнце до мѣха ѣмали». . .


Ч. 14. ГУДАКИ ѢДЯТЪ

Ты гудачку добрѣ грай, добрѣ грай!
И до пеца позерай, позерай!
Есть тамъ кура печена,
То про тебе вечеря!

Бесѣда:

Добре намъ спѣвати и танцувати, бо сме ся наѣли и напили! але наши бѣдны музыканты ищи въ гамбѣ ничъ не мали! Музыканте, подте ѣсти!

— Але бо то валитъ, валитъ! Цыганъ, помалы съ перогами, бося задусишь!

— Але якъ машь ѣсти то ѣчь, або грай, бо присямъ Богу, такъ буду билъ, якъ кота въ мѣху!


Спѣвъ:
Заграй же мѣ заграй,
Бо я бы ти загралъ!
Гушельки пошкипалъ,
А пиняжки забралъ...
Затомъ ся выдала,
Жебы была хвала!
Жебы я въ церковцѣ,
Дѣвкомъ не стояла!
Не тота мѣ мамця
Што мя выховала,
Лемъ мѣ тота мамця,
Што мѣ дѣвча дала. . .
Дали сте мя мамцю
За лѣсъ за дубину,
Жебы я не пришла
До васъ на гостину. . .
А я и дубину
Докола обыйду
И до васъ мамичко
На гостину приду. . .

Ч. 15. ОСТАТНІЙ ТАНЕЦЪ

Бесѣда (старосты)

«А теперь на остатку заграйте намъ куляву: Молодый танцуе съ молодомъ, староста и маршалка зо свашками, чопаръ и доматаръ съ газдынями, дружбове съ дружками, паробцы съ дѣвками, а вы молоды хлопци и дѣвчата — заспѣвайте молодятамъ!


Спѣвъ:
А нее то нее, якъ ходити дѣвкомъ, гея-гея,
Подъ басанунками, подъ зеленымъ вѣнкомъ,
Не хотѣламъ ити, примусилисте мя, гея-гея.
А теразъ ничъ не мамъ, спомагайте же мя: —
Сестра на горнятко, а братъ на мисятко, гея-гея,
А вы моя мамусь, хоцъ лемъ на телятко. . .
Весѣля ся кончитъ, бѣда ся зачинатъ, гея-гея,
Молодица плаче, же ужъ не вытриматъ. . .

Ч. 16. КОНЕЦЪ ВЕСѢЛЮ

Бесѣда:

Староста: Часъ до дому итти! Дорога дружино и родино: Весѣля ся кончило, дай вамъ Боже счестья, здоровья и силы, што сте молодому и молодой послужили!

Молода: «Дай Боже и вамъ, пане староста! Дякую вамъ, дружино и родино за вашу послугу! А якъ до такъ рока буду мати пророка, запрошу васъ всѣхъ на крестины!

Всѣ: «Виватъ!»

Нашъ молодый най жіе,
Най молоду не біе
Многая—благая лѣта!!!
Наша млада най жіе,
Най младого любуе,
Многая — благая лѣта!!!

Маршалка: — Гудаки выграйте дружину, та достанете заплату и чорну куру!


Спѣвъ:
А нее то нее, якъ то у сусѣда,
Есть невѣста гарда, до тыжня весѣля.
Ужъ ясне соненько за гору заходитъ,
Ужъ ся родинонька зъ весѣля росходитъ.

Бесѣда:

Старый! Запрѣгай коньи бо ѣдеме дому!

— Грицу примай коньи, бо сани перевернутъ!

«Дякую вамъ нанью и мамо, што сте мя тяжко ховали и на добре газдовство выдали.

— Молодый и молода, оставайте здоровы, жебы сте прожили сто лѣтъ!

— Ходьте здоровы!


Конецъ Весѣлю. 


У МАМЫ НА ГОСТИНѢ

Часть 1.
— Грицу! Я хочу идти до мамы на гостину!
— Заразъ ѣдеме, лемъ коня запряжу!
— Но вйо, сивый, вйо!

Спѣвъ:
Гей идеме, идеме, ей на тоту гостину
Будеме тамъ видѣти вшитку нашу родину. . .
Где ты идешь Катрено — до стодолы на сѣно,
Не заперай за собомъ, бо я иду за тобомъ. . .

Бесѣда:
— Сивый гооо! бо ужъ ту мама и наньо! Дай Боже добрый день!
— Дай Боже. Якъ ся мате мои дѣти?
— Барзъ добрѣ, мамо, лемъ не можу ничъ ѣсти. . .
— А я вижу, вижу, моя дѣвко, жезъ спланнѣла, ажъ ти по подъ очи почорнѣло. . .

Спѣвъ:
До саду, мила, до саду,
Будеме сѣяти розсаду,
Розсада буде сходити,
Будеме капусту садити. . .
Якъ мы капусту садили,
То мы Пана Бога просили:
Ой дайже Боже росички
До нашой капустички. . .

Часть 2.

— Не танцувалъ я на своемъ весѣлю, но але на гостинѣ, верабоже, буду! Но грай, грай!

Гей ужъ яся оженилъ,
Гей буду газдовати,
Жена свиньи пасти,
А я завертати. . .
Гей ничого мѣ не жаль,
Ей лемъ своей мамички,
Же я имъ не подамъ
На старость водички. . .
Ей сивый голубь, сивый,
А голубиця сивша,
Отецъ мати мила
Але жена мильша. . .
Чудуются люде,
Где я ся опила,
А я въ своей мамички,
На гостинѣ была. . .
Дай же Боже добрый день
Ей до нашого дому
Идеме зъ гостины
Ей отъ своей родины. . .


МУЖЪ КОСИТЪ, ЖЕНА ѢСТИ НОСИТЪ

Ч. 1. Мужъ косити иде.
— Стара, я иду косити, а ты мѣ вынесешь ѣсти..
— Та лемъ иди, иди, старый...

Спѣвъ:
Гей мамъ я косу, але ньомъ не кошу,
Горѣ селомъ долу селомъ на раменѣ ношу. . .
Ей мамъ лучку въ глубокой долинѣ,
На ней трава и отава нигда не загине. . .
Ей якъ я буду тоту лучку косилъ,
А кто же мѣ буде ѣсти носилъ?
Ей вынесе мѣ моя млада жена,
По колѣна зарошена, въ чепцѣ зачеплена.
Гей жено, жено, чомъ ся не обуешь,
Зимна роса, а ты боса здравья собѣ псуешь!

Ч. 2. Жена ѣсти несе
— Ху-ху-ху!
— О, моя стара ужъ мѣ ѣсти несе!
— Сѣдай, старый, подъ смерека! Ты будешь ѣсти, а я буду кіпки трясти....

Спѣвъ:
Гей якъ я ишолъ презъ лѣсъ, презъ лѣсъ калиновый,
Гей станулъ я на камень, камень мармуровый,
А съ подъ того каменя водичка выливатъ:
Ей напійся ей мила, колисъ справедлива. . .
Я бымъ ся ей напила — красу бымъ стратила,
Гей ты бы мене не взялъ, мѣ бы ганьба была. . .
Гей мѣ бы ганьба была и моей мамусѣ
Ей же мя едну мала — замужъ не выдала. . .



[BACK]