Яки Сутъ Лемки? — Ваньо Гунянка

Якъ межи другими народами, такъ и лемками: Сутъ лемки добры и сутъ лемки злы. Сутъ велики и малы — сутъ мудры и. . . (не повю, бо ся бою, же ся тоты образятъ, бо сутъ барзъ образливы). Дальше: Якъ межи другими людьми, сутъ лемки вспанялы и простаковаты — щиры и скупы — и такъ дальше. . . Само такъ, якъ други люде. . .

И такъ, мудры лемки: По верхи го трудно познати, такого мудрого лемка. Ажъ коли зайдете съ нимъ въ бесѣду, то зачудуетеся, откаль въ того лемка набралося тельо розума. Вшитко розумѣе, вшйтко Вамъ обсудитъ такъ, же лѣпше не може быти, такій простый, неученый, а ученого поучитъ, додастъ розуму. Або, коли напише писмо, то оно кривульками написано, а полно тамъ сенсу и розуму. Але такій лемко не пре напередъ, лемъ все позаду ся триматъ. И тото велика бѣда, бо напередъ пхатся якъ разъ тотъ другій, образливый.

Вспанялого лемка познате доразъ: Вспанялый ужъ ходитъ вспаняло, «сутъ» у него вопанялый, смотритъ вспаняло и николи не повѣстъ вамъ «што» и не напише «што» або «что», а такъ деликатно вамъ повѣстъ и напише «що». . . А часомъ и схилитъ голову и: «що прошу?» Ту заразъ познате, же мате до роботы съ вспанялымъ, деликатнымъ лемкомъ, котрого ужъ чепилася «укаринско-галицка культура». Онъ ужъ знае, якъ обыйтися съ панами и панями. Головне слово у такого лемка то того «що», бо оно головне и въ галицко-украинской культурѣ. «Што» бесѣдуютъ лемъ простаки, а коли изъ насъ лемковъ дакотрый хоче быти культурнѣйшимъ, то треба все гварити: «що»! И писати «що»!

Друге таке слово: Простый лемко вамъ помѣстъ «чомъ». . . Вспанялый, культурный лемко николи «чомъ» не повѣстъ, а зложитъ, якъ ся належитъ: «чому?» и вдаритъ на «у». А ужъ доразъ познате простака, коли не рахуеся ничъ съ культуромъ, лемъ повѣстъ: «гевъ». . . Вспанялый, культурный лемко зложитъ бузко, якъ ся належитъ и повѣстъ: «тутки», «глянь», «ходи сюди» и т. д. Вспанялый лемко не любитъ того слова «лемъ», бо то слово не культурне, и повѣстъ го, коли ся му вырве, а потомъ языкъ вкуситъ, а старатся повѣсти: «лишь». . . Бо то культурнѣйше слово. «Культурный» лемко нерадъ, же онъ лемко, а коли му повѣсте лемко, то ся образитъ. Такій вспанялый лемко ганьбится лемковской гуньки и ужъ емъ пару писемъ досталъ: «Не рисуйте тыхъ гуньокъ, бо то не «файно» показовати такъ нашу культуру, а и теперь «вже» не носятъ у насъ такихъ гуньокъ. . .» Съ такима «вспанялыма лемками мамъ велику бѣду, бо то я лемко простый и ніякъ не можу имъ выгодити..

Присылатъ еденъ лемко «вершъ» на ляховъ. Вершъ такъ планный, што ся мѣ чловека жаль зробило, «вершъ» шмарилъ до коша, а чловеку, жебы го потѣшити, пишу письмо: «Вашъ вершъ добрый, але помѣстити го не можеме, бо барзъ противъ «ляховъ», то бы могли «Лемка» на Лемковщину застановити». Гей, якъ ся лемко закукурѣчилъ! — «Та вы съ ляхами тримате? Правду «Свѣтъ» писавъ, та вы такы дикы дурничовъ помѣщате, що ся лоде смѣютъ, що ганьба, бо тамъ показуеме яка у насъ «колтура». Та другы народы свойх поетов потпоруют награждаютъ чтобы имъ охоты додати до дальшой роботы, а вы шутки собѣ робите змене видно, вы лемъ хочете приподобатися полщи. . .» и т. д.

И видите, я, простакъ, въ клопотѣ съ «колтурныма», котрымъ належится честь, слава и гоноръ и «колтурна» газета, а не простый «Лемко».

Лемъ тото чудно, же тоты «колтуры» не зыйдутея разомъ, не зложатся и не выпустятъ «колтурну» газету? Або чомъ тотъ «поетъ» не збере своихъ вершовъ и не выпуститъ самъ книжку съ ними? Лемъ бы хотѣли, жебы простый Ваньо Гунянка и культурну газету выдавалъ и «колтурны верши». . .

Чудаки тоты «колтурны лемки», хоцъ «колтурны». . .


Ваньо Гунянка.



[BACK]